Gəlya net Gəlyaɗe 1 - Bible en Guidar

Gəlya maddaabəŋ ( 1:1—2:7 )

¹ Gəlya na Salomoŋ an nenek day.

Əpel na gre Ndəta

² Dəllamu a makrani dəfyokowa! Vi ərreɗ nok tay wəda zu denene day ki biya,

³ day ki əffok na tursan an neneke. Is zək nok tursan an moggon kənani. Vini kan gorɗeŋge aŋglukəni.

⁴ Arma vawa, anzamsəmə. Məlĩ tay ətoŋgu a giziŋ nani: «Makram dəvoŋgu, zəm dənek viko» məgagdakan səm ərreɗ nok məzə ənneken zə ɗəf day ki mbazla. Təsiy kirin muguluŋgit aŋglukəni!

⁵ Tuturuk nan lalawkə, gorɗeŋge na Yerusalem, va gizlirkeɗe na Kedar, va məzlzlaraɗe na Salomoŋ.

⁶ Kədazlgaŋ sləma aka titir naw, an pay akkpokwək ɓa. Gidivit milmiŋgiɗu adək akawa: aɗi wənən əga guli net megezlembirkeɗi; nəga guli net megezlembirkeɗi naw dayday ɓa.

⁷ Aboton su ɗah, is memɗekewkəŋkə, aŋga kədawteɗ gilew nok di, aŋga kədawdikit an pay arəmək di; Vi nədawsaw slorslor a meŋgevet gilew net mekkeyeŋgiɗuk ɓa.

Məzuteɗeŋɗe

⁸ «An kəsən ɓa na, is, gamaralək net gili, azban betemit gilewi gəm ateɗ kirti gilew nok a maŋgava gəla net məzuteɗəŋɗe.»

Ndəni

⁹ Va pəlsaŋgək na sləma məs adawtok sətən mawta na wəgaya na Farawən vas nədawluko, gəraw na makrawa.

¹⁰ Galiyuk lewi aweleŋgit Metendeŋɗe, wəloko moggoni addəv kpəksa.

Məzuteɗeŋɗe

¹¹ Waməzaɓ suk metendeŋɗe na meleŋge, də metteɓ man na təbəz babara.

Ndəta

¹² Təŋ kakaŋka məlĩ tay ananda, tursan naw tay əffok aŋga pakə.

¹³ Gəraw na makraw tay azaw va mẽl va telembe məzəffokoŋ də gəlani: tay əfna kim aweleŋgit bidewa.

¹⁴ Gəraw na makraw tay va mokkoy na nelle va megezlembirke na En-Gedi.

Ndəni

¹⁵ Gamaralək kənanə, gərawa, gamaralək kənanə! Horok tay va net biŋgeɗ na maha.

Ndəta

¹⁶ Lalaw kənanə, gəraw na makrawa, mbuɗuɗu kənan day! Təki nafna nam, tay məzaɓan moggoni.

¹⁷ Məguguleɗiŋ merzeɗ na gəla namə, mərawən də Berot.