Ɗerewel nat Rut 4 - Bible en Guidar

Bo'ez agəmtək Rut ka goni ( 4:1-22 ) Bo'ez azəmgəla na Elimelek

¹ Bo'ez apeŋgik a təki nawtewet wənɗe, asanək adaka. Yaŋ dərəŋ ɗəf nawzəmgəla məs Bo'ez apel wən nan nak adawtoŋgo. Bo'ez amna: «Wisne, amə'ə, asok aŋɗa!» Ɗəf nak buryoku, ndən kay təki ɗewi.

² Yaŋ Bo'ez aye zel kəlaw səret ɗiy məsɓet na walaŋgəla, amna: «Məssoŋ aŋka.» Ndəɗaŋ guromu.

³ Yaŋ aɓsən məman gəla na: «Nawmi, akən təmil sə kəlawra na Mo'ab, tat əvəl təki na məlməm Elimelek səzani.

⁴ Naw nənahək kaprəman suk dawnah na: Aman keret ɗiyi gəm keret ɗiy məsɓet net ɗiy nawa. An akəman na, amani. An kəman na ɓa hara na, agilgin suwa nəsəŋgəni; vi səbbəruk na, ɗəf tay də tive nawman ɓa; intə səbbərko.» Amna: «naw wanəmani.»

⁵ Bo'ez amna: «Pay kəman guli səvat Nawmi na, kəmatgən Rut mə Mo'abkə'e guluk na gəbaya, vi sləma gəbay van dəɗəmgən aza zəga nawray nani.»

⁶ Yaŋ kan ɗəf nawman amna: «Nəɓaɓna əman ka naw ɓa, ka in kavviren zəga nawray naw ɓa. Nok aman ka nok a gəlawa, adan nəɓapna əman ɓa.»

⁷ Vas adawsan laŋ a Israyel, aka wən na əman zəga may aka wən naddəɗaŋ zəga, may nawziwgin wən muwandi pakə: ɗəf taka dakgbuk hensek nan taka ndən əpsən ɗəf maɓɓan vani. Vas adarba a Israyel.

⁸ Ɗəf nawman aɓsən Bo'ez na: «Aman ka noko!» Ndən hensek nan taka gbuku.

⁹ Yaŋ Bo'ez aɓsit ɗiy məsɓet dit ɗiy pak na: «Mənokumtə nasway pay dəpaŋ na, nəmanək zəga nawray na Elimelek bayman gəm an nawray na Kiliyon də an nawray na Malon səvat Nawmi,

¹⁰ Vasna wamat Rut mə Mo'abkə'e, guluk ga Malon, vi sləma gəbay dəsangən aza zəga nawray nani, vi iya na gəbay van adawza səmet məlmigiɗin ɓa may sə təki nawtewet wənɗe na walaŋgəla ɓa. Mənokumtə nasway akan pay dəpaŋka.»

¹¹ Ɗiy en dəssoŋ a təki nawtewet wənɗe pak dit ɗiy məsɓet aɓɗaŋ na: «Karam agəɗə! Kəta Yawe dəɗi əzaɓ nan akat guluk məzətoŋ eŋgil anokdakəŋ va Rakel gəm va Le'a, ndəɗaŋ sula məs dəmpanən gəla na Israyel. Agəɗ arya a Efrat, sləmok dəbbal a Bet-Lehem:

¹² vasna, də uwa məs Yawe adapsuk dət waŋkəŋkə gəla nok dəsan va gəla na Peres an Tamar təwəsən Yudaŋka!»

Bo'ez aɗitək Rut; muwani Obed, dəhən Davit

¹³ Yaŋ Bo'ez agəmət Rut, təkkpaŋ ka goni. Asənta; Yawe apsət daway, ndət bok mizilin.

¹⁴ Gil tam ənah sətən Nawmi na: «Soko sən Yawe məs dəpsuk ɗəf nawmok pay dəpaŋka. Iya nan wabbal a Israyel!

¹⁵ Wamsak əsilgin ənziya egge noko may wazlgə sləma aka pay nawgal noko, adan atuk məs təŋgluwuktə tuwa: tədaysukuk ki uwa mezeŋgleket buhulu.»

¹⁶ Yaŋ Nawmi təslan wiyin naka, təmbu' a makrata, təkkpaŋ əzgəlni.

¹⁷ Gil na megge apsənənək iya dawna na: «Muway wiyin sət Nawmi!» Alvanənək iya nan na: «Obed». Ndəni afən Yesse afən Daviti.

Iya net migil Davit

¹⁸ Zev Peres yaŋka: Peres duwa Hesron;

¹⁹ Hesron duwa Ram, Ram duwa Aminadab,

²⁰ Aminadab duwa Nason, Nason duwa Salma,

²¹ Salma duwa Bo'ez, Bo'ez duwa Obed,

²² Obed duwa Yesse, Yesse duwa Daviti.