Ɗerewel na Daniyel Gərek 13 - Bible en Guidar

Mətawaŋ wən mbəreyit sula gəm Suzan

¹ Ɗəf tay də gəla a Babilon adawyaŋ na Yowakim,

² dəɗiyət Suzan wətən Hilkiya. Suzan vat ɗak lalawəktə, məgeslne' sən Maŋgəlva diyɗa.

³ Migilət mə Yudeɗ məgəslne' sənən Maŋgəlva əŋ, ndəɗaŋ dəyagan sətən ənziya va mahenziŋ na Moyis aŋgəl sət wətitit.

⁴ Zələt Yowakim məsarya yi diyɗa. Guli net teɓ moggon tay ki gəla nan tərwəslə. Adak mə Yudeɗ adakkalaŋ pay maɓɓan kazga meŋ, vi beymet pak tay əɗɗumoŋ na adayək kiyit də gagdaka.

⁵ Əzva nani məwel deyeɗe sula na sap net mə Yudeɗi dəssoŋgən mətawaŋ wəna. Aketi Daya apel aket na: «Zəga mbərayən tay a Babilon, armek mətawaŋ wəna, ndəɗaŋ məs dədahaŋ nawdawgit ɗiyi.»

⁶ Ɗiy məsɓet vetis asərəkaŋgək əddoŋ ana Yowakim da, ɗiy məs met aka ətawwən aket pak tahəŋ əddoŋ adaka.

⁷ An pay tay əzla na, ɗiy pak əddoŋ eŋgili, nat Suzan na, ndət ətoŋ addəv guli net teɓ na zələt əbbal adaka.

⁸ Ɗiy məsɓet sula nek tahəŋ ulətən ɗayɗay a təki vanəska, hã əŋgla nat toŋ a mekreti.

⁹ Maɗɗulet azlzlaɓka, amzlahaŋgək səka tive na Maŋgəlva, appanənək əzban an aɗiyə.

¹⁰ Sulegit pak mekret tay akat Suzan, ya dəpelenən an dədawfẽyet a walaŋ zit ɓa,

¹¹ vi naway pak tay əɗɗa wil dawnah sən ɗəf maɓɓan na man aka əvoŋgəta.

¹² Vaski va addaŋ pak naway pak tay əkay pepet nawləta.

¹³ Pay mbərən adan pay adawzla, agilyoŋguk səna Yowakim da, awɗakaŋ də wənəh na: «Dam eŋgili, pay nawtor mozlomozlomo səma ɗəf agapka.»

¹⁴ Ya adan awɗakaŋgə, naway pak amilik ana Yowakim da naka. Adan almaŋ adaka, assohõnən zit zəga narma vet azani, naway pak anah sənək əŋgla nan akat Suzan sən baynani. Vasna aslerenən met va mbar adalmaŋ dəndət takərgət di.

¹⁵ Tahəŋ əganən paya. Pay mbərni, Suzan təmbatək addəv guli na zələt va ɗaɗayə, belemɗe məguluŋgit sula kaka' dəlhãtəni. Adan pay na təki kakãhĩ, mat aka əslslay kəta.

¹⁶ Ɗəf tay adak abbər ki ɗiy məsɓet sula nek məɗemit məzusekeɗtən ɓa.

¹⁷ Suzan təslinik belemɗe nat əkay sət mẽl gəm tursan, təɗi sitik wən nampet metiveɗ gugriɗ nawtoŋ vi kaslslaya.

¹⁸ Aɗɗanənək va tənahə, agilyoŋgək də maddamba na maŋgava kawki an məs dayək net təssohẽti, dulenin ɗiy məsɓet məɗemit nak ɓa.

¹⁹ Adan agilyoŋgu, ɗiy məsɓet nek vit sə təki aɗamaŋ naka, agəmən zit azat Suzan nakə,

²⁰ apsətən na: maddembeɗe na təkiyəŋ kpuɓkuɓəŋgə ɗəf tay nawləm ɓa. Nam mam akoko, ataf əvoŋ də mənamə.

²¹ Ya an kəɓoŋko, waməhẽw wən akok də wənəh na, mərəhkuk də gawla, vini kərɓehet belemɗe noko.

²² Suzan tənɗəska, təmna: «Nətoŋgək addəv tatwãh yaŋka, tive nawgilyaw səddəvən tay ɓa!» An nətafək an kəŋglaŋgə, kawtawi wən akaw nawbaywa, vi nəkuwək a gizbe, ya an nəɓoŋko, wanəkõh səvokum ɓa.

²³ Ɗaɗah məhẽw wən akaw dəka zəga tay nəgəɗ ɓa, ki in əɗɗa mambray aba Daya.

²⁴ Yaŋ Suzan təŋgezl vaŋvəl dayadaya. Ɗiy məsɓet nek tam aŋzlaŋ vaŋvəl dayadaya'e tam də əhẽw sət wəna.

²⁵ Taka səret ɗiy məsɓet nak anzan akol metiveɗ na guli net teɓ naka.

²⁶ Adan məɗɗaŋ wəza neŋgil aprəmən vaŋvəla, anzoŋguk kəla meddembeɗe na maŋgava, kaprəm vaŋvəl də ula an dərəhət Suzan.

²⁷ Ɗiy məsɓet nek aboton sitin an dəgəɗə. Wil adeninik məɗɗaŋ wəza neŋgil nek vi dəprəmnən ɗah wən vas akat Suzan ɓa.

Mətawi wən namta akat Suzan

²⁸ Mazayin nan ɗiy akkalaŋgək ana Yowakim zələt Suzan da, ɗiy məsɓet sula nek tam azzoŋko, armanənək a mekret nawtaw wən akat nawbayta.

²⁹ Adan ɗiy pak akkalaŋgə, aɗiynən wən nan: «Dəkitəngən Suzan wətən Hilkiya, guluk na Yowakim.» Aslənaŋgək ɗəfa.

³⁰ Tədek tep dit migilta, kirtəta gəm milmiŋgiɗta.

³¹ Lalawəktə sawɓa.

³² Mətawaŋ wən vet ɗiy məsɓet, daryawɗeŋgə, aɗinən wən nan na: dətornən zəga səkat vi kawla lalaw nat hã ndəɗaŋ kpe'i.

³³ Ɗiy nat dit ɗiy en dəzzoŋ ulətən pak tahəŋ əhəmaŋgə.

³⁴ Mətawaŋ wən nek asilyoŋ aweleŋgiɗ ɗiy aɗiynən vet akat Suzan nakə.

³⁵ Nat pak tat əhəma. Addəv əhəm nata, dəslanək harat a disiŋ. Addəv makrata, təppanək kiyət sən Daya.

³⁶ Ɗiy məsɓet nek aɓɗaŋ na: «Gala mədabbal takərgəm addəv guli net teɓ na zələt Suzan, gulukəŋ təde dit belemɗe nat sula. Təmpetik metiveɗ gugriɗ na maguli pak tərɓehet belemɗe nata.

³⁷ Gawla tay haɗamma adaka, ndən vit, azar azat go'o, avoŋgəta.

³⁸ Nam mənam tat a bezler na guli net teɓ naka, yaŋ mula zəga daryawəska, məgəm zəm azeti.

³⁹ Mərih tahəŋ ɗufɗuf pakgiti. Məɓap ərma gawla van ɓa, vi adayək kiyəm də gbogboŋgo, amõhũk zən akol maddamba na guli net teɓi, anzan akõhu.

⁴⁰ Yaŋ mərmət gulukəŋkə, məssohõt na gawla vanəŋ naway di?

⁴¹ Yaŋ təɓoŋ də əzlan səmə. An məŋgəl əprəman sukum yaska.» Əkkal ataf sitik an apeleŋ vi ɗiy məsɓetiŋgə aret ɗiy mãy mətawaŋ wənəŋgə. Mətawi wən namta akat Suzan.

Daniyel akõhgətək Suzan

⁴² Təŋgəzlək vaŋvəl dayadaya: Maŋgəlva an faɗə, kəsənək an dəɗamə, kəsinik zəgeɗ pak tak adaɗɗaŋgə.

⁴³ Kəsənək appaka ta' an ɗiyəŋ apeleŋ akawəŋ na uwa wəni. Istat ulan wanəmtə, ya tay an nəgəɗ dayday ɓa, wən arkaŋ suwən ɗarə.

⁴⁴ Daya aprəmək əkkam nat Suzan.

⁴⁵ Pay adawkətən kawbayta, Maŋgəlva aslən Zeŋgile Salala aka gawla adawyaŋ na Daniyel.

⁴⁶ Aŋgəzlək vaŋvəl dayadaya, amna: «Naw nəsawna miziwe aka əmta nat gulukəŋ ɓa!»

⁴⁷ Ɗiy pak akkpaŋganən heret dəkani, assohõnəni: «Mi kəŋgəl kawnəh di?»

⁴⁸ Gawla nak le' aweleŋti, amna: Mənokum mə Israyelɗe pakgukum maɗɗulokum tay ɓa sa? Kətawən wən akat guluk səddəv vanday nokum, ətawwən nawbayət məza əggboŋ met ɗiy ɓa, məza əkayan gesiŋ nan kaysa ɓa.

⁴⁹ Məmil a təki nawtaw wəna! Zeliŋki, wən arkaŋ sətən ɗarə.

⁵⁰ Ɗiy pak agəmənək ziti, amilyoŋko. Ɗiy məsɓet meɓɓet apsənən Daniyel na: Ade, asok awalaŋmə kənah səmgən an kəɗɗumu, vi Maŋgəlva apsukuk maɗɗula net ɗiy məs əzva diyɗa.

⁵¹ Daniyel amna: «Məgohet ɗiy məsɓet suleŋki. Nəssohẽtgən temtemi».

⁵² Agohetinke. Daniyel ayak ɗəf məsɓan an daabəŋ, aɓsən na: «Ɗəf məsɓan məknəhən də ndarsakə, pay nawfaɗ mambray nok an kəgəɗ far agapka.

⁵³ Kətawək wən məza təstəs ɓa, kiynetik ɗiy en təstəsə, is mbegit məs dəraygənən wəna, an Daya aɗi wən nan yaŋka: Kədawtaw wən namta aka ɗəf an təstəsə mãy an də gesiŋ ɓa.

⁵⁴ Ya kakaŋ kan na, an gəsiŋgi kərəhtək Suzan də gawla na, anah səmə ammba wəlaŋga awani kərih di»? Ɗəf məsɓan nak azlani: «Ammba hereme.»

⁵⁵ Daniyel amna: «Yawwa, uwa wən nak yaŋ wagəm zeŋgiloko! Sessel Maŋgəlva aɗiyək wən nan sən maslay nan taka dədegəni, diynokgən dəboyukgəni.»

⁵⁶ Daniyel amndaganək ɗəf aŋ kana, yaŋ aɗi wən nan dəkiynəngən maɓɓanəŋ tamə. Aɓsən na: Wətən wətən Kana'an məza wətən wətən Yuda ɓa, lalaw nat gulukəŋ azlzlaɓanək kiyko! Əŋgla nok akat azlzlaɓanək maɗɗuloko!

⁵⁷ Vaski kəɗɗaŋ dit gil aka pay net məlyeŋge en lahəŋka, kəvoŋgitinik vi adawgeslne'eŋ sukumuni. Ya guluk na Yuda təttaka tat tətaf sukum wən daryawəs ɓa!

⁵⁸ Ya kakaŋ na anah suwa, ammba wəlaŋga awani kərih di? Ɗəf aŋ amna: «Ammba sokoyo.»

⁵⁹ Daniyel aɓsən na: «Uwa wənəŋ kawtawi wən nan ka nawboyuk is pakə! Sessel maslay na Maŋgəlva tay əga wən nani, də masalam avan kawtaw wən akoko. Waboykum sulogukum pakə.»

⁶⁰ Ɗiy məkkelit pak aŋzlaŋgək vaŋvəla, afeteŋgək aka Maŋgəlva məkõhgit ɗiy en dəɗiynən əɗɗum net akani.

⁶¹ Yaŋ akkpaŋgaŋ aket ɗiy məsɓet sula nek məs dəziweŋ aka tepelke məs Daniyel arme də əpel na met naka. Atawənək ətawwən na ndarsak məs atawaŋ aka ɗəf maɓɓan nara vanday neti.

⁶² Aɗɗaŋgək va mahenziŋ na Moyis, abeynənik dəpaska'e, ɗəf məza heslepe ɓa akõhko.

⁶³ Hilkiya dət guluk nan afeteŋgək aka Maŋgəlva ammbat Suzan wətiti də Yowakim zəlta sap dit hilfiŋɗit pakə, vi asənənək na ərba wil tay addəv ədaw nat Suzan ɓa.

⁶⁴ Səza dəpaski Daniyel arah gagdak abet ɗiyi.