Ɗerewel nat Ester Gərek 3_1 - Bible en Guidar

Wən məziwgin nawzet mə Yudeɗi

¹⁴ An məverin naddəv ɗerewel van yaŋka: «MƏLĨ Metiŋ Ahasuwerus sit deyeɗe na wəza gəm deyeɗe nabet naka kivadələv səkat də kaklaw sula kiyit buhul təŋ sə Indiya hã gap a Etiyopi, dəver aŋkəŋka:

¹⁵ In məzuzəm məlĩ aket mahəlfaɗe diyɗa, mammba dələv dəwən nan ammba vawi. Gagdak naw awkaɓgu ɓa; maw aka əzəm məlĩ pay pak də ulasahã gəm də moggoni. Maw aka ɗiy naka dələv naw dəssoŋgən addəv zazay pay pakə, kawkol haret ɗiy naka dələv nawa, ɗiy dəbbalaŋgən kiyit foŋgo səket meŋge hã aket meŋge, kawɗi zazay məs ɗiy pak adawgayaŋ ammbani.

¹⁶ Gala nəssohon met məzusəɓaŋ suwən vi kawsənən na mbarmbari əgap aza an mədawkayan vanəsdi na, ɗəf məs dərban zən sə walaŋgəm sən maɗɗula nani, məs dədappansu kizən pay pakə, dədawgəɗsu moggon məza meŋge nan ɓa, məs dərəh kiwəza nassan maslay na məlyã, ana Haman,

¹⁷ arbansəmək na, aweleŋgit mahəlfaɗe dəppassaŋ ammba dələv pakəŋka, zeŋvit ɗiy tay mbərayən dəslahə, də mahenziŋ net temme səzan net ɗiy meɓɓetiŋki. Ɗiy vet pay pak əggaraŋ ki an məlĩ aɗiyə, vi məlĩ mədawzəm addəv əslere gəm təstəs məza nawpel akan ɓaŋ adawziw ɓa.

¹⁸ Nulak na mahəlfa vanəski kaka' məzuzelet ɗiy meɓɓeti; tay əɗoh zən də əzbet mahenziŋɗe məs ɗiy dəsinin ɓa, məɓoŋgən aka an nədaɗɗa pakə, as pak vi dələv adawrəh əziw ɓa.

¹⁹ Sən aski məɗi wən nawzet məza dəwel ɓa, Haman warbet sukum baymet də əverin dəveri, ndəni məzudawgən dəlva, afəm masula'ayi. Meseŋgiɗit dəbeynin də masalam sap dit gili gəm kirni, məza də ulasahã mãy əppa ɓa. Wən van dəgəɗ addəv wəzva vanəŋ kpakə, də əvoŋ makəlaw kiyən poɗo na təla makəlaw kiyən sulani, məs adawyaŋ na təla na Adar,

²⁰ ka ɗiy vetis məs dədawkayaŋ əgay də mənam pay pakəŋ dəbətaŋgən a təki net mimtit pay təttaka, vasna abe na, atakmən na əmpa dədawgən dələv də tiveni gəm də zazay ɓa.»