Ɗerewel nat Ester Gərek 1_1 - Bible en Guidar

Ester təkkpaŋgək ma'ãykə ( 1:1—2:23 ) Issine na Mardokay

¹ Aka wəzva masula'ən na Ahasuwerus Metiŋ aka məlyã, də wəsɓəta maddaabəŋ na təla na Nisan, yaŋ Mardokay assini. Nan van wətən Zayros iyi, dəhən Semeyas wətən Kisayas səddəv mahəlfa na Benyamin,

² Mardokay mə Ibriɗ iyi dəsan də gəla a Susa; ɗəf tektekiyi məgəɗ wəza ana məlyã da.

³ Tay aret ɗiy məs Nabukodonozor məlĩ na Babilon asimgit sə Yerusalem sap də Yekoniyas məlĩ na Yuda.

⁴ Mardokay assinik vaŋka: vaŋvəl agəɗək diyɗa də gugoyo, əhãy na buna gəm əɓla na dəlva; gəggrəŋ agəɗək diyɗa aka dəlva.

⁵ Zəgeɗ derewit agulyoŋguk sula əkayaŋ əzlah sən ziti, əhəmaŋ dayadaya;

⁶ əprəm əhəm net na, ɗiy nammba dələv pak əzaɓanən zit nalpa, vi kawgay dit ɗiy en təstəsə.

⁷ Pay na guzli tiŋgbizlimi, na geslne də əɗəka, na əsərma də gəgrəŋ diyɗa aka dəlvafuŋgi.

⁸ Ɗiy təstəs də wən net assoŋguk gərəŋgə, geslne armek sən əray neti; tay əslanən zit namta.

⁹ Ndəɗaŋ əkkaman Maŋgəlva. Ya kawzlan ama əkkam vanəs na, məlpa metiŋ əgilyen dit iŋkile addəvən diyɗa əzzan sə təki feŋge.

¹⁰ Pay agilke, təki addaŋka, ɗiy məddekit arahaŋgək ɓəɓəla, yaŋ adawbeynin məzukaɓaŋ aket neki.

¹¹ Mardokay məs dula an Maŋgəlva aynan naɗɗa addəv əssine nani, səza afɗahə, ndən hurruɓ əɗɗum akan hã dəfəɗ tiri, agayək kaprəm gabbani.

Mardokay tay əppasan wən mətuvurun sən məlyã

¹² Mardokay kan ɗew əffet a məŋgle na məlyã, mãy Gabata də Tarra, sulegit pak mətawaŋkoyom məgaŋ meŋgle.

¹³ Yaŋ aprim əzgaŋ meŋ awalaŋ ziti, ndən zən sek əziyən aza əsən gabba meŋ neti. Arəh na wən adawtuvuroŋ nawbay məlĩ Ahasuwerus. Yaŋ al əssak sən məlĩ aka wən nani.

¹⁴ Məlĩ van assohõnək met mətawaŋkoyom sula neki, atafənək na vaski, yaŋ mərmeti.

¹⁵ Yaŋ məlĩ aver an dəgəɗ van dəver vi dəf adazgət kiyən ɓa; Mardokay pak averik an dəgəɗ van dəveri.

¹⁶ Məlĩ aɗiyək Mardokay aka wəza ananda, afetik akani, apsənək zəga na van aka wəza an agəɗə.

¹⁷ Ya Haman mə Bugayos wət Hamadatos pak kiyən neki ava məlyã'e. Yaŋ adawkay əɗɗa wən mbərayən sən Mardokay gəm sit ɗiy nan aka wən net mətawaŋkoyom sula neki.