Əŋɗa 36 - Bible en Guidar

Tive nawɗi zil net gil en məzəmaŋ gəla

¹ Yaŋ migil gəla en zev Galad wətən Makir, Makir wət Manase səddəv mahəlfa maɓɓan na Yosef, azzoŋ abet may Moyis dit ɗiy gugriɗ na mahəlfa na Israyel. Atəŋgən əpele, aɓɗaŋ na:

² «Yawe aɗiyək wən nan sən daya naram na, dəpsitigən dələv sit mə Israyelɗe, kawɗakan də vẽpəlwa. Yaŋ daya naram arah tive napsit haran na məlməm Selofehad sit kirtin muguluŋgiti.

³ Ya mbaraka na, an aɗiyaŋgək ɗəf na mahəlfa maɓɓan net mə Israyelɗe na, karslani hara dələv net səza haran net efiŋgiɗmə, kawsapan aza haran na mahəlfa məs gil vet addoŋ addəvən; karslani səza haran namə.

⁴ Pay wəzləra nawzaɓan ənziya adawgap sit mə Israyelɗe na, haran net wasap azan na mahəlfa məs addoŋ addəvən, karslan səza haran na mahəlfa net efiŋgiɗmə.»

⁵ Yaŋ Moyis apel wən sit mə Israyelɗe dəka an Yawe aɗi wən nani, amna: «Əpel net kirtin mahəlfa na Yosef də tiven apeleŋgi.

⁶ Əpel an Yawe aɗi wən nan sit kirtin Selofehad muguluŋgitiŋ yaŋka, amna: Waɓapaŋ əɗi zil məs dəgəm heret pakə, ya hara kan na, ɗəf van dəsan mahəlfa na efiti.

⁷ Vasna, hara dələv net mə Israyelɗe aggar na səza mahəlfa mbərən aza mahəlfa mbərən ɓa; vi mə Israyel pak dəsangən ziw ɓəlɓəl a gəlan aka hara dələv na mahəlfa net efiŋgiɗni.

⁸ Waŋ akən təzəmgəla aza hara dələv addəv mahəlfa taka səret mahəlfaɗe net mə Israyelɗe na, ɗəf na məlma naddəv mahəlfa na afət kaka' tədawɗiya. Vasna mə Israyelɗe wassoŋ də hara dələv net efiŋgiɗit ammba veti, nawaydi pak də haran nani.

⁹ Hara zəga nawzəmgəla aggar na səza mahəlfa maɓɓan aza mbərən ɓa, mahəlfaɗe net mə Israyelɗe wassoŋ awan pak faɗ aka haran nani.»

¹⁰ Va Yawe aɗi wən nan sən Moyisi, vaski Kirtin Selofehad muguluŋgit aɗɗaŋgə.

¹¹ May Mahla, Tirsa, Hogla, Milka, Nowa kirtin Selofehad muguluŋgit aɗinin kirtit madiyeŋgitti.

¹² Vasna aɗiyinik ɗiy naddəv məlma net kirtin Manase wətən Yosef. Hara zəga nawzəmgəla net asanək addəv mahəlfa məs məlma na afit asan addəvən.

¹³ Eskiŋ wənɗe dit tiveɗnanziya məs Yawe aɗi wən nan sit mə Israyelɗe dəza Moyis, a təki məpəlayya na Mo'ab, ama Yurden dakadaka də Yeriko.