Ɗerewel nat Rut 2 - Bible en Guidar

Rut tələmək də Bo'ez ( 2:1—3:18 ) Rut tat əffek a guli na Bo'ez

¹ Nawmi tat də ɗəf səkəlaza zəlta, məs aryay də sləman, səddəv məlma na Elimeleki, dawyanən na Bo'ez.

² Rut mə Mo'ab təɓsət Nawmi na: «Maw aka əddaw əffek ki hay a gulyeŋge kəta dərɓaga ɗəf nawla sahã akawa.» Nawmi təzlanka: «Doko wətuwa»

³ Ndət kan mbatə, tətoŋ əffek a guli dərɓeget məzupeteŋgi. Ərəh nat na ndəni əbətat aka guli na Bo'ez məlma na Elimeleki.

⁴ Ya mbara Bo'ez apohək sə Bet-Lehem. Aɓsit məzupeteŋ na: «Yawe dəsan dəndukum!» Aɓsənən na: «Yawe dəɗi əzaɓ nan akoko!»

⁵ Yaŋ kan Bo'ez aɓsən daya net məzupeteŋ nan na: «Waŋ akəŋ guluk na nawattə di?»

⁶ Daya net məzupeteŋ azlanək dawnah na: «Guluk mə Mo'abkə məs təmil dət Nawmi sə muyã na Mo'ab.

⁷ Tənahək na: Nəŋgələk kəta kaffek addəv maŋgav dərɓeget məzupeteŋgi. Va təde təziw eske nampum hã gəgaŋka gəlat yaska; əffet zəgay azat ɓa!»

⁸ Yaŋ kan Bo'ez aɓsət Rut na: «Is tat əprəmən sa wətuwa? Kədaddok əffek a guli maɓɓan ɓa, awwo kədawzar faraɗa səza aŋkəŋ ɓa. Əmpa na abay zuk azet gil məzupeteŋ nanawda.

⁹ Horok adawzar səka guli məs an adawpeteŋgəŋ ɓa, kəlgən dərɓegeti. Nətakək met gewleɗ dawrəŋguko. An meme adukunko kəlgən a met gagiyeɗi kəsəgən iŋkile en məɗɗaŋ wəza naw adawmbaɗaŋgə.»

¹⁰ Ndəni Rut təɓe'i, təgduk mirbizit afuŋ ne'i; təɓsən na: «Vimi kəɗi kiyu may əzlga sləma akaw hã gap kawsənu in malakak di?»

¹¹ Bo'ez azlan sətək də ənah na: «Məŋɗan səwi, məmsaki əɗansu an kəgəɗ bayman sət atuk dərɓaga əmta na zəlko, va kəppan afuk dət moko may dələv na uwa noko, vi kadok aret ɗiy məs kisin nafɗaŋga ɓa may na suŋgo ɓa.

¹² Kəta Yawe dəfaɗsuk an kəgəɗə, Yawe, Maŋgəlva na Israyel məs kəde əɗam ammba təlnən dəfaɗsuk hanza nok tutu'u.»

¹³ Yas təmnah: «Awəl sahã akawa daya adan kəzzayansuwək makrawa, adan kəpel sət məgəɗ wəza nok hã rəŋgən dədawata; ya nəsaw na va ɗak neret məɗɗaŋ wəza nok ɓa zlaŋ!»

¹⁴ Siske, aka pay nawzəma, Bo'ez aɓsət na: «Adder aŋka kawzəm waya, kəɗehgən teɓ aza memteke noko.» Yaŋ təsat a meŋgevet məzupeteŋgi. Atəl sətək həndeyne məkepti. Təzəmka, təbək hã mbəkə.

¹⁵ Siske na, ndət le' əffeke. Bo'ez anah sit məɗɗaŋ wəza nan na: «Addəv maŋgav zlaŋ təffekgini kədarbaŋ sətən wil ɓa.

¹⁶ Ya əmpa na, kəkdahaŋ sətəngən ki hay dayday səddivit maŋgevɗe, kəppanəngəni: təffekigəni, kədawhãyãtən ɓa.»

¹⁷ Təffekək a guli hã moskoyo. Siske na, tərgak məs təffeki: Palga van aknahək gabal metiŋgini.

¹⁸ Təslan təmbat a walaŋgəla. Atət tulak məs təffeki. Məs dəmbərsət səza təbə naka təgilgən təpsəta.

¹⁹ Atət təɓsət na: «Aŋga kəffek dəpaŋ di? Aŋga kəgəɗ wəza di? Əzaɓ dəsan aka ɗəf məs dəzgə sləma akoko!» Yaŋ təŋɗan ɗəf məs təgəɗ wəza ananda sət atəta; təɓsət na: «Ɗəf məs nəgəɗ wəza dəpaŋ ananda van iya nan na Bo'ez.»

²⁰ Nawmi təɓsət atət kan na: «Əzaɓ dəsan akan səva Yawe ndən məs appan əɗɗa moggon nan azet ɗiy mederet ɓa, azet ɗiy mimtit ɓaŋka.» Siske, Nawmi təɓsət na: «Ɗəf van nami na gugo; taka neret ɗiy nawmamiy»

²¹ Rut mə Mo'ab təzlanək na: «Anah su ka'e na: Kəbaygən zuk azet məɗɗaŋ wəza naw hã ndəɗaŋ əpet baymani.»

²² Nawmi təɓsət Rut atət kan na: «Lawi wətuwa, azban əɗɗa wəza dit gil məɗɗaŋ wəza nani, vi ɗiy adattapokən a guli maɓɓan ɓa.»

²³ Ndət kan tep azet gil məɗɗaŋ wəza na Bo'ez, vi kaffek hã əkgrak na əpet palga, gəm na əpet na haykəmari. Təsatək dət atəta.