Ezra 6 - Bible en Guidar

Wəzlan na məlĩ Dariyus

¹ Yaŋ məlĩ Dariyus, aɗi dəkayanəngən wən an dətoŋ addəvit ɗerewelɗe məɗiyit a Babilon adak addəv gəla nawzaɓan arya;

² a Ekbatan, walaŋgəla net gulomɗe akki va dələv na Medə, mərəh ɗerewel məktəmən məs məverin addəvən na: Ɗerewel net wənɗe en dətoŋgoŋgu.

³ «Wəzva maddaabəŋ na məlĩ Sirus, məlĩ Sirus aɗiyik wən nan na: Gəla na Maŋgəlva a Yerusalem. Kamnday ərkan Gəla van a təki adaɗɗaŋ matuya, a təki gabba gəla asan lahəŋka: wəɓay nan metir kaklaw hoku, slosloprok nan kaklaw hoku.

⁴ Gərmeŋɗe məslmet wədor hoku, dədəkeɗ meleketet, wədor taka. Gəla wəzaɓ na məlĩ dədawfaɗni.

⁵ Mbəksa asna, zəgeɗ na meleŋge dit en na təbəz babar naddəv gəla na Maŋgəlva, məs Nabukodonozor andə səddəv Gəla na Maŋgəlva sə Yerusalem ake a Babilon, kamndegetiŋ dəssoŋgən a gəlet addəv gəla na Maŋgəlva a Yerusalem. Kəɗigin addəv Gəla na Maŋgəlva.»

⁶ Kakaŋ na, Tatnay guverner na dəggar ki Efrat, Setar-Boznay dit geleŋgiɗti, ɗiy na dəggar ki Efrat a Afarsak na: Məzar səza wənəska.

⁷ Məppan wəza na Gəla na Maŋgəlvaŋ dədawə; guverner net mə Yudeɗ, dit ɗiy məsɓet net mə Yudeɗ, dərkanən gəla a gəlani.

⁸ An kədaɗɗaŋ dit ɗiy məsɓet net mə Yudeɗ nəɗi sukum wən nan addəv ərka Gəla na Maŋgəlvaŋ yaŋka: məfaɗ wəza net ɗiyis də arya na məlĩ, an dəde səza nzalaka mətafən sə dəggar ki Efrat, məza sosoksa ɓa.

⁹ An nawtər wəraya, kirtit wasliɗe mezeŋgleketi, ndargeyẽɗi, kirtit timeŋgiɗ mezeŋgleket nahhət ka əvəl nawzla kurmbuɗuk sən Maŋgəlva na disiŋ; haykəmari, bətuwa, iŋkile na megezlembirke gəm mẽlẽ, va məsdəlveŋge na Yerusalem adarbanəni, kapsit va təki addaŋgə, məza əggbi' ɓa.

¹⁰ Vi dəkiyaŋgən əvəl naffeten makra Maŋgəlva na disiŋ, gəm dəkkamaŋgən ammba məlĩ dit kirtini.

¹¹ Wən naw an nəɗi aka ɗəf məs dəggar ki an nəpeləŋ yaŋka: kaptuwi dədəka na gəla nani, kakkpa'ən akan kawziwgəni; mbəksa asna, kakkpaŋgani gəla nan ka dagərgiya ɗigiti.

¹² Kəta Maŋgəlva məs dəɗi iya nan adakəŋ, dəzga' sən məlĩ an dəɗɗumu awaniɓa ɗiy en dəɗɗumoŋ naggar ki wən an nəpeləŋ, kaɓzlu Gəla na Maŋgəlva na Yerusalem əŋka. In Dariyus, nəɗi wən nan dəgəɗgən va nənahəŋ təstəsə!

¹³ Yaŋ guverner na dəgar ki Efrat Tatnay, də Setar-Boznay gəm geleŋgiɗit aɗɗanək va məlĩ Dariyus aɗi wən nan dekdeki.

Əzləra nawkol ma gəla na Maŋgəlva mərkani

¹⁴ Ɗiy məsɓet net mə Yudeɗ azbanənək wərka gəlaŋ məza əggbi' ɓa, va məskəleŋ Haggay də Zakarya wətən Iddo anahaŋgə; agrakənək ərka Gəlaŋ va Maŋgəlva na Israyel aɗi wən nani, gəm va milyeŋge na Persiya, Sirus, Dariyus gəm Artazerses aɗi sitin wən nani.

¹⁵ Məgrak ərka Gəlaŋ də əvoŋ mohoko'ən na təla na Adar, aka əzva masləre'e na Dariyus aka məlĩ yi.

¹⁶ Mə Israyelɗe, məsdəlveŋge, mə leviɗe, dit madembirgit ɗiy məket aka balam pak, akolnənək ma Gəla na Maŋgəlva də zit waryak waryakə.

¹⁷ Vi nawkol ma gəla na Maŋgəlva na, akiyaŋgək wasliɗe səkatə, ndargenyeɗ səkat sula, kirit timeŋgiɗ səkat poɗo, vi navvuyon mambray net mə Israyelɗe dəwən neti akiyaŋgək porsokɗe kəlaw kiyit sula, aza əɗɗa na ma mahəlfa na Israyel.

¹⁸ Aɗininik məsdəlveŋge aza galaziti dit mə leviɗe aza gaɗekti vi wəza na Maŋgəlva a Yerusalem, va məverin addəv ɗerewel na Moyis.

Mə Yudeɗ tay əɗɗanən wəzləra na Pak

¹⁹ Ɗiy en dəmndoŋ səka balamə, aɗɗaŋgək wəzləra na Pak, də wəvoŋ makəlaw kiyən poɗo na təla maddaabəŋ;

²⁰ Adan məsdəlveŋge dit mə leviɗe pak, abburun ziti, heslepe tay azet dəwənnet ɓa: atawənək wəla ndargayã na wəzləra na Pak ammbet ɗiy en dəzzoŋ səka balam pak, ammbet milmiŋgiɗit en məsdəlveŋge gəm ammbet anet zək neti.

²¹ Mə Israyelɗe dəzzoŋ səka balam, azəmaŋgək dit ɗiy en na maŋgevet pakə, məs duɗakaŋ də heslepe net ɗiy en ɗar naka dələv adaka vi kawkayan Yawe Maŋgəlva na Israyel.

²² Aɗɗaŋgək wəzləra na peŋ məza wuɗo ɓa, də wənnek pay buhulu, vi Yawe, annekenək zit də wəkkpaŋgan makra məlĩ na Asiri kəlazeti, vi kasɓan vet aka wəza na Gəla na Maŋgəlva, Maŋgəlva na Israyel.