Habakuk 3 - Bible en Guidar

Wəkkam na Habakuk ( 3:1-19 ) Əkkam na Habakuk: Ətoŋ na Maŋgəlva addəv wən nani

¹ Wəkkam na məskəleŋ Habakuk. Va də wəla na əɓuhma.

² Yawe, nəprəmək aka wən noko, geslne armuwəka. Aɗɗa wəza nok aka pay nanziya naw egge! Arban addəvit əzvaɗe, addəvit herɗe noko, kəɗɗumgən aka ulasahã!

³ Maŋgəlva tay əzzan sə Teman, Salala səka mossorgo metiŋ na Paran. Məlĩ nan aknəhək disiŋ, əɗi kiya nan tay əknəh dəlvafuŋ.

⁴ Əkeɗeɗe ndasli yi. Təl pay tay əgilyoŋ sula səza van tusso: adaki mahaɗama na gbogboŋ nani.

⁵ Gəbay mərma tay ədaw abani, mamal ammban ɓa'ə.

⁶ Ndən ziw asla dəlvafuŋ. Awlaka, aɗɗe dəlveŋge hirɗiki. Mossorgoɗe gugriɗ na sete apoŋgoŋko, mossorgoɗe na maguw atirifeŋke. Tiveɗ na maguw nanəŋgə.

⁷ Nulek gizlirkeɗe na Kusan addəv əraya; genzekɗe naka dələv na Madiyan tahəŋ geŋgeɗgeŋgeɗi.

⁸ Aket məlpeŋge Yawe adəgədəv sa? Awaniɓa aket məlpeŋge ake herɗe nan sa? Awaniɓa sən pehe asil sən sa? Vi apeŋgik aket pilseŋge nani, aket mawteɗ nawgay naska wəla.

⁹ Kənslinik bəle noko, əpel nasway nok herɗeŋgə. Dit milpeŋge kədantaran dəlvafuŋ.

¹⁰ Mossorgoɗe gugriɗ awlukunko: tahəŋ əkkereŋgi. Buwən aziyək zlir atoŋko, pehe tay əbay gagay, asilgitik vovolumɗe hã disiŋ.

¹¹ Pay də təla aziweŋgik a gəlet ara əwiɗ net herɗe nok muhet məzəddoŋgu, aba tulhõ nok məzuwiɗ pitipiti.

¹² Də ədagədəv noki yi kədabbalan dəlvafuŋ, dit herɗe nok kədawndepet ɗiy naket dəlveŋge.

¹³ Kəgilik kawkõhgit ɗiy noko, kawkõhgən mesiya noko. Kəbzləwək gəla na məsdaraw təŋ səka kiyən hã afuŋ: kəvvuyonək gabban məɗiyən.

¹⁴ Kətilikik kiyit deyeɗe nan dit herɗe net dəvet dəveti, yaŋ adazzoŋ va barkataŋ kazza əndolomə, va kəmna, kazza əvovõh məzuray də mahaɗamma.

¹⁵ Kədawgitik pilseŋge nok də pehe, dəddəvit vovolumɗe piɗimpiɗimi.

¹⁶ Nəprəmək wən nani, gədəvu aɓələk hã va pəlu digili. Də ɓaɓəlmanəska, maw gbi'gbi'i, məŋgənu hiyõf ləŋgə. Nəsawək a gəlaw əkkere. Nəsawək ɓatɓat əga pay nawzəm sahã, məzəzzan aket ɗiy məzəwak səməni.

¹⁷ Vi sokoyo affuy na ɓa, tay nawrəh aket megezlembirkeɗ ɓa, wəza na hereme atərna wəray ɓa, zəgeɗ nawzəm aɗɗaŋ na a guli ɓa, gilew assoŋ na a gazlaŋ ɓa, wasli asan na taka dayday a gibek ɓa.

¹⁸ Naw na, wanənneken zu vi Yawe, wanəɗɗəl vi Maŋgəlva məzukõhguwa.

¹⁹ Yawe Maŋgəlva nawi gbogboŋ nawa, tay əɗi təlu va net muneŋge gəm tay ədawgu aket mossorgoɗe gugriɗe. Səza daya na gəlya, dit kokuɗe zevit temtemi.