Əŋɗa 11 - Bible en Guidar

Mə Israyelɗe a Tabera

¹ Təl taka na, ɗiy atəŋgənək əɓuh meti, zə Yawe dənnek daprəmən ɓa. Gədəv Yawe adək diyɗa daprimti. Offo na Yawe asəɗək aweleŋti, azəmək metteɓ ma dibirgidiki.

² Ɗiy ahəmaŋ sənənək Moyisi, yaŋ Moyis akkaman Yawe viyti; offo nak azibi'i.

³ Məlvani təki van na Tabera, vi offo na Yawe asəɗək aweleŋti.

Ɗiy tay əŋglaŋ sluwa

⁴ Vəren armek ɗiy-ɗar naweleŋti, mə Israyelɗe zək net amsakaŋgək ətəŋ wəhəma: «naway napsəm slu nampər di?

⁵ Mənam tat əɗɗumet kilif en mədawzəm na mekeleŋ a Eziptə, tassekeɗi, təreŋreŋɗe, sləma mandava, alabasar, kəremɗe!

⁶ Yaŋ kakaŋ na, mawəlam tay əŋkəla; tay mədawla balsən manhu ɓa.»

⁷ Manhu van agilik səɗek va kirtin tassaka-na-bekne; babar va telembe na wəlaŋga.

⁸ Ɗiy ətrayaŋ əndanəni; siske na, ndəɗaŋ əŋkənən aka buna awaniɓa ərgan a saŋga; ndəɗaŋ ədan addəv mesteɓe awaniɓa əɗɗa peŋ-məsleprekeɗe dendəni. Nenek nan agilik va na gəpa məpəpəla.

⁹ An minɗe aziyaŋgək aka dibirgidik dəfɗa, manhu əzi adak tamə.

¹⁰ Moyis aprim ɗiy əhəmaŋgə, məkkelit aza məlma na ziti, naway di pak a metive gizlirke nani. Gədəv Yawe adək diyɗa, Moyis awlak na mbərayni,

¹¹ Moyis aɓsən Yawe na: «Vimi kəgəɗ mbərayən sən məgəɗ wəza nok di? Vimi nəray a mahorok ka kəkrək sugən gagdak net ɗiyən pak akaw di?

¹² Intə nəɗi daway net ɗiy vetiŋ pak sa? Awaniɓa intə nəwe ka kənah sugən na: aslet a mokrok va məzudəɗaŋgək tədawslan muzliya, nəkegən aka dələv məs kinan napsit afigiɗti sa?

¹³ Səŋga nədawrəh slu napsit ɗiy məzəzbawən pakeŋ də əhəm gəm wənah su na: Apsəm slu nampəraŋ di?

¹⁴ In takərguw na, nəɓap na wəslet ɗiyiŋ pak ɓa. Vi gagdak net adayək kiywa!

¹⁵ An vas kədaɗɗa də in na kamə ɗəɗah abaywa! An kəɗɗak moggon nok viyu na, nədawla əray naw ɓa.»

¹⁶ Yawe aɓsən Moyis na: «Akkelet su ɗiy kaklaw buhul səret ɗiy məsɓet na Israyel, məs kəsən na ɗiy məsɓet net ɗiyiŋgə gəm məzuverɗe neti. Kəkegin a gizlirke nalma də Maŋgəlva də ziwengin də is adaka.

¹⁷ Wanəpriki, wanəpel də is adaka. Wanəkay səza əmpəs məs dəsan azoko, wanəɗi aketi, asna wakəslanən gagdak net ɗiy vet matakə, matakərguk kədawslan əmpa ɓa.

¹⁸ Kənah sitgin ɗiy na: Məsla zukum ammba mazayən! Wakəzəmaŋ sluwa, vi əhəm nokum dawnah na: Naway napsəm slu nampər di? A Eziptə na ənziya nam nenekaɓɓaŋ na! Agapək a sləma Yawe. Yawe wapsukum slu van kana, wakəmpərəni.

¹⁹ Ammba pay taka, may sula kaka', may nasɓəta sle', may kəlawə, may kaklaw sula kərahaŋ na nawzəm ɓa.

²⁰ Sluw kədawzəmaŋ hã təla taka zamə, gap ndən mokum mãhə, hã ndən əgilyen də məŋkənkum nzitnziti. Aski əzga' nokum vi kəzelenən Yawe məs dəsan awalaŋkum, də əɓuh mokum aban na, kami kəgulyoŋ sə Eziptə di.»

²¹ Moyis amna: «Məzəlpaŋ mədawaŋ də tilit nəsaw aweleŋtiŋ tahəŋ zəga na gabal səkat sləre, yaŋ nok kəmna: Nəpsitgin slu dəzəmaŋgən gap təla ŋgbuɓɓo!

²² Kəta mətaw wəlet timeŋgiɗ namə may gilew nam dit wasliɗe nam pak na, wasan sit mək sa? Ya kəta mərme kilfeŋge na pehe gərak, as wasan sit mək sa?»

²³ Yawe azlan sənək Moyis na: «Va Yawe duɗukkoy sa? Ya kakaŋ na wakula an əpel naw nəpel sukəŋ wagəɗə awaniɓa agəɗ na ɓa.»

Maŋgəlva tay əpsit əmpəs nan sit ɗiy məsɓet kaklaw buhul

²⁴ Moyis viti, aman əpel na Yawe sit ɗiyi. Siske akkelet ɗiy məsɓet na Israyel kaklaw buhul, aziwgit tərwəsl ki gizlirke.

²⁵ Yawe prik addəv slaybuna, anah sənək Moyisi. Yaŋ agəm əmpəs səzani apsit ɗiy məsɓet kaklaw buhul naka. Səza əmpəs van aprik aket na, atəŋgaŋgək əɗɗa kəleŋ, ya dəzzekenen ɓa hara.

²⁶ Ɗiy sula, anet may Eldad də Medad, məs iya net aret ɗiy məsɓet kaklaw buhulu, abeweŋgək a dibirgidik, məza əddoŋ addəv gizlirke ɓa. Əmpəs aprik aketi'e, aɗɗaŋgək kəleŋ a dibirgidik.

²⁷ Yaŋ wiyən anzan əssak sən Moyisi. Amna: «May Eldad də Medad tahəŋ əɗɗaŋ kəleŋ a dibirgidiki!»

²⁸ Yosuwa wətən Nun, məs dəgəɗ wəza təŋ səka gawla nan aba Moyis azlanək aka wən nan na: «Moyis, daya nawa ateke!»

²⁹ Moyis azlansənka, amna: «Kotorok naw kədaɗɗa sa? Ya kəta ɗiy na Yawe dəssoŋ məskəleŋɗe məs aprikgin əmpəs nan aket pakə!»

³⁰ Yaŋ Moyis dit ɗiy məsɓet na Israyel kaklaw buhul nek amndoŋ a dibirgidiki.

Daya aslinik gbegberwekɗe

³¹ Yawe asilginək səmyã, akiyik gbegberwekɗe sə pehe, akgbo'ik a dibirgidiki. Ki dibirgidik tərwəsl pak ndəɗaŋ, gala nasɓəta hurruɓ ədaw dəkki ɗəf azi haran pakə, ake zit laplap gap metər taka.

³² Pay dəpas na, ɗiy asɓətaŋgək huruɓ aka tilti, kim hã vit pummo nan aka ənde gbegberwekɗe. Ɗəf məs dəndə diyɗa ɓa na, arahək siɗɗike nan sak kaklaw sula, aweɗinik təki pak, ki dibirgidik tərwəslə.

³³ Sluw tay aberet tagayɗa, dəgrakənən əmpəran ɓa leŋgə yaŋ gədəv Yawe adə aketi, aki tatwãh gədak aket ɗiyi.

³⁴ Yaŋ məlvan təki vanəs na Kibrot-Ta'awa, va ənah na, magamas net məzəvreŋɗe, vi adak məndik ɗiy net en məzəvreŋɗe.

³⁵ Sə Kibrot-Ta'awa na, ɗiy mbataŋ a Haserot, assoŋ a Haserot adaka.