Ɗerewel nat Rut 1 - Bible en Guidar

Nawmi tat əmndat a Bet-Lehem dət Rut ( 1:1-22 ) Tatwãhɗe na daŋgla na Elimelek

¹ Təl taka, aka pay net Mətawaŋwən na, may agəɗək aka dəlva. Yaŋ ɗəf na Bet-Lehem na Yuda, asim a muyã na Mo'ab, ndəni, guluk nani gəm kirtin mezeŋgleket sula.

² Iya na ɗəf vanəs na Elimelek; guluk nan na Nawmi gəm kirtin mezeŋgleket sula may Malon də Kiliyon. Mə Efratiɗeŋgə sə Bet-Lehem na Yuda. Yaŋ agapaŋ kan a muyã na Mo'ab assoŋ adaka.

³ Yaŋ Elimelek zələt Nawmi amtə; təsatək, ndəta dit kirtət mezeŋgleket sula.

⁴ Agəmaŋ mə Mo'abɗe ka gili; akən taka iya nat na Orpa, ma sula'ət na Rut. Assoŋgək də gəla adak zəga na wəzva kəlaw.

⁵ Siske na, Malon də kiliyon zamaŋ sulegit tamə, guluk nak təsatək məza kirtit sula nek ɓa məza zələt ɓa.

Rut təzbatək Nawmi a Bet-Lehem

⁶ Yaŋ kan təsili, ndəta dit tetiŋgiɗta, təmil səka muyã na Mo'ab; vi təprəmək əpel a muyã na Mo'ab na, Yawe azlgək sləma aket ɗiy nata, apsitik zəga nawzəma.

⁷ Ndəni kan təmbat sə təki məs təsat də gəla dit tetiŋgiɗit sula. Agəmənək tive vi kamndoŋ aka dələv na Yuda.

⁸ Ya Nawmi təɓsit tetiŋgiɗit sula nek na: «Məddoŋgu, məmndoŋ nawat di pak anat matda. Kəta moggon na Yawe dəsan də munokum məza əddəɗ ɓa va kəssoŋ dit ɗiy en dəmtaŋgə gəm dənduwa.

⁹ Kəta Yawe dəbbah sət nawat di pak, tərəhəgən gəlat ana zələtda.» Yas kan təllem a makrata. Aslanənək wəleti, ahəmaŋka.

¹⁰ Siske aɓsətən na: «Agəɗ na ɓa, dənduk mədamndam azet ɗiy noko!»

¹¹ Yaŋ Nawmi təmna: «Məmndoŋgu kirin nawa, vimi kədazbawən di? In tat dit Kirin mezeŋgleket addəvu əmpa nakkpaŋgaŋ zilŋgiɗkum sa?

¹² Məmndoŋgu kirin nawa, məddoŋgu, vi nəgalək day nassaw ammba ɗəfa. Ya kəta nənah na: “əɗɗum nawrəh uwa abe; ha'aw kana wanəsaw də ɗəf dəfɗəŋka ha'aw wanəwə mezeŋgleketi,”

¹³ vasna, as pak wakegenin dəɓayaŋgən sa? Vasna wakəɓapən wəssa məza də ɗəf mizilin ɓa sa? Vaski ɓa kirin nawa. Vi əzəmsahã naw adayək ki an nokum sawɓa; akawiyə ədagədəv na Yawe arban zəni.»

¹⁴ Yaŋ aslanən wəlet ahəmaŋ əmpa. Siske na Orpa təllamtək atət a makrata. Ya nat Rut na azat tipi.

¹⁵ Yas kan təmna: «Awla mbəɗok nat təmndatək azet ɗiy nat dit meŋgilveɗ nata. Amndoko, azbat mbəɗoko.»

¹⁶ Ya Rut təmna: «Kədawgayaw nappok, kamnda faraɗa səzok ɓa; vi a təki kəmbatə wandawa, a təki kədawvoŋ nədawvoŋgo; ɗiy nok wassoŋ ɗiy nawa, Maŋgəlva nok wassan Maŋgəlva nawa;

¹⁷ A təki kədamta nədamta, adak adawndəkwənən. Kəta Yawe dəɗɗa su vas gəm məday ki as əmpa, an əmta yi dədawɗakam ɓa ɓa!»

¹⁸ Adan tula na kiyət atak na dazbat ɓa na, ndət ɓat dawpelsət wən nani.

¹⁹ Adawaŋgək kan sulegit hã ndəɗaŋ gap a Bet-Lehem. Adan agapaŋ a Bet-Lehem arəhən na, walaŋgəla bayman tay geŋgeɗgeŋgeɗ də wən neti. Gil ənahaŋ na: «Nawmi tə kpakə?»

²⁰ Ndət əzlan sit na: «Kədawyəwən na Nawmi ɓa! Məyu na Marra! Vi Məzuɓappak akkpaŋgawək na sahã an faɗə.

²¹ Də zəga vaw nəmbatə, vaw mekeleŋ Yawe adawmilguwa. Vimi kədawyəwən na Nawmi, mbaraka Yawe asil akawa, Məzuɓappak akisuwək tatwãh di?»

²² Vas Nawmi təmil ɓa' dət Rut atət mə Mo'abkə, akən sə muyã na Mo'ab: agapaŋ a Bet-Lehem aka pay nawtəŋ əbəl palga.