Ɗerewel nat Ester Gərek 3 - Bible en Guidar

Haman tay əzəm kiyit mə Yudeɗi ( 3:1—5:14 ) Əgay a walaŋ Haman də Mardokay

¹ Sədərɓeget wənɗeski, məlĩ Ahasuwerus aɗiyək ki Haman mə Bugayos, wətən Hammedata. Apsənək gəla wəza metiŋgin dayki net geleŋgiɗin pakə.

² Ɗiy na məlĩ pak əgdukoŋ abani, va məlĩ aɗi wən nani. Ya Mardokay agduk aba Haman van ɓa.

³ Yaŋ ɗiy na məlĩ adawnah sənən Mardokay na: «Vimi kazga sləma aka an məlĩ anah ɓa kan di?»

⁴ Pay pak ndəɗaŋ əpeleŋ sənən aka wən vani, ya aprəm met ɓa. Yaŋ aprəman sənək Haman na Mardokay awɓe' sən an Məlĩ anah ɓa. Mardokay arban sitik na mə Yuda yi.

⁵ Adan Haman arəh na, gesiŋ Mardokay awŋger əɓe'sən ɓa, gədəvən adək sawɓa.

⁶ Aynanək nawzet mə yudeɗ naka dələv na Ahasuwerus gərakə.

⁷ Aka təla makəlaw kiyən sulan na Ahasuwerus aka məlyã, Haman agəɗək vẽpəlwa nawrəh əvoŋgo gəm təla məs adawɓap əzan mahəlfa na Mardokay pay taka. Vẽpəlwa van bət aka əvoŋ makəlaw kiyən poɗon na təla na Adar.

Haman tay əzaɓan wən nawzet mə Yudeɗi

⁸ Yaŋ Haman aɓsən məlĩ Ahasuwerus na: «Mahəlfa net ɗiy tay də gəla a teki temtem aka dələv nokuŋka. Mahenziŋ net temme yi səza an net mahəlfaɗe pakə, ɗiy vet azlgaŋ sləma aket mahenziŋɗe na məlĩ ɓa. Dəslə məlĩ əppet fendeŋ ɓa.

⁹ An məlĩ atafəka, dərma wən nan a makran nawbeyti. Naw na wanəɗi təbəz babar kilo gabal səkat hoku aka ərəh na məlyã.»

¹⁰ Yaŋ məlĩ apprət ndama səka vani, apsən Haman vi dəɗigən va tompoŋ nan aket ɗerewelɗe na wən nawzet mə yudeɗi.

¹¹ Məlĩ aɓsən Haman na: «Appan təbəz babar noko, agəɗ sit ɗiy vet va mokrok aŋgələ.»

¹² Aka təla maddaabəŋ də əvoŋ kəlaw kiyən hoku nani, məkkelet məzuverɗe na məlyã; va Haman anahə vas avereŋ də iya na məlĩ Ahasuwerus sit deyeɗe net məzəlpaŋgə, gəm sit deyeɗe na kivadələv va assoŋ takataka səkat də kaklaw sula kiyit buhuliŋki, gəm sit deyeɗe net mahəlfaɗe en də gəla adak pak, təŋ sə Indiya hã gap a Etiyopi əzban aza ma neti.

¹³ Məslinti maslənɗe dəkeningin kakara aka dələv na Ahasuwerus təslə vi kawzan mahəlfa net mə Yudeɗ aka pay taka na təla makəlawkiyən sulani, va wənəh na təla na Adar, gəm kappohõn arya neti.