Amos 7 - Bible en Guidar

Ulaɗe temtem sle'i ( 7:1—9:15 ) Ula na Amos madədaabəŋ: zaray

¹ An Yawe Maŋgəlva arbəsu yaŋka: Zaray awək diyɗa aka zlalwa adawtəŋ əndufo, zlalwa an dədawndəf dərɓaga əbəl na Məlyã.

² Səza zaray azəm geslembeɗ naka dələv beymeti, yaŋ nəmna: «Kamə, Yawe Maŋgəlva, avvuyon mambraya. Vas ɓa na mbar Yakob adawɓəsən di? Vi məddakni.»

³ Yaŋ Yawe addəɗan əɗɗum nani: «Zəga van agəɗ na əmpa ɓa», Yawe anahə.

Ula masula'ən: offo

⁴ An Yawe Maŋgəlva arbəsu maɓɓan yaŋka: ayak offo kawtawwən dəndən; yaŋ asa'ẽt iŋkile na delŋgeɗek, azəm dəlva.

⁵ Nənah kan na: «Yawe Maŋgəlva, kamə aziwgini. Vas ɓa na, mbar Yakob adawsilyen di? Vi məddakni.»

⁶ Yaŋ Yawe addəɗan əɗɗum nani: «Zəga van agəɗ na əmpa ɓa», Yawe Maŋgəlva anahə.

Ula mohoko'ən: Helege nawziwgin ərka sarara

⁷ An arbəsu maɓɓan yaŋka: Daya tay ziwwe aka zlava mərkan də pəlu movoto, pəlu movoto avan kãwwã.

⁸ Yaŋ assohõn maw na: «Miy kədawla di, Amos?» Nəzlan na: «Pəlu movoto.» Yas Yawe amna: in yakəŋ əɗi pəlu movoto addəkit ɗiy naw mə Israyelɗe, vi nəzban na ula sasãhit əmpa ɓa.

⁹ Wanəɓzlu gəla net tuyeŋge net kirtin Isak. Gəm gəleɗe salalaɗe na Israyeləŋki wassoŋ ka kiməskiya, Ya wanəsil əwak sən gəla na Yerobo'am də masalam.

Mərɓahani Amos sə Betel

¹⁰ Amatsiya, məsdələv na Betel agapgənək alabaraŋ sən Yerobo'am məlĩ na Israyel, də wənah na: «Amos tay əŋgla ərɓohok səka məlĩ na Israyel. Dəlvəŋ aɓəs na əpel na man əmpa ɓa.

¹¹ An Amos van apel yaŋka: Yerobo'am ama masalam adamta, gəm kawsimgiti ɗiy na Israyel, kawsimgiti səka dələv neti.»

¹² Amatsiya aɓsən Amos kan na: «Məzula dok səŋka, anzok aka dələv na Yuda, kərahgən zəga nawzəm nok adaka gəm kəɗɗagən kəleŋ nok adaka.

¹³ Ahəŋ a Betel na, kədawtəpsən əpel na kəleŋ əmpa ɓa, vi gəla salala ndak na məlĩ yi, gəla nani yi.»

¹⁴ Amos azlan sən Amatsiya aɓsən na: «Məskəleŋ nan ɓa, wət məskəleŋ nan ɓa'e. Naw na, məzutaɗ wasliɗe may məzəbəlan zit korvoŋɗe nani.

¹⁵ Yawe yi dəgəmu səmet gilewi, yaŋ Yawe anah su na, dok agəɗ kəleŋ sit ɗiy naw mə Israyelɗe.

¹⁶ Kakaŋ na aprəm əpel na Yawe, is mənah na, kəpel na əpel na kəleŋ aka Israyel gəm kəpar na wən aka gəla na Isak ɓa kəŋkə.

¹⁷ An Yawe anah yaŋka: Guluk nok watəkkpaŋ məpolkoyok a walaŋgəla-metiŋ, kirtuk mezeŋgleket dit muguluŋgit pak waskotoŋ ama masalam. Gulyeŋge nok pak kawɗeketi əslet dəsle də helege. Is sən kiyuk kpak wakəmtə aka dələv net ɗiy dəsənən Maŋgəlva ɓa, ɗiy na Israyel tam kawsimgiti disim səka dələv neti.»