Gəlya net Gəlyaɗe 4 - Bible en Guidar

Ndəni

¹ Gamaralək kənanə, gəraw na makrawa, gamaralək kənanə! Harok na biŋgeɗ na mahaŋgə ara məsərət kiya noko. Muhur kiyuko tay va gazlaŋ net gilew məzəprikeŋ də kakara səka mossorgo na Galad

² Slayuk tay va gazlaŋ net timeŋgiɗi mətaw deɗeke səzet kakanka, məzəmilyoŋ sə təki naskoɓti. Pakgit tahəŋ dit meseŋɗe, tay dəzə səmmbet ɓa.

³ Mok tay va gabagək papraŋkə; hurzlumuk moggoni. Galiyuk tay va uwa na hurzuzuyo məpɗakan addəv məsərət kiya noko.

⁴ Wəlok tay va gəla-ləklək na Davit mərkan nawzi zəgeɗ mərəh naska wəla, barayɗe gabal tahəŋ məlewit adaka, dit zəgeɗ nalpa temtem pak net məs mekreti.

⁵ Bidok sulegit tahəŋ va kirtit muneŋge sula va muneŋɗe meseŋɗe, məzutaɗaŋ addəv dəndəfma.

⁶ Təŋ kakaŋ hã pay bətə an zeŋgileɗ addereŋke, wanəmbat aka gərəm net telembe aka mossorgo məzla timbe məzəffokoŋ

⁷ Gamaralək kənan gərakə, gəraw na makrawa! Heslepe tay azok ɓa!

⁸ Sə Liban də ina, gərawa, sə Liban də in kədazzoko; kədawprikok səka dadwar ki mossorgo Amana, səka dadwar ki mossorgo Senir gəm Hermon, a təki nawdik net ɓooliɗi gəm mossorgo net balgamɗe.

⁹ Is tat ətemguwa, məlmu gərawa, is tat ətemgu də əbəzleɗ noko, dit məbayaɗe nawloko.

¹⁰ Ərreɗ nok lewi, gəraw məlmuwa! Ərreɗ nok adayək ki mbazla, əffok na tursan nazok tay əffok hõyu!

¹¹ Metteɓ mok tay əgilgin mədəkəndəkən, gərawa; amama də moŋvo tay aka hurzlumko, lukutɗe nozok tahəŋ əffokon va tursan na Liban.

¹² Guli net wəleŋɗe məsap man kənani məlmu gərawa; heret iŋkile mima məsap meti, vov net iŋkile məmsan man.

¹³ Lalaw nok tay va əndəv na guli net tonzokɗe, də uwa lelewe: nelle də galalak

¹⁴ wəlaŋga məffok nek də safran, zeŋgelveŋ gəm anzalyã dit wəleŋɗe məffokoŋ adawyaŋ na Sinnamom pakə; telembe məffokoŋ nek gəm kevel na koso'oy gəm tigbire pakə.

¹⁵ Intə heret iŋkile mima na guli net wəleŋɗe, vov net iŋkile məzədawaŋgə məzəpriken sə Liban!

Ndəta

¹⁶ Afɗahə, səmyã na tapaslay kəla disiŋ! Ade səmyã na tapaslay pay na moskoyo, ampəsgən guli net wəleŋɗe nawa, ka dəffokokgən təki pakə! Kəta gəraw na makraw dəde addəv guli net wəleŋɗe nani, dəzəmgən uwa net wəleŋɗe nenekɗe.