Gəlyaɗe 33 - Bible en Guidar

Əɗi ki Maŋgəlva məzəməɗ zəga gəm məkohgən ɗəfa

¹ Məŋgəsl vaŋvəl sən ənnek addəv Yawe, mənokum en təstəsə! Əɗi kiya azet ɗiy en mekret bar adahə.

² Məgagdakan Yawe də gaŋgara; də gəzləŋtəndəŋ məs helegen kəlawə, məlvani!

³ Məyə sən gəlya meleketeni, məbay zəga nasmay lewlewi də ərga vokum.

⁴ Vi əpel na Yawe sarra yi, gəm wəza nan pak addəɗ ɓa.

⁵ Aŋgələk təstəs də wən sarra; dəlvafuŋ aknahək də moggon na Yawe.

⁶ Də wəpel na Yawe yi disiŋ agəɗə, də səmyã na mani azməɗ dula nan pakə.

⁷ Tay əkkelet iŋkile na pehe a təki taka ɓələ; tay əzi iŋkileɗ na pehe məhere a bəbər.

⁸ Dəlvafuŋ pak dəgeslne' sən Yawe, ɗiy negge pak dəkkereŋ abani:

⁹ Ndəni dəpeli, ya agəɗka; ndən ta' əɗi wən nani, aziwke.

¹⁰ Yawe azanək əɗɗum net ɗiy ɗaɗarɗe, azlzlaɓanək an na mekret ɗiyi.

¹¹ Əɗɗum na Yawe tay hã faɗə, an na makran tay va sayit ɗiy asani.

¹² Əzaɓi azet ɗiy en dəɗinən Yawe ka Maŋgəlva neti! Əzaɓi azet ɗiy en awel ka nawray vani!

¹³ Hã sə disiŋ Yawe adawzi harani, adawla ɗəf titir pakə.

¹⁴ Ha sə təki asan adawsəŋgləket ɗiy naka dəlvafuŋ baymeti,

¹⁵ ndən məzuzəməɗ mekret məstaka, ndən məzugohon wəza net pakə.

¹⁶ Məlĩ aska wəla vi dula diyɗa ɓa, məs makran awkõh vi əɓap nan diyɗa ɓa.

¹⁷ Aza əska wəla na, pələs uwawəni ɗarə, də kəkərtəh nan pak awkõhgən ɗəf ɓa.

¹⁸ Hara Yawe yaŋ aket məgeslne'eŋ sənəni, aket məzuganən moggon nani,

¹⁹ vi kawkõhgit səma əmta dəssoŋgən mederet gala mayã.

²⁰ Səva Yawe mədawgani: Ndəni məzəbbah namə gəm baray namə!

²¹ Vi ənnek na makram səzani, aka iya nan salala yi məzi haramə.

²² Kəta moggon nok dəsan akamə Yawe, vi zəga nawga nam avoki!