Ɗerewel nat Ester Gərek 2 - Bible en Guidar

Ester tat əkkpaŋ ma'ãykə

¹ Səɓɓet wənɗeski, səza herɗe nan affeteŋgi, məlĩ awya sləmat Astin kpe əmpa ɓa, an təpelsəni gəm va atawwən akat pak tay akan ɗeŋge.

² Yas ɗiy gugriɗ naban aɓɗaŋ kanna: «Məkaysəm kirin gorɗeŋge ŋgbuɓo-ŋgbuɓo lelewɗe ara ɗəfa sən məlyã.

³ Məlĩ dəwel ɗiy aka kivadələv nan temtemi, dəweleŋgən gorɗeŋge lelewɗe kawkiyit a walaŋgəla na Susa, a bezler net gil na məlyã. Kappet ammba va mətawkoyom na məlĩ an məgə gili. Kapsit mẽl moggon napaya gəm zəgeɗ temtem nawzaɓan zə ɗəfa.

⁴ Guluk akən təgem hara məlyã, ndəttə nawzəm məlĩ a gəlat Astin.» Wən van adak zə məlyã, yaŋ aɗɗa vaska.

⁵ Mə Yuda tay a walaŋgəla na Susa, adawyaŋ na Mardokay, wətən Yayir wət Simey wətən Kis səddəv mahəlfa na Benyamin;

⁶ ɗəf məs məsimgin laheŋkiyi, sə Yerusalem ade, Nabukodonozor məlĩ na Babilon dəsimgin lahəŋka.

⁷ Tay əzgəl waŋkə, wətən Madyan Aminadab; Iya nat na Ester. Migilət dəmtaŋgə yaŋ Mardokay azgələt təsatgən ka guluk nani. Waŋ vat lalawəktə aza ula.

⁸ Səza mətəlma aka wən məs məlĩ aɗiyə, məkkeleti kirin gorɗeŋge diyɗa a walaŋgəla-metiŋ na Susa, ammba va Gay. Yaŋ kan məkət Ester sən Gay məga net gili.

⁹ Waŋ vat təgəmək harani, tərahək kinenek səvani. Agəmək zən əpsət an dəslə aza əzaɓan zəta gəm aza əzəm nata, gəm əmpa apsət məɗɗaŋ sətən wəza buhul məwelit səret gil məzəɗɗaŋ wəza ana məlĩ da. Aɗiyək kiyət moggon moggon dit zəbayɗe nat vet pak a təki nawzi gil na məlĩ vani.

¹⁰ Ester tərban mahəlfa nat ɓa, tərban dələv nat ɓa. Vi Mardokay atakək mat darbani.

¹¹ Pay pak Mardokay tay təraktərak a daŋgla net gil veti, əga an dəɗɗa akat Ester.

¹² Dərɓaga wəzva taka addəv gəla net gili, gorɗeŋge vet əddoŋ aza məlyã. Vaŋki pay nawzaɓan zit vani. Təla sləre adaɗɗaŋ aka əppay mẽl na mir, təla sləre meɓɓet aket mẽlɗe nawiɗgin gəm nakkuɗon zit gili.

¹³ Siske na goruk pak əmbat aza məlyã. Məlĩ van əpsən tive sən ɗəf nawkət səddəv gəla net gil hã gap a giziŋ na məlyã.

¹⁴ Də moskoyo ndət əddat adaka, də pummo ndət əmbat addəv gəla net gil masula'ən, məs dəsan ammba va Gay mətawkoyom na məlyã, məga ana məlĩ da. Tamndat aza məlĩ əmpa an iya məyət ɓaɓa.

¹⁵ Səza Ester wətən Aminadab madya Mardokay təgrak əvoŋ mətawən nawzaɓan zət ka nadda aza məlyã, təɓoŋ sən əsəɓ təttaka an mətawkoyom məga net gil nak aɗi sət wən nan ɓa. Ester təgəmək kinenek səvet ɗiy en dədawləten pak lahə.

¹⁶ Əzva ma buhulon na Ahasuwerus aka məlyã, aka təla makəlaw kiyən sulan adawyaŋ na Adar, Ester mbat aza məlyã.

¹⁷ Məlĩ aŋglutək Ester, səret gorɗeŋge vet pak ndəttə tərah kinenek səvani. Yaŋ kan aɗup sət kulpupu nat ma'ãy nan akata.

¹⁸ Səbbərən adə waynabaya na əvoŋ buhul, aye beyneŋgiɗin beymeti gəm ɗiy gugriɗ naka wəza nan beymeti, aɗɗa wəzləra nawɓelət Ester. Aprətanək nzalaka səket ɗiy naka dələv nan beymeti.

¹⁹ Mardokay van ɗəf məgəɗ wəza ana məlĩ da yi.

²⁰ Ester tərban dələv nat ɓa. Mardokay aɗi sətək wən aŋka: Əgeslne' sən, Maŋgəlva gəm əzbet mahenziŋɗe nan va gala tədawsat anan da. Ester təddəɗan ənziya nat ɓa.

Mardokay arahək wən mətuvurən

²¹ Mətawaŋkoyomɗe sula en deyeɗe net məgaŋ məlĩ adaŋgək gədəv aka wən na məpeŋgən Mardokay aka wəza metiŋgini, yaŋ adawkay əbayən məlĩ Ahasuwerus.

²² Mardokay aprəməka, ndən alabara van dəgargən sət ma'ãy Ester, təprəmansən məlĩ va mətuvur wəna.

²³ Məlĩ assohõnək met mətawaŋkoyomɗe, siske məlewti. Siske aɗi wən nan dəveringin dəver dəsangən addəv gəla net ɗerewelɗe na məlĩ vi kaɗɗumet wəzeɗe mogget məs Mardokay agəɗə.