Gəlyaɗe 27 - Bible en Guidar

Aza Yawe na, in tat fendeŋgi

1 Səza Davit.

¹ Səza Davit. Yawe yi əkeɗeɗe nawa gəm əkõh nawa, sən nawa nədawgeslne' sən di? Yawe korgu na zeŋgilewi yi, geslne sən nawa adarmu di?

² An məs mambrayɗe azzoŋguk akaw kampərwa, məzuseɓɗe dit məzuzelɗe nawa, ndəɗaŋ dədaŋgbayãŋgə gəm əskotoŋgu.

³ An ngaɓa net məzəlpaŋ aziyək dibirgidik nan viwa, makraw azlah na ɓa. An əgay asilik də in zlaŋ, makraw azlah na ɓa.

⁴ Zəga taka nədassõh ava Yawe, anan nədawkayan pikpiki: ndəni əssa addəv gəla na Yawe pay nanziya egge naw pakə, vi kawla lelew na Yawe gəm kakgət aka gəla nani.

⁵ Vi waɗamaw a təki nawɗam zəga nan pay nawraya; waɗamaw a təki huzluguɗɗo na gizlirke nani, waziwgu aka milɓe.

⁶ Ya kakaŋ na, wəlaw tay ɗiliwwe aket məzuzelɗe naw məs dəkaraŋ kiywa. Wanəzaɓ-Maŋgəlva addəv gizlirke nani, əzaɓ-Maŋgəlva də wəɗɗəla, wanəyə gəlya, a nəlvan Yawe.

⁷ Yawe, aprəm wəlawa, agəɗ su mbəlembəle! In tat əŋzla vaŋvəla, azlan suwa!

⁸ Makraw tay aka an kəpel na: «Məkayawaŋka!» In tat əkkpaŋ aboko Yawe.

⁹ Kəɗaman su horok ɓa! Kərɓahan balam nok səzok nawda gədəv ɓa! Is məs kətərwa, kəzar səzaw ɓa, kəzgaw ɓa, Maŋgəlva nawkõh nawa.

¹⁰ An may əbba dət əmma azgawənka, Ya Yawe nan watafwa.

¹¹ Yawe arban su tive noko, adawgu aka tive sarra viyit ɗiy məzusekeɗwəni.

¹² Kəppaw avet məzuseɓɗe naw ɓa, vi muwaŋ wən asilyoŋguk akawa, əbayaŋ suwən gagayə.

¹³ Sessel wanula moggon na Yawe aka dələv net ɗiy medereti.

¹⁴ Aga Yawe; ampa təlko, asok zuko; aga Yawe.