Gəlya net Gəlyaɗe 2 - Bible en Guidar

¹ Naw kidorgom na təki məpəlayya nani, dəndəfma dəsan a walaŋ.

Ndəni

² Va dəndəfma aweleŋgit tintifɗe, vastə gəraw aweleŋgit gorɗeŋɗe.

Ndəta

³ Va goɗoŋgoy aweleŋgit wəleŋɗe awra Vaski gəraw na makraw aweleŋgit gewleɗi. Nəsawək ara zeŋgilen va nəŋgələ, uwa nan neki a barawa.

⁴ Awku a gəla mbazla zəga van akaw na əŋglay.

⁵ Məzəmgu də məpəpla net megezlembirkeɗi, məvay gbogboŋ dit goɗoŋgoyɗe; vi in tat də gbəgba' na əŋgla.

⁶ Zlaɓay nan tay ammba kiwa, dəzəŋ nan akaw kəlakka!

Ndəni?

⁷ Nəkkomokumko, gorɗeŋge na Yerusalem, də iya nat munaŋkə, awaniɓa dit muneɗe nawra: kədawsilgənən ɓa, kədafɗahanən əŋgla naw tak pay nan dəgap ɓa ɓa.

Gəlya masula'ən ( 2:8—3:5 ) Ndəni dədazzani Ndəta

⁸ In tat əprəm gəraw na makrawa! Yaŋ əzzani! Dəzla dəket gərmeŋge, əsukiɗi dəket mossorgoɗe.

⁹ Gəraw na makraw tay va munaŋkə, Awaniɓa va wətən mune. Yaŋ ziwwe aɓɓa gəla namə, Tay ula kəlara təkifoŋgo məppani, Tay əlŋgəɗ kəlaret təbzeŋge məzleketti.

¹⁰ Gəraw na makraw apelke, anah suwək na: «Asili anoko gərawa, gamaralək nawa, ade aŋka!

¹¹ Vi mawala tay ətoŋ yaŋka; buwən ambatka, alək a hoku.

¹² Zəgeɗ tahəŋ əffuyoŋ aka dələv namə, pay na gəlya agapka; wəlet mukuɗuŋguleɗ tay əprəm aka dələv namə.

¹³ Sokoyo tamə tay əɗɗa muduvurziyo, megezlembirkeɗ məzəndufoŋ tahəŋ əffokoŋgu. Asili anoko gərawa, gamaralək nawa, ade aŋka.

¹⁴ Bəŋgək na maha naw na katafay na milɓe, Səra təki səroho na mabuzgum, arbansu horoko, apel nəprəmgən wəloko; Vi wəlok neki, məɗa harok lawi.»

Mata

¹⁵ «Mərme səm Balwayɗe, kirtit balwayɗe məzuraygitin megezlembirkeɗi, aka megezlembirkeɗ nam tay əɗinən ɗaŋkelti!»

Ndəta

¹⁶ Gəraw na makraw nawi, in tamə nani, tay ətaɗ addəvit dəndəfmeɗi.

¹⁷ Təŋ kakaŋ hã pay bətə an zeŋgileɗ addereŋke, amili anoko gəraw na makrawa asok Va gawla mune awaniɓa wətən mune, aket gərmeŋɗe muɗeketi.