Gəlyaɗe 80 - Bible en Guidar

Əkkam nawkõhgit mə Israyelɗe

¹ Səza daya net məyaŋgəlya, əpel na miziwe Asaf məyan də gaŋgara, gəlyanalva.

² Məzutaɗa na Israyel, aprəma. Is məzuke kirtin Yosef va gilewi, is məzusok aket kerubaɗe, awiɗi.

³ Arban gbogboŋ nok aba Efrayim, Benyamin, gəm Manase, ade əkõhgəmə.

⁴ Maŋgəlva, amilgəmə, appar horok akamə; vasna waməkõhu.

⁵ Yawe Maŋgəlva Məzuɓappakə, hã pay gbəŋgbar ədagədəv nok adawsan aka əkkam net ɗiy nok di?

⁶ Kəzimgitik də way məslahãn dit sini gəm kəzlər sitik sin maɗawak pa'ə.

⁷ Kəɗimək ka zəga narma mama net meggeŋgiɗim azani, məzuzelɗe nam tahəŋ əmasaŋ akamə.

⁸ Maŋgəlva Məzuɓappak, amilgəmə appar horok akamə; waməkõhu.

⁹ Megezlembirke kəpət sə Eziptə, kərɓehet ɗiy-ɗarə, kəmpaka

¹⁰ Kəkomək dələv səbani, ampak suwerin, aknəhək dəlva.

¹¹ Zeŋgilen asiritik mossorgoɗe gugriɗe, kiyvan tam muguguleɗ gugriɗe.

¹² Kiyvan tay pakpak hã a pehe, zlãlwãn hã a məlpa metiŋ.

¹³ Vimi kətiliket mambereɗ nan, məzutoŋgoŋ pak əhornən mokkoy nan di?

¹⁴ Vedem nawra an dəde, ndən əraygəni, Sluwɗe nawra ətaɗnəni.

¹⁵ Maŋgəlva Məzuɓappak, amndok ade kamə; azi horok sə disiŋ, awla. Azgə sləma aka guli na megezlembirkeŋka,

¹⁶ aka kiyvan kəmpə də vok dəzəŋ, gəm aka van məs kəkkpaŋgan gboŋgboŋ ka noko.

¹⁷ Awle yaŋ məɗi səni offo, mətawni; dəzaŋ sən əggbok horok aketi.

¹⁸ Aɗi vok aka ɗəf naka dəzəŋ noko, aka ɗəf titir məs kəkkpaŋgan gboŋgboŋ ka noko.

¹⁹ Vasna məzar faraɗa səzok ɓa; wakəmbəlgəmə, waməkkomoko.

²⁰ Yawe Maŋgəlva Məzuɓappak, amilgəmə, appar horok akamə; waməkõhu.