Ɗerewel na Daniyel Gərek 14 - Bible en Guidar

Daniyel gəm məsdəlveŋge na Bel

¹ Dərɓaga əmta na məlĩ Ahasuwerus, Sirus na Persiya dəgəm məlĩ a gəlani.

² Daniyel taka naret ɗiy en go'o naba məlĩ Sirus yi, məlĩ aɗiyək ki Daniyel day kiyit ɗiy naban pakə.

³ Ya ɗiy na Babilon tahəŋ də tuya adawyaŋ Bel. Va addaŋ pak ɗiy tahəŋ əki sənən gəpa gap kilo səkat sle'i, timeŋgiɗ kaklaw poɗo, gəm mbazla na megezlembirke litər səkat sula.

⁴ Məlĩ Sirus atafək na Bel maŋgəlva yi, pay pak tay əddan əgduk abani. Ya na Daniyel Maŋgəlva an nan adagduk abani.

⁵ Pay mbərən məlĩ assohõnək Daniyel na: «Vimi kagduk aba Bel ɓa di?» Daniyel azlani, naw nəgduk na abet zəgeɗmeŋgilveɗ məɗɗet də va ɗəf ɓa. Sən Maŋgəlva madaran nədagduk kaka'ə, ndən məs dəzəməɗ disiŋ də dəlvafuŋ gəm məs dəsan Daya na ɗəf titir pakə.

⁶ Yaŋ məlĩ assõh na: Kətaf na maŋgəlva nam Bel madarani gesiŋ ɓa sa? Kula va adawzəma də adawsa gbaŋ pay pakəŋ ɓa sa?

⁷ Daniyel hamashamas amna, kədərwa'an zuk sam ɓa məlyã. Maŋgəlva kədawya Bel əsna, zəgay mbərən dayki dələv məkkəɗ sən təbəz pepreŋ ɓa; zəga tay azəm ɗah ɓa, tay asə ɗah ɓa.

^8-10 Aka as na məlĩ adək gədəv diyɗa yaŋ aye məsdəlveŋge na Bel kaklaw buhul baymeti. Aɓsit na, in tat ənah sukum, an kərban suwən na Bel dədawzəm zəga na ma tuyaŋka ɓa na kawbaykumi, ya an kərban suwənən na Bel iyi, asna wanəbay Daniyel, vi anahək na, Bel maŋgəlva yi ɓa. Daniyel atafək wən vanəska.

¹¹ Yaŋ ndəɗaŋ də məlĩ pak atoŋgoŋ addəv gəla na Bel naka, məsdəlveŋge apsənən məlĩ na: Məlyã, wamigili, kappok kəɗiygən waya gəm mbazla aka tabəl. An is tat əzara kəmpangən maddamba dərɓogoko, kəɗiygən tompoŋ na məlĩ akani.

¹² An kəmilik də mompumo, an kərəhək na Bel dəzəm zəga ɓa, asna wakəɓap əbaymə. Ya an azəmka, Daniyel dədamta vi awə səmək wəna.

¹³ Tay dəsset məsdəlveŋge vet ɓa, vi aso'oŋgək vov də mahaɗamma kəlafuŋ hã ammba tabəl addəv gəla na maŋgəlva, waɓap əddoŋ də dəfəɗ pak əzəm an naka tabəl naka.

¹⁴ Adan məsdəlveŋge agilyoŋgu, məlĩ aɗiyək way sən Bel. Yaŋ Daniyel aɗi wən nan sit məɗɗaŋ weza na məlyã dəkiyaŋ moŋglo, dəppuknəngən addəv gəla na Bel təhə. Ɗəf tay dule daɗɗan abbər ki məlĩ ɓa. Dərɓaga aska, agilyoŋguk baymeti, ampanənək maddamba, aɗiyək tompoŋ na məlĩ akani, yaŋ addoŋgu.

¹⁵ Dəfəɗ nan va ɗayɗayə, məsdəlveŋge dit gil neti gəm kirtit azzoŋguk addəv gəla na maŋgəlva də metive an məɗama, azəmən way pakə, asanənək mbazla pakə.

¹⁶ Yaŋ mazayən nani məlĩ də Daniyel alvəɗaŋ addəv gəla na tuya.

¹⁷ Məlĩ assõh na, məhokni tompoŋ sa Daniyel? Daniyel azlan na owwo məlyã məhokti ɓa.

¹⁸ Adan məkol maddamba ləŋgə, məlĩ təm na zəga tay aka tabəl ɓa, yaŋ apel dayadaya na, mattuŋguk kənani, aw Bel, maŋgəlva kənan gesiŋ.

¹⁹ Daniyel təŋ əmasa, yaŋ anah sən məlĩ na: «Tak kətoŋgən addəv gəla na tuya, awəl afuŋ, anah su gəla tilit mədəŋga kədawla adak di?»

²⁰ Məlĩ amna: Intat ula gəla tilit zeli, gili gəm kirni.

²¹ Gədəv məlĩ adəka, aɗɗak ka dərmeningin məsdilveŋge dit ɗiy neŋgil anetda gəm dəkisiningini. Arban sənənək metiveɗ məɗama məs adawtoŋgoŋ dədak də dəfəɗ pak əzəm way məɗiyən aka tabəl naka.

²² Yaŋ məlĩ abey məsdilveŋge neki, apsən Bel nak sən Daniyel, aŋgrofo gəm aɓzlu gəla nani.

Daniyel tay əbay dohõtuya

²³ Dohõtuya tay mettiŋgin məs ɗiy na Babilon adagdukoŋ sənəni'e.

²⁴ Pay mbərən məlĩ anah sən Daniyel na, kəɓap na ənah su na dohõtuyaŋ na maŋgəlva madarani ɓa ɓa. Asna agduk abani!

²⁵ Daniyel azlan səni amna: «Aba Daya nədagduko, ndəni Maŋgəlva madaran kaka'ə.»

²⁶ An kəpəl suwək tive məlyã, wanəbay dohõtuya net ɗiy nokuŋ məza də masalam ɓa mãy zleŋge ɓa. Məlĩ azlan sən na, nəpəlsukuk tive.

²⁷ Siskiŋ Daniyel agəm timbe, səlhã gəm bizwer na pəlsa, agibiɗ sapə. Aktim hirzliŋhirzliŋ, azget a bara dohõtuya naka. Adan dohõtuya nak azime, asɗike yaŋ aɓahə. Daniyel amna: Mula zəga kədagdukoŋ sənən əŋka mə Babilonɗe.

²⁸ Adan ɗiy na Babilon aprəmnən an dəgəɗə, gədəvit adək diyɗa, aɗɗaŋgək ŋgburŋgbur aka məlyã. Yaŋ ɗiy aŋzlaŋ vaŋvəl na məlĩ akkpaŋ mə Yuda. Daabəŋ nani abayək Bel gəm abet məsdilveŋge, yaŋ kakaŋ abay dohõtuya namə.

²⁹ Yaŋ addoŋ aza məlyã, aɓɗaŋ na apsəm Daniyel ammba vamə. Anah sənən məlĩ na, an kəɓoŋko, waməbayuk də gəla noko.

³⁰ Adan məlĩ awla na əsmãy yi ɓa, aɗɗaŋ sənənək vavyakə, apsit Daniyel ammba veti.

³¹ Azganənək addəv vov net ɓooliɗi, appanən adak gap əvoŋ sləre.

³² Ɓooliɗ tahəŋ a vov adak buhulu, va an dəslə na tay əpsitin ɗiy sula gəm timeŋgiɗ sula pay pakə. Ya zəga tay apsitin nawzəm addəv pay sləres ɓa, də əɗɗum na sessel wampərnən Daniyel.

Məgilgini Daniyel səddəv vov net ɓooliɗi

³³ Gala dasək na məskəleŋ Habakuk tay aka dələv na Yuda. Adək əzəma yaŋ aɗi mepteke akani. Agəmək marga də əzəm addəvən nak kawke sit məɗɗaŋ wəza nakkalan hay sə gulyo.

³⁴ Maslay na Daya anah sən na: «Aka way kədawkaŋ sən Daniyel, tay a Babilon addəv vov net ɓooliɗi.»

³⁵ Habakuk azlan na: «Daya nəmbat ɗah a Babilon ɓa, nəsən təki vov net ɓooliɗ van asan dayday ɓa.»

³⁶ Maslay armak məskəleŋ nak aza muhur kiyni, aka a Babilon dəka səmyã. Aprikgənək ama vov net ɓooliɗ naka.

³⁷ Habakuk ayəka: «Daniyel! Daniyel! Maŋgəlva aslən sukuk way yaŋka atafa.»

³⁸ Səza Daniyel aprəm Habakuk, afetike, amna: «Maŋgəlva nawa, kəɗɗumowəka, kazget ɗiy en dəŋglukun firik ɓa.»

³⁹ Daniyel nak le'i, azəm waya, yaŋ maslay na Maŋgəlva aslan Habakuk ləŋ amndagan eŋgil ananda.

⁴⁰ Əvoŋ buhul səza məzgan Daniyel addəv vov net ɓooliɗi, məlĩ alək ama vov kawhəm ki Daniyel. Adan agapə, alngəɗ adak na, Daniyel tay ɗewwe.

⁴¹ Məlĩ aŋgəzlək vaŋvəla: «Aw Daya, Maŋgəlva na Daniyel, matuŋguk kənani. Istə Maŋgəlva kaka'ə.»

⁴² Agilgənək Daniyel sə vovu. Azgetik məs dəkayaŋ əbay Daniyel a gəlan adaka. Ɓooliɗ ampirnin ləŋ də kakara, ama hara məlyã.