Gəlyaɗe 79 - Bible en Guidar

Ade abbah səmə, məskotuk hã afuŋ

1 Gəlyanalva na Asaf.

¹ Gəlyanalva na Asaf. Maŋgəlva, ɗiy-ɗar azlalbaynənək təki noko, arga'ãnənək gəla nok salala, gəm aɓzluwənək Yerusalem.

² Apsitinik ki gəbeyit gewleɗ nok ka wəzəm net mogdokɗe, sluwit ɗiy təstəs nok sit zəgeɗ derewti,

³ aggbo'inik mbel net va iŋkile tərwəsl ki Yerusalem, ɗəf nawndikit tay ɓa.

⁴ Məkkpaŋgək zəga na əra net meggeŋgiɗmə, ɗiy dəkaraŋ kiyəm tahəŋ ənəhaŋ wən azamə, tahəŋ əmasaŋ akamə.

⁵ Yawe, wədagədəv nok akam faɗəŋ aŋga adawbay man, də kotorok məzuzla va offo əŋdi?

⁶ Ake herɗe nok aket ɗiy-ɗar məs dəsənkun ɓa, aka va net milyeŋge məs awgagdakanən iya nok ɓa,

⁷ vi azəminik kirtin Yakob, araygənənək təki nani.

⁸ Kədaɗɗumet heslepeɗe en far akam ɓa. Agəm zuko, ula sasãh nok dəde abamə, vi məddakəm mənan diyɗa.

⁹ Maŋgəlva məkõhgəmə, abbah səm ammba gagdak na iya noko. Abitmə, avvuyon səm mambray nam vi gagdak na iya noko.

¹⁰ Vimi ɗiy-ɗar adawpeleŋ na: «Ngay Maŋgəlva net di di?» Kəta ɗiy-ɗar dəsənən ama haram na, əmpəlkiya tay ammbet mbel net gewleɗ nok məziti!

¹¹ Kəta wəhəm net məfərsəneɗ dəgap a sləmoko; vok zeki, appet ɗiy en namtaŋ dəssoŋ medereti.

¹² Amndagan sit meggeŋgiɗim wəra arokunəŋ gap təl buhul a mekreti Yawe.

¹³ Mənam ɗiy noko, gazlaŋ nawtaɗ noko, waməɗi kiyuk pay pakə, gəm wəbbalan sləma gagdak nok va sayit ɗiy amə' pakə.