Ɗerewel nat Rut 3 - Bible en Guidar

Rut təvoŋgək kim dohoŋ ammba təl Bo'ez

¹ Nawmi atət təpsət na: «Wətuwa, azaw ambər nawkayan suk gulok kəsokgən zuk nek ɓa sa?

² Bo'ez məs kəsok dit gil məɗɗaŋ wəza nanənka, gəgaŋ na ɗəf nami ɓa sa? Yaŋ na waseŋger palga nan a kelle dəfɗəŋka.

³ Aslslayə, appay mel məs tursan nenek arani, kinangən zana noko, kəlgən a kelle. Kədarban zuk aza ɗəf van ɓa hara, hã dəbaygən ma əzəm də əsa.

⁴ Pay adawvoŋ na, awla təki an adawvoŋgo: agapə kəkosgən zəga səka tələn siske na kəvoŋgəni. Warban suk an kədaɗɗa.»

⁵ Tənah sətək na: «Wanəɗɗa məs kənah su pakə.»

⁶ Ndət kan prik a kelle, təɗɗak va atət təɗi sət wən nan pakə.

⁷ Bo'ez azəmka, asəka, makran avoŋko, ndən pay ɗuf a maŋgava hay nan sikitte. Ndət kan sikefsikef zəga səka tələn kos ndət ɗufu.

⁸ Siske, tataŋ dəfəɗ na, ɗəf nak agəɗ hirɗiki; ndən ɓe' də ban kan na: guluk yakən ɗuffo ammba tələn!

⁹ Amna: «Nawattə di?» Təmna: «intə Rut, balamək noko. Asərət zəga akat balamək noko, vi istə nawmawa.»

¹⁰ Yaŋ amna: «Əzaɓ na Yawe, dəsan akoko wətuwa. Yaŋkəŋ əmpa Kərban ədaw nok təstəs də tive an nenek day ki an maddaabəŋ, adan kəzbet gewleɗ en məssehẽŋɗe dit en məsaryeɗ ɓaŋka.

¹¹ Gəgaŋ kan na wətuwa, kəsok də geslne ɓa. An kənah pak wanəɗɗa suko. Vi ɗiy sənamda pak asənnək lewlew na, guluk na sləma kənanə.

¹² Gesiŋ gəgaŋ na, ɗəf nawmok nənani, ya də vas pak na, ɗəf nawmok na gugo maɓɓan tay day kiwa.

¹³ Addaŋ təki kana. Də mompumo na, an wamoko, moggoni, dəmoko. Ya an man tay aka əmok ɓa, suway va Yawe asan madarani wanəmoko! Avoŋ hã gap də mompummo.»

¹⁴ Ndət kan ɗuf ammba tələn hã gap dəmpummo. Təsilik tak ɗəf nawsənən na naway andak di hara. Vi tay wənah na: «Ɗəf adawsənən na gulukkəŋ tədek ama kelle ɓa!»

¹⁵ Amna: «Apsu gabaga nakokəŋ ɗa; arma ɓəlɓələ.» Ndət kan kãw ərman ɓəlɓələ. Yaŋ asla palga kilo kaklaw sula, atehsəta. Siske na, ndən mbat a walaŋgəla-metiŋ.

¹⁶ Ndət kan həmndak azat atəta, atət təmna: «Mbar kəkkpaŋgə wətuwa?» Təŋɗaŋ sətək an ɗəf van agəɗ sət pakə.

¹⁷ Təmna: «Avayək palga yaŋ kilo kaklaw sula, vi aɓsu na: kəmndok na vok mekeleŋ eŋgil akat atuk ɓa.»

¹⁸ Nawmi təmna: «Asoko wətuwa, hã kəsəngən va wən van adawbay mani. Vi ɗəfəs asan na ɓat an dəbayma wən nan dəpaŋ ɓaɓa.»