Ezra 8 - Bible en Guidar

Ɗiy en dəddoŋ də Ezra

¹ Migil gəla en dəzzoŋ də in sə Babilon aka pay na məlĩ Artazerses yeŋ də mazlalwẽti:

² Səret kirtin Pinhas: Gersom; səret kirtin Itamar: Daniyel; səret kirtin Davit: Hattus;

³ səret kirtin Sekaniya; səret kirtin Pareyos: Zakarya məŋɗan dit zel səkat də kaklaw sle'i.

⁴ Səret kirtin Pahat-Mo'ab: Elyeho'enay, wətən Zeraya, gəm zel səkat sula dəndəni.

⁵ Səret kirtin Sekaniya, wətən Yahaziyel, dit zel səkat hoku dəndəni.

⁶ Gəm səret kirtin Adin: Ebed wətən Yonatan, gəm zel kaklaw sle' dəndəni.

⁷ Gəm səret kirtin Elam: Yesaya wətən Ataliya, dəndən na zel kaklaw buhul.

⁸ Gəm səret kirtin Sefatiya: Zebadiya wətən Mikayel, dəndən na zel kaklaw dodopoɗo.

⁹ Səret kirtin Yo'ab: Obadya wətən Yehiyel dəndən na zel səkat sula də kəlaw kiyit dodopoɗo.

¹⁰ Gəm səret kirtin.: Selomit, wətən Yosifiya dəndən na zel səkat də kaklaw sləre.

¹¹ Səret kirtin Bebay: Zakarya wətən Bebay, gəm dəndən na zel kaklaw sula kiyit dodopoɗo.

¹² Kirtin Azgad: Yohanan, wətən Ha-Katan, dəndən na zel səkat də kəlaw.

¹³ Gəm kirtin Adonikam: iya net en dərɓedərɓe yeŋki: Elifelet, Yehiyel də Semaya, dənɗaŋ na zel kaklaw sləre.

¹⁴ Gəm kirtin Bigway: Utay də Zakur, gəm dəndən na zel kaklaw buhul.

Ezra tay əzaɓan zən nawmbat malaka kəla Yerusalem

¹⁵ In kakelgit ama məlpa məzutoŋ kəla Ahawa, mətehək adak əvoŋ hoku. In səŋglək səŋgləkgit ɗiy dit məsdəlveŋge na wətən mə Levi tay taka dayday eret ɓa.

¹⁶ Yaŋ nəslin ɗiy gugriɗe, Eli'ezer, Ariyel, Semaya, Elnatan, də Yarib, Elnatan, Natan, Zakarya, Mesulam, dit məzuyegetin ɗiy aka mahenziŋ, Yoyarib də Elnatan;

¹⁷ də əɗi sit wən nan dəddoŋgən aza Iddo, daya naka va na Kasifya; nənah sitik an adawnahaŋ sənən Iddo dit milmiŋgiɗni, məɗɗaŋ wəza naka va na Kasifya, vi kawki səm məɗɗaŋ wəza ammba Gəla na Maŋgəlva namə.

¹⁸ Adan va moggon na Maŋgəlva nam tay də mənamə, akiyaŋ səmənək ɗəf məs maɗɗulan səret kirtin Mahli, wətən Levi, wətən Israyel, iya nan na Serebiya, kirtin dit milmiŋgiɗin pak tahəŋ kəlaw kiyit dodopoɗo,

¹⁹ Vaska'e Hasabiya də Yesaya, taka səret kirtin Merari, milmiŋgiɗin dit kirtit pak tahəŋ kaklaw sula;

²⁰ sə weleŋgit məɗɗaŋ wəza məs Davit dit ɗiy gugriɗ aɗiyaŋ ammba wəza net mə Leviɗe, məweli məɗɗaŋ wəza səkat sula də kaklaw sula, də iya net ngohsa ngohsa pakə.

²¹ Ama məlpa na Ahawa na, nəpelik wən naɗɗa meme kawvoŋgən kiyəm aba Maŋgəlva namə, vi dəkol səmgən tive nawmbat məza zluŋgbu' zluŋgbu' ɓa, mənam dit kirtəmə, gəm zəgeɗ namə.

²² Yaŋ wil aduwən dəssohõn məlĩ, dəpsəmgən məzəlpaŋ məŋkoroŋ pilseŋge dəgəməŋgən aka tive dawmbata; vi mənah sənək məlĩ na: «Va moggon na Maŋgəlva nam tay aket ɗiy dədawkayanən pakə; wədagədəv nan tay aket ɗiy en məzəppanəni.»

²³ Məgəɗ meme, məssohõn moggon na Maŋgəlva nam aka wən nani, aprəm səməka.

²⁴ Siske nəgəm ɗiy gugriɗ net məsdəlveŋge temme kəlaw kiyit sula də Serebiya, Hasabiya dit milmiŋgiɗit kəlaw dənɗaŋgə.

²⁵ Nəsle sitik təbəz babar də meleŋge gəm zəgeɗ meɓɓet məgimit ammba gəla na Maŋgəlva nam en məlĩ dit məzusəɓaŋ sənəni, deyeɗe nani gəm mə Israyelɗe dəssoŋ das akiyaŋ pakə.

²⁶ Nəsle sit ambra veti, kilo gabal kaklaw sula na təbəz babara, kilo gabal hoku net zəgeɗ na təbəz babara, kilo gabal hoku na meleŋge,

²⁷ ŋgefleŋɗe na meleŋge kaklaw sula, mesteɓeɗ na sləma sula na təbəz pepreŋ məzəwiɗ va meleŋge'e.

²⁸ Sissiŋ nənah siti: «Məɗikumi aka wəza na Yawe, zəgeɗiŋ tahəŋ vi wəza na Maŋgəlva, təbəz babar gəm meleŋge, əvəl də makra paparəŋ sən Yawe, Maŋgəlva net Efigiɗkumi;

²⁹ Məge, məzlgə sləma gap pay kədawsletin abet ɗiy gugriɗ net məsdəlveŋge, mə Leviɗe gəm abet migil gəleɗe na Israyel, a Yerusalem, addəvit giziŋɗe naddəv Gəla metiŋ na Yawe.»

³⁰ Yaŋ məsdəlveŋge dit mə Leviɗe agəmənək wən na təbəz babar də meleŋge gəm zəgeɗ məslet vi kawkiyit a Yerusalem, addəv Gəla na Maŋgəlva namə.

Əɗɗa malaka gəm əgap a Yerusalem

³¹ Misilik səma məlpa na Ahawa də əvoŋ kəlaw kiyən sula na təla maddaabəŋ kawmbat a Yerusalem. Va Maŋgəlva nam tay akamə, aka tive na, amõhmək səvet məzuzelɗe nam dit məzumohomən dəvoŋgoŋ səmən tive.

³² Məgapək a Yerusalem, mənam fefet pay hoku.

³³ Pay mopoɗoni, məsla təbəz babara, meleŋge dit zəgeɗ naddəv Gəla na Maŋgəlva nam ammba va məsdələv Meremot wətən Uriya, məs Ele'azar wətən Pinhas assan dəndəni, a meŋgeveti mə Leviɗe Yozabad, wətən Yosuwa, gəm Nodiya wətən Binnuwi.

³⁴ Əŋɗa net, gagdak pak tay adaka, gagdak net sap pak məverin ta'ə. Dasək na,

³⁵ en mərmet dəmilyoŋ sə təki məket ka balam, adaŋgək əvəl nawzla kurmbuɗuk sən Maŋgəlva na Israyel, dit medgeɗgeɗe kəlaw kiyit sula ammbet mə Israyelɗe pakə, ndargenyeɗ kaklaw vaytak kiyit sləre, kirit timeŋgiɗ mezeŋgleket kaklaw buhulu kiyit buhul, porsokɗe ka nawzaɓ-Maŋgəlva navvuyon mambray kəlaw kiyit sula: məhhətit pak sən Yawe.

³⁶ Sissiŋ agapgənən an məlĩ aynə sit ɗiy gugriɗ naba məlyã, sit guvernerɗe na dəggar ki Efrat, məs dərmanən vet ɗiy, də Gəla na Maŋgəlva.