Gəlya net Gəlyaɗe 3 - Bible en Guidar

Tissinik na tələk əkayani Ndəta

¹ Dəfəɗ aka zəga nafna naw na, In əkayan ɗəf an nəŋgələ In tat əyan nawləmsən ɓa.

² Adahək nəsilgini, kawsulək ki walaŋgəla-metiŋgini, Aket tiveɗ dit lumiɗi, nədawkayan dəf an nəŋgələ. In tat əkayani ya nawləmsən ɓa.

³ Məgaɗe məzusuləkaŋ ki walaŋgəla-metiŋgin almaŋ suwənka: «kulannək ɗəf məs nəŋgələŋ sa?»

⁴ In ətoŋ kiyit ləŋgə Nələmək də ɗəf məs nəŋgələ; Nərmaka yas nəppan əmpa ɓa, Hã gap in toŋgən eŋgil anat əmma da a giziŋ nat ɗak məs təɗi daway nawa.

⁵ «Nəkkomokumko, gorɗeŋge na Yerusalem, Də iya nat munaŋkə, awaniɓa dit muneɗe nawra, Kədawsilgənən ɓa, kədafɗahanən əŋgla naw Tak pay nan dəgap ɓa ɓa.»

Gəlya mohoko'un ( 3:6—5:1 ) Ɗiy mbirti

⁶ «Naway məzəzzan sə kapta-muyã hirtiŋhirtiŋ va enene, də məŋgənən fitfit va mẽle gəm va timbe na gegeriŋ, də tursan mətakaɗə na guwəŋ di?»

⁷ Mawtak nan yakəŋkə akən na Salomoŋ Ɗiy məs mekret kaklaw sləre, səret məs mekret na Israyel tahəŋ kiyət karkarə.

⁸ Ndəɗaŋ pak tahəŋ də masalam avet kãwkãw məyeget nawgaya. Naway pak masalam agzeni Vi kawga kiyən sən geslne na dəfɗa.

⁹ Məzaɓ səni təki nassa na sləma sən Salomoŋ na wəlaŋga na Liban.

¹⁰ Məzaɓ səni tələn na təbəz babara; təki nawgese, na meleŋge; Təki nassa, də gabaga pepreŋge, gorɗeŋge na Yerusalem azaɓnən gədəvən də mekret taka.

¹¹ Gorɗeŋge na Siyon migil misim məlĩ Salomoŋ də mətərkiya məs man tətər sən pay nawɓel nani: pay an məs asan addəv ənneke.