Baruk 1 - Bible en Guidar

Alabara na ətoŋ addəvən ( 1:1-14 ) Baruk averik ɗerewel sə Babilon sit mə Yudeɗ na Yerusalem

¹ An naddəv ɗerewel məs Baruk wətən Neriya, wətən Maseyas, wətən Sedekiyas, wətən Hasadiyas, wətən Helkiyas aver a Babilon yaŋka,

² aka əzva mesle'eni, əvoŋ mobuholon na təla, pay mə Kaldiyeɗ amõhnən Yerusalem aɗiyaŋ sənən offo.

³ Baruk aŋɗanək an məverin addəv ɗerewel van kara Yekoniya wətən Yoyakim məlĩ na Yuda, gəm keret ɗiy en dəzzoŋ əprəm an məverin naddev ɗerewel vani,

⁴ keret ɗiy gugriɗe, kirtit milyeŋge, ɗiy məsɓeti, duɗukko nan na keret ɗiy pak təŋ səza muzliya hã gap aza ɗəf metiŋ net ɗiy en dəssoŋ a Babilon a ma məlpa metiŋ adawyaŋ na Sud.

⁵ Ɗiy tay əhəmaŋgə, tay əɗɗaŋ meme, tay uɓuhnən met aba Daya.

⁶ Siske akkalaŋ koɓeɗi, naway pak va aza ərəh nani,

⁷ aslinnin a Yerusalem sən məsdələv Yoyakim wətən Hilkiya, wətən Salom, gəm sit məsdəlveŋge mbərti gəm sit ɗiy pak məs dəssoŋ ndəndən a Yerusalem.

⁸ Lahəŋka Baruk egimik zəgeɗ naddəv gəla na Daya en məndet səddəv gəla na Maŋgəlva vi kemndeget aka dələv na Yuda aka əvoŋ makəlawan na təla na Siwan; zəgeɗ vet en məzeɓit də təbəz babar məs Sedekiyas wətən Yosiyas, məlĩ na Yuda anah aɗɗeninəŋgə.

⁹ Səza Nabukondonozor, məlĩ na Babilon, asimgin Yekoniya sə Yerusalem aka a Babilon sap dit ɗiy gugriɗe, mə fərsəneɗi, deyeɗe dit ɗiy naka dələv vani.

¹⁰ Yaŋ anahaŋ na: Yaŋ na, məslən sukumuk koɓeɗi, dit koɓeɗiski məlbah zəgeɗ nawda əvəl nawzla kurmbuɗuk gəm nawzaɓ-Maŋgəlva vi mambraya, məlbah tursan, məgəɗ əvəla, məɗi zəga nawzaɓ-Maŋgəlva aka təki nawzaɓ-Maŋgəlva na Daya Maŋgəlva namə,

¹¹ məɓuh mokum vi ənziya egge na Nabukondonozor məlĩ na Babilon gəm na Baltasar wətəni, vi ənziya net dəsangən va ənziya na disiŋ aka dəlvafuŋ.

¹² As kan na Daya wapsəm ɓəɓəla, wokol haramə; waməsam madaran ara zeŋgile na Nabukondonozor, məlĩ na Babilon gəm ara zeŋgile Baltasar wətəni, waməgəɗ sit wəza addəv ənziya diyɗa, wamərah kinenek ama hereti.

¹³ Məɓuh mokumə'e sən Daya Maŋgəlva namə vimə, vi məgəɗək mbərayən aza Daya Maŋgəlva namə, vi hã kakaŋka herɗe gəm ədagədəv na Daya dəkkpaŋgaŋ səkam ɓa.

¹⁴ Əbayman na, kəŋɗanəngən an məverin naddəv ɗerewel məs məslən sukum vi ɗiy dəɗiyaŋgən marava aka mambray addəv gəla na Daya pay əzləra mãy aka pay an dəslə aza aska.

Əkkama nawɗi marava gəm nawkõho ( 1:15—3:8 ) Əsən mbərayən

¹⁵ Kənahaŋgən na: Təstəs na aza Maŋgəlva nawi, ya nam na wil aram pa'ə, va adawla pay dəpaŋka! Wil ara ɗəf na Yuda gəm aret ɗiy na Yerusalem,

¹⁶ aret məlyeŋge namə, aret deyeɗe namə, aret məsdəlveŋge namə, aret məskəleŋɗe namə gəm aret efiŋgiɗmə.

¹⁷ Vi məgəɗək mbərayən aza Daya,

¹⁸ məzban an adawnah səm ɓa, məprəm ma Daya Maŋgəlva nam məs dənah səm nawdaw va azet mahenziŋɗe məs aɗi abam ɓa.

¹⁹ Təŋ səza pay Daya agilgit efiŋgiɗim sə Eziptə hã gap pay dəpaŋka, məppan gabba əggbak ma Daya Maŋgəlva nam ɓa, məsmayək daprəm mani.

²⁰ Va adawla pay dəpaŋka'e, wərayɗe azbamənka gəm mahanay məs Daya aɗi wən nan də ma gawla nan Moyis, gala agilgit efiŋgiɗim səka dələv na Eziptə vi kapsəm dələv məs moŋvo də amama assoŋ akan lokloku.

²¹ Məprəm ma Daya Maŋgəlva nam va aza əpel net məskəleŋɗe məs asləŋ səm ɓa,

²² yaŋ məl nawaydi pak əzban əɗɗum na makra daryaw, əɗɗa wəza sit meŋgilveɗ meɓɓeti, əɗɗa an mbərayən ama hara Daya Maŋgəlva namə.