Əŋɗa 34 - Bible en Guidar

Met meŋge na kana'an

¹ Yawe apel sənək Moyis amna:

² «Aɗi wənəŋ abet mə Israyelɗe, kənah sitgən na: pay kəltoŋgoŋ aka dələv na Kana'an na, dələv an nawsan ka nokum yaŋka: dələv na Kana'an dit meŋge nan vaŋka.

³ Kəla dohoŋ na, meŋge nokum dətəŋgaŋ də kapta-muyã na Sin, dəlgən pakpak dəza Edom. Dəmmba pay nampum na, məŋge na kəla dohoŋ dətəŋgaŋgən səza metteɓ ma pehe na bətuwa.

⁴ Siske na, meŋge nokum dədoɗoŋgən də dohoŋ na əpeŋ net Hərziyeɗi, dətoŋgoŋgən a Sin, kawgap a dohoŋ na Kades-Barneya, kamsak əmbat kəla Hasar-Addar kawtoŋ a Asmon.

⁵ Sə Asmon na, meŋge dədoɗoŋgən kəla məlpa na Eziptə dəmbataŋgən əbot a pehe naddak təkiya.

⁶ Ka meŋge nammba pay na moskoy na, pehe naddak təkiya dəsan sukumgən ka meŋge; vas meŋge nokum na kəlammba pay na moskoy adassoŋgu.

⁷ Meŋge nokum na kəla disiŋ yeŋki: kəziningin təŋ sə pehe naddak təkiya hã gap mossorgo na Hor.

⁸ Səza mossorgo na Hor na, kəziningin hã a Lebo-Hamat. Dəgapaŋ a Sedad,

⁹ Demsakaŋgən əmbat kəla Zifron kadda əgap a Hasar-Enan. Vas meŋge nokum na kəla disiŋ adassoŋgu.

¹⁰ Meŋge nokum na, kəziningin sarara sə Hasar-Enan hã a Sefam.

¹¹ Sə Sefam na, meŋge dəpurkoŋgən aka Ribela, dəmmba pay nampum na Ayin, siske dəpurkoŋgən hã ŋgbusl a ma busgum nammba pay nampum na pehe na Kinneret,

¹² dəpurkoŋgən əmpa əzban Yurden kadda əbaymet a pehe na bətuwa. Vas dələv nokum adawsan, dit meŋge en dətərwəsləni.»

¹³ Moyis aɗiyək wənəŋ sit mə Israyelɗe də ənah sit na: «Aski dələv məs kədawrəhaŋ ka nokum nawɗakan də vẽpəlwa, dələv məs Yawe aynan napsit mahəlfaɗe vaytak gəm sən wəɗak na mahəlfaŋka.

¹⁴ Vi, mahəlfa net kirtin Ruben də məlma nani gəm mahəlfa na Gad də məlma nani, may wəɗak na mahəlfa na Manase na, net arəhaŋgək haran net səkay.

¹⁵ Mahəlfaɗe suleski gəm wəɗak na mahəlfa nak na, arəhaŋgək haran net dəgar ki Yurden, dakadaka də Yeriko, dəmmba pay nampum.»

Iya net ɗiy en uɗak zəga asan ammba veti

¹⁶ Yawe apel sənək Moyisi, amna:

¹⁷ «Iya net ɗiy en napsukumən hara dələv nokum yaŋka: Məsdələv Ele'azar də Yosuwa wətən Nun.

¹⁸ Kəgəmaŋgən əmpa daya taka taka səddəv mahəlfa pak napsit hara dələv net ɗiyi.

¹⁹ Iya net ɗiy vet yaŋka: səddəv mahəlfa na Yuda: Kaleb wətən Yefunne.

²⁰ Səddəv mahəlfa na Simeyon: Semuwel wətən Ammihut.

²¹ Səddəv mahəlfa na Benyamin: Elidad wətən Kislon.

²² Səddəv mahəlfa na Dan: Daya na, ndeni Buki wətən Yogli.

²³ Səddəv mahəlfa na Manase wətən Yosef: Daya na, ndəni Hanniyel wətən Efod.

²⁴ Səddəv mahəlfa na Efrayim: Daya na, ndeni Kemuwel wətən Siftan.

²⁵ Səddəv mahəlfa na Zabulon: Daya na, ndeni Elisafan wətən Parnak.

²⁶ Səddəv mahəlfa na Isakar: Daya na, ndeni Paltiyel wətən Azzan.

²⁷ Səddəv mahəlfa na Aser: Daya na, ndeni Ahihud wətən Selomi.

²⁸ Səddəv mahəlfa na Neftali: Daya na, ndeni Pedahel wətən Ammihut.»

²⁹ Eskiŋ ɗiy en Yawe aɗi sit wən nan napsit hara dələv net kirtin Israyel aka dələv na Kana'an.