Ɗerewel nat Ester Gərek 1_2 - Bible en Guidar

Waynabaya na məlĩ Ahasuwerus

¹⁸ Wənəs agəɗ na, aka pay na Ahasuwerus, dəzəm məlĩ aket kivet dəlveŋge səkat də kaklaw sula kiyit buhul hã gap a Indiya.

¹⁹ Pay dəpaska, aka məlĩ Ahasuwerus ade əsan aka mazaŋga na məlĩ nan na walaŋgəla-metiŋ na Susa.

²⁰ Əzva mohokon nan aka məlĩ adə waynabaya sit beyneŋgiɗin, sit ɗiy temtem pakə, sit ɗiy na sləma naret mə Persəɗe dit mə Medeɗi, gəm sit deyeɗe na kivadələv nan temtemi.

²¹ Agəɗək təla sləre aka ərban sit ariya naka dələv nani, anansit nenek na arya vani.

²² Aza əbay ma wəzləra vani, məlĩ adə waynabaya na əvoŋ sləre sit ɗiy-ɗar na walaŋgəla-metiŋ a meŋgle na məlĩ da.

²³ Məbaysəni gawla sən meŋgle van də ŋgərayã gəm gabaga na gaɗmay kukuɗo aket hellegeɗ na ŋgərayã, pepreŋɗe, mətokun azet ndemeɗ na meleŋge gəm na təbəz babar aket dədəkeɗ net ɗoreɗ temtemi; zəgeɗ tahəŋ nawvoŋ aket məɗɗet də meleŋge gəm də təbəz babar aka dalas net girmeŋge manzakalyakalya, na gəlet horzlozloŋɗe gəm na ɗoro; gəm əmpa zəgeɗ nazzəɗ aka ɗəf muhẽt dit zəgeɗ məzuwiɗeŋ ɗeslɗesli, məɓəsl man tərwəslə dit zəgeɗ va uffuyeɗ pepreŋɗe zlahzlahə.

²⁴ Hiliŋgiɗ net iŋkile tahəŋ na meleŋge gəm na təbəz babara, taka səret na, məbay sən gawla dit girmeŋge na sləma, əlbəh nan waday ki əlbəh na meleŋge kilo gabal ɓəɓayə. Mbazla tatrah keslkesl səza an nawsa na məlyã.

²⁵ Waynabaya vanəs tay də meŋge ɓa, vas məlĩ aŋgələ. Anah sitik muɗakaŋ way dəzbanəngən əŋgla nani gəm əŋgla net melekeɗ nani.

²⁶ Ma'ayək Astin nat pak tədək waynabaya ana məlĩ da van sit gili, a təki məlĩ Ahasuwerus van asani.

Ki tatrãh nat məlyaŋgək Astine

²⁷ Aka əvoŋ mabuhulon na, zə məlĩ annekke; yaŋ aɓsit mãy Haman, Bazan, Tara, Boraze, Zatolta, Abataza gəm Taraba mətawaŋkoyom buhul məɗɗaŋ wəza aban nek na,

²⁸ dəkitən ma'ayək abani, vi kawɗiyət aka mazaŋga na məlyã, kawɗup sət kulpup na məlyã, karban lewlew nat sit ɗiy gugriɗ na wəza nani gəm sit melekeɗ məs ayə səket dəlveŋge temtemi, vi moggottə sawɓa.

²⁹ Yaŋ ma'ãy Astin təɓoŋ dazbet mətawaŋkoyom neki. Gədəv məlĩ adəka, herɗe agəmnənka.

³⁰ Aɓsit beyneŋgiɗin na: «Vas Astin təzlan kana? Asna! Mula wən nani, mətaw an naɗɗa va mahenziŋ anahə.»

³¹ Yaŋ mãy Arkesayos, Sarsatayos gəm Malese'ar addereŋ azani. Ɗiy gugriɗ na Persiya gəm na Mediya əŋgə. A maŋgava məlĩ əŋgə go'o, ndəɗaŋ dəssoŋ abe a maŋgava məlyã.

³² Arbansənənək an dəslə də mahenziŋ kaɗɗa sət ma'ãy Astin, adan təzban an məlĩ aɗi də met mətawaŋkoyom ɓaŋka.

³³ Mukayos atəŋgək əpel aba məlĩ dit ɗiy gugriɗe amna: «Ana məlĩ ma'ãy Astin təzelen kaka' ɓa, anet ɗiy gugriɗe baymeti gəm deyeɗe na kivadələv na məlĩ baymeti yi.

³⁴ Məlĩ aprəman sitik əpel nat ma'ãykə mãy va təzlan aman pakə. Vaska'e təzlan ama məlĩ Ahasuwerus,

³⁵ vasna, gil meɓɓet net ɗiy gugriɗ na Persiya gəm na Mediya baymet pakə, pay aprəməm əzlan nat ama məlĩ yəska, wadanən kiyit əɗɗa zev zəga narba wiləs sit zilŋgitti.

³⁶ An məlĩ watafa, dəɗi mahenziŋ nani dəsangən məverin aret mahenziŋɗe na Mediya gəm na Persiya. Tive mbərən adawsan ɓa. Ma'ãyək vat tədadder ɗah aza məlĩ əmpa ɓa, dəpsətəgən iya nat Ma'ãyəŋ sət guluk məday kiyta.

³⁷ Mahenziŋ məs məlĩ aɗi van dəprəm təki pakə, ɗiy dəɗɗaŋ wəza dəndən aka dələv nani. Vasna, gil baymet wazgaŋ sləma aket zel neti, dəsan məssãhã awani ɓa məs arya pakə.»

³⁸ Əɗɗum van annekik zə məlyã gəm zit ɗiy gugriɗe. Məlĩ van əpel na Mukayos azbə.

³⁹ Aslənək ɗerewelɗe aka dələv baymani, əzban aza kivadələv pak də ma an nani, ka ɗiy pak dəgeslne'eŋgən enetda.