Baruk 2 - Bible en Guidar

¹ Daya aɗɗak kan an məs apel akamə, aket mətawaŋ wən nam məzətawaŋ wən a Israyel, aket məlyeŋge namə, aket deyeɗe namə mãy aket ɗiy na Israyel gəm na Yuda:

² zəga tay dəgəɗ ɗah aka dəlvafuŋ va aza an məverin addəv mahenziŋ na Moyis dəgil va an agəɗ a Yerusalem ɓa;

³ hã gap mənam əzəm sluwit kirtim mezeŋgleketi mãy net kirtim məguluŋgiti.

⁴ Daya appamək ammba vet məlyeŋge məs dəssoŋ kiyəm tərwəslə, vi dəraməngəni mãy mərbəgən wil aweleŋgit ɗiy en kiyəm tərwəslə, a təki məs atrayamə.

⁵ Mbək mənam əssam deyeɗe yaŋ məkkpaŋgami belemɗe, vi məgəɗək mbərayin aza Daya Maŋgəlva namə, məprəm man ɓa.

⁶ Təstəs na Daya Maŋgəlva nami, ya namə gəm efiŋgiɗimə wil aram pa'ə, va adawla pay dəpaŋka!

⁷ An Daya apel akam pak, ərayɗe vetis ateheŋgik akamə.

⁸ Ya məɓuh mam ama hara Daya ka dəkkpaŋgən əɗɗum mbərayən na makra nawaydi pak səram ɓa.

⁹ Əmpa na Daya azgək sləma aket ərayɗeski, aslin akamə, vi Daya təstəsi addəv an aɗi səm wən nan naɗɗa pakə,

¹⁰ ya məprəm man məs adawnah səm nawdaw va azet mahenziŋɗe məs Daya aɗi abaməŋ ɓa.

Əkkam net ɗiyi

¹¹ Ya gəgaŋ na Daya Maŋgəlva na Israyel, is məs kəgilgit ɗiy nok səka dələv na Eziptə də gbogboŋ na voko, də zəgeɗ narba gəm dit sekeneɗi, də əɓap metiŋgini gəm də vok təlla, is məs kəɗɗa sləmok agil va adawla pay dəpaŋgənəŋka,

¹² məgəɗək mbərayin, məgəɗək va məs awgeslne'əŋ sənən Maŋgəlva ɓa, məgəɗək zəga məs tay təstəs ɓa, məɓe' sit mahenziŋɗe nok ɓa Daya Maŋgəlva namə.

¹³ Kəta herɗe nok dəkkpaŋgaŋ səkamə, vi mənam yakəŋ ndolu, ngbəra' a waleŋgit ɗiy məs kətərayamə.

¹⁴ Daya aprəm əkkam namə gəm əŋgla namə, akõhgəm sən moggon noko, aɗɗa mərah ki nenek ama heret ɗiy məs dəsimgəməni,

¹⁵ vi dələv pak dəsəngən na istə Daya Maŋgəlva namə, vi iya nok tay iya aka Israyel gəm aka gebbet ɗiy nani.

¹⁶ Daya, awəl sə disiŋ sə təki salala noko, azək sləma akamə, apak sləmoko Daya, aprəma,

¹⁷ akol horoko awələ: ɗiy məmtit naddəv magamasəŋ ɓa, ndəɗaŋ məs əmpəs tay addivit ɓaŋkəŋ nawɗinən ki gagdak gəm təstəs na Daya ɓa,

¹⁸ ya zeŋgile məs dədawzəm sãhã dərwa dərwa yi, məs dədawdaw ɓe'ɓe' məddakni, ula məs awziw ŋgbak ɓa yi gəm zeŋgile məs mãy adawday nawɗi ki gagdak gəm ki təstəs na Daya!

¹⁹ Vas na, də əmpa tələm aket wəzeɗe təstəs net efiŋgiɗmə mãy net məlyeŋge nami mədawki əkkam nam abok ɓa Daya Maŋgəlva namə;

²⁰ vi kəslənək herɗe gəm ədagədəv nok akamə, va kəpel wən nan lahəŋ də met məskəleŋɗe məɗɗaŋ wəza nok dawnəh na:

²¹ Vaŋ Daya anahə: Məɓegən kiykum, məgəɗ sən wəza sən məlĩ na Babilon, asna wakəssoŋ aka dələv məs nəpsit efiŋgiɗkum.

²² Ya an kəprəmnən ma Daya məs dənah sukum kəɗɗaŋgən wəza sən məlĩ na Babilon ɓa,

²³ wanəɗɗa ka geŋgere na ənneke gəm na əzləra, na məs dəɓel gulku gəm nat waŋ məɓelta dəzəgən siddivit walaŋgəlaɗe gugriɗ na Yuda gəm dəgilgin sə Yerusalem; dələv pak wasan na sãhã, ɗiy assoŋ na addəvən ɓa.

²⁴ Ya məprəm mok məs dənah səm ka məgəɗgən wəza sən məlĩ na Babilon nak ɓa, ndəni kəɗɗa an kəpel lahəŋ də met məskəleŋɗe məɗɗaŋ wəza nok dawnəh na: Kawndeti sleŋsleŋɗe net milyẽŋge namə gəm net efiŋgiɗim siddivit magamasɗe neti.

²⁵ Yeŋ məzget ara sla'sla' na paya gəm ara təki zazay na dəfɗa; amtaŋgək addəv əzəmsãhã mbərayən, sən mãya, masalam gəm əket aka balamə;

²⁶ ya gəla məs adawyanən iya nok akan kətoŋgənək addəv tatwãh va pay adawlanən pay dəpaŋ sən daraw net ɗiy na Israyel də an net ɗiy na Yuda.

²⁷ Də as pak kəgəɗək wəza də təstəs nok də ulasahã metiŋgin akamə Daya,

²⁸ va aza an kəpel lahəŋ də ma məgəɗ wəza nok Moyis, pay kəɗi sən wən nan dəvergən mahenziŋ nok abet mə Israyelɗe dawnəh na:

²⁹ An kəprəmnən maw ɓa, sessel, vanday gəddakəŋ wakkpaŋ zəga ɗar a waleŋgit ɗiy məs nədawtəreyet addivti;

³⁰ vi məsənək na aprəmwən na ɓa, vi gebbet ɗiy ki ɓəɓəlɗeŋ. Ya waɗɗumonən kiyit aka dələv məs məsimgit adaka,

³¹ wasənnən na intə, Daya, Maŋgəlva neti. Wanəpsit makra gəm sləmet məs dədaprəmaŋgə;

³² waɗinən kiyu aka dələv məs məsimgit adaka, waɗɗumonən iya nawa.

³³ Wappanən gabba ki ɓəɓəl neti gəm zəga naɗɗa net mbəraynəŋka, vi waɗɗumonən tive net efiŋgiɗit dəɗɗaŋ mbərayən aka Daya əŋka.

³⁴ Wanəmilgit aka dələv məs niynan maw napsit sit mãy Abraham, Isak, gəm Yakob efiŋgiɗti; wassoŋ migilin; wanəŋzlərgiti, vaski gesiŋ arreheŋ na ɓa.

³⁵ Wanəziwgin wənmiyna an faɗ dənɗaŋgə, vi nəsawgən Maŋgəlva neti, dəssoŋgən ɗiy nawa; nəgilgit na ɗiy naw mə Israyelɗe səka dələv məs nəpsit əmpa ɓa.