Gəlyaɗe 102 - Bible en Guidar

Tatwãh gəm əɗɗum nawrəha

¹ Wəkkam na məzəmsãhã dawzəm sãhã, tay əɓuh man aba Yawe.

² Yawe, aprəm əkkam nawa, əhəm naw ammba əbbah dəgap azoko!

³ Kəɗaman su horok pay tatwãh naw ɓa. Apak sləmok kəlazawa. Pay nədawya na, agəm zuk azlan suwa.

⁴ Vi pay naw atərayək va enene, sleŋsleŋɗe naw tahəŋ əhhət va slayoffo.

⁵ Makraw tay əssar va kevile mətawən; hã in zəgət dawzəm way nawa.

⁶ Sən ənɗəs naw diyɗaŋki, kotorok asan nosnos aket sleŋsleŋɗe nawa.

⁷ Nəgilik va naway-eggedi na kapta-muyã, in tat va gbuzlu naka məskiya.

⁸ In tat ɗozloŋgo, in yakəŋ va bəŋga takərgən aka biyna.

⁹ Məzuzelɗe naw tahəŋ ərawən pay pakə, məzumasaŋ akaw tay əreygitin ɗiy də iya nawa.

¹⁰ Moŋglo nədawzəm ka waya, in əslahãn zəga nawsa naw dit sini.

¹¹ Sən ədagədəv nok dit herɗe noko is gəm əgəmu firiki.

¹² Pay naw tay ətoŋ va zeŋgile, in tat əŋkəla va kiste.

¹³ Ya nok na Yawe, məlĩ kənan hã faɗə, kaɗɗumoni wən nok aza sayit ɗiy pakə.

¹⁴ Nok wakəsili, wakula sasãh Siyon, vi pay agapək nawla sasãhni: vaski, pay agapka!

¹⁵ Vi gewleɗ nok tay ənnekeŋ dit gərmeŋge nani, tay ulanən sasãh burɗuk nani.

¹⁶ Ɗiy na guw wageslne'eŋ sənən iya na Yawe, gəm milyeŋge naka dəlvafuŋ pak tam sən gagdak noko,

¹⁷ Pay Yawe adarkan Siyon, warban zən addəv gagdak nani,

¹⁸ pay adakkpaŋ aza wəkkam net ɗiy məppətti, azelen na wəkkam net ɓa.

¹⁹ Wən nan dəsan məverin sən sayit ɗiy dədazzani, ɗiy məzəmiɗit dəɗinəngən ki Yawe.

²⁰ Yawe aɓe'ik sə təki salala nan sə disiŋ; awəl aka dəlvafuŋ,

²¹ kaprəm ənɗəs net məfərsəneɗi kawpil en mətawwən namta aketi.

²² Kabbalan iya na Yawe a Siyon gəm wəɗi kiyən a Yerusalem,

²³ pay ɗiy adakkalaŋ sap dit milyeŋge kawgəɗ sən wəza sən Yawe.

²⁴ Addakanək gbogboŋ naw səka tive; aduduɗukonək pay nawa.

²⁵ Nəmna: Maŋgəlva nawa Kəgəmu addəv wəɗak na pay naw ɓa! Nok əzva nok hã faɗi yi.

²⁶ Is kəɗi dəlvafuŋ far lahəŋka, disiŋ pak wəza na voki yi.

²⁷ Net wazaŋgə, nok wakəsoko. Net waŋgosoŋ pak va lukutu, wakəddəɗet va lukutu, waddəɗaŋgə.

²⁸ Nok is tat va lahəŋka, əzva nok agrak na ɓa.

²⁹ Kirtit gewleɗ nok wassoŋ faɗə, mazlãlwẽt wasan aboko.