Gəlya net Gəlyaɗe 5 - Bible en Guidar

Ndəni

¹ In tat əzzaw a guli net wəleŋɗe nawa, məlmuwa, gərawa; In tat əttəɗ telembe gəm əttəɗ telembe na wəlaŋga məffok nek nawa; In tat əzəm seɓe na amama nawa in tat wəsa mbazla naw də moŋvo nawa! «Məzəmə, gəreŋgiɗwa məsə, əŋgla dəbaykum gəreŋgiɗu na makrawa!»

Gəlya Gəlya mopoɗo'un ( 5:2—6:3 ) Nəleŋke ya nəleŋ pət ɓa Ndəta

² Nəleŋke ya nəleŋ pət ɓa: nəprəmək wəla gəraw na makraw darga maddamba! «Akol suwa məlmuwa, gərawa, bəŋgək na maha nawa, ɗak na makraw gərakə; muhur kiyu, aziyək minɗe; dəfəɗ na metendeŋɗe naw minɗe aket ɗewɗewi.»

Ndəni Ndəta

³ «Nəgbukuk lukut səzawa: mbar nədamsak əgulun di? Nəɗak təlwa mbar nədamsak wərga'an di?»

⁴ Gəraw na makraw aguluk van kəlammba maddamba yas gədəvu agəɗ ɓalwayə vini.

⁵ Nəsilke vi kawkol maddamba sən gəraw na makrawa; ya məŋgən mẽl va telembe tay əffok aza vawa, məŋgən mẽl va telembe nazet pirgiɗ vawa agəɗək aza zəga narma maddamba.

⁶ Naw nəkolsənək gəraw na makrawa! Yaŋ gəraw na makraw akkpaŋ atoŋ balə. Nəgilik gala apeli: Nəkayanəka, nərah ɓa; Nəyaka, dəzlan su ɓa.

⁷ Məgaɗe məzusuləkaŋ ki walaŋgəla-metiŋ almaŋ suwənka; Argəwənka, aɗisuwənək vaŋviya; məgaɗe naket zlavaɗe məherti, atafənək lukut metiŋgin nawa.

⁸ Nəkkomokumko kirin muguluŋgit na Yerusalem, An kərəhənək gəraw na makraw na, mbar kədawnahaŋ sənən di? Kənahaŋ sənəngən na gbəgba' na əŋgla tay azawa!

Gəlya

⁹ Gərok na mokrok van miy azan day ki ɗəf mbərən di, haya gamaralək naret gili? Gərok na mokrok van miy azan day ki ɗəf mbərən, Ka kəkkamamgən vaŋhəŋ di?

Ndəta

¹⁰ Gəraw na makraw van tay əwiɗe ɗolokɗoloku; Sənsay səret ɗiy gabal kəlawə.

¹¹ Kiyin tay va meleŋge saksakə, Muhur kiyən tay məsərvəɗən, titiriy va Gaŋgraka.

¹² Haran tay va biŋgeɗ na maha a met iŋkile məzənzoŋgu, daslslayaŋ ara moŋvo, dassoŋ a met iŋkile suzliya.

¹³ Galiyən tay va təki nazgəl wəleŋɗe məs məŋginit neki. Metteɓ man dəndəfma'i məzəttəɗ telembe.

¹⁴ Van tay va mipa'a na meleŋge Məzaɓən na sləma də təbəz maməlma. Gədəvən tay babar ndasl va gozlobekne məkkəɗsən zəga titir va təki a disiŋ.

¹⁵ Tələn dədəka na ɗoroy məkrəkən aka gabban na meleŋge saksakə. Məɗa haran tay va Liban: Məwele va Mugugulo.

¹⁶ Man neki; Ya ziw na zən na tay əvay ezlezle. Vaski gəraw na makraw asani, vaski baynaw vani, Kirin muguliŋgit na Yerusalem!