Gəlya net Gəlyaɗe 8 - Bible en Guidar

¹ Nawa dədapsukuk ka məlmu di? Məs duwaɗ a makrat əmma! Kəta an nərəkuk appaka na, wanəllamko: də as pak na ɗiy azelewən na ɓa.

² Wanəkuko; wanətoŋguk anat əmma da. Wakəyagaw; wanəpsuk mbazla tatraha, gəm məɗoto na Tonzok nawa.

³ Zlaɓay nan tay ammba kiwa, dəzəŋ nan akaw kəlakka!

Ndəni

⁴ «Nəkkomokumko, gorɗeŋge na Yerusalem, Kədawsilgənən ɓa, kədafɗahanən əŋgla naw tak pay nan dəgap ɓa ɓa.»

Gəlya mesləre'in ( 8:5-14 ) Kirin muguluŋgiti

⁵ «Nawattə məzəzzat sə kapta-muyã, məzuges aka gərat na makrat kədək di?» Səmmba goɗoŋgoy nədafɗohoko: adaki mok təɗi daway noko, adaki akən təɗi daway nok təwuko.

Gbogboŋ na əŋgla Ndəta

⁶ Abasu va zəga nappan gəlan a mokroko, va zəga nappan gəlan aka voko. Vi əŋgla tay gbogboŋ va əmta; əŋgla guromi va əmta; wəzla nan na offo: offo na Yawe yi.

⁷ Pehe aɓap na əmtan əŋgla ɓa, məlpeŋge atəpgənən na ɓa. An ɗəf aɗiyək ərah neŋgil nan pak vi dərahgən wəŋgla na, sessel kawzeleni.

Milmiŋgiɗwa

⁸ «Mənam tat dət məlməmə. Muzliyaktə: tat də bide a makrat ɓa. Mi mədagəɗ sət məlməm pay nawpel akat di?

⁹ An zlava mərkantə, kəta aməzaɓ ɓeɓele na təbəz babar akata. An maddambatə, kəta waməslakatət də wəlaŋga ɓəɓəl na Liban.»

Ndəta

¹⁰ Zlava na dələv mərkan nani bidew vikikvikin gesiŋ ɓa sa? Ama haran na in tat va akən məzuki zazaya.

Ndəni

¹¹ Salomoŋ tay də guli net megezlembirke a Ba'al-Hamon. Appanək megezlembirke sit məgaɗe. Naway pak dəkigən suleyɗe gabal na avəl uwa net wəleŋɗe.

¹² Megezlembirke nawa, nəzaɓanək va nəŋgələ. Suleyɗe net gərmeŋge gabalə, nokəŋ Salomoŋ, səkat sula tamə, sit ɗiy məzuganən uwa net wəleŋɗe.

¹³ Is məs kəsok addəv guli net wəleŋɗe, beynegiɗu tahəŋ əpakən sləmet ammba əpel noko; apel suwa:

Ndəta

¹⁴ «Ade, də kakara gəraw na makrawa! Assok va, gawla mune awaniɓa va wətən mune, aket mossorgoɗe məzəffokoŋ neki.»