Əgilye 5 - Bible en GuidarMay Moyis də Aron almaŋgək də Məlĩ na Eziptə ( 5:1—11:10 ) Moyis də Aron ana Farawən da 1 Sissiŋgi may Moyis də Aron azzoŋ anah sənən Farawən na: «Yaŋ an Yawe Maŋgəlva na Israyel anahə: Appet ɗiy naw dəmbataŋ wəɗɗa əzləra a kapta-muyã aka iya nawa.» 2 Farawən amna: «Naway Yawe hara nəprəmgən man kappet mə Israyelɗe dəmbataŋgən di? Nəsən Yawe ɓa, ya lah na, nəppet na mə Israyelɗe dəmbataŋgən ɓa.» 3 Aɓɗaŋ na: «Maŋgəlva net mə Ibriɗe arbanək zən azamə; kamə appam əmbat malaka nasɓəta hoku aka ədaw a kapta-muyã, kawzaɓ-Maŋgəlv sən Yawe, Maŋgəlva namə, an vaski ɓa na wabayəm də gəbay merma awaniɓa də masalam.» 4 Məlĩ na Eziptə aɓsit na: «Moyis də Aron, vimi kədaŋglaŋ əzergit ɗiy səma wəza net di? Məmndoŋ ama wəza na balam nokum!» 5 Farawən amna: «Mula, kakaŋ ɗiyiŋ awanən kiyit aka dəlva, mokum aka əbewgit səma wəza na balam net sa?» Farawən tay ətatwahan wəza net mə Israyelɗe 6 Dəpaska'e ləŋ, Farawən aɗi wən nan sit ɗiy məzulanən wəza na waleŋgit ɗiyi gəm sit məzuvereŋ nan də wənah na: 7 «Kədapsitin mə Israyelɗe tərɗa nawbay menekeɗe va nafɗaŋga, nabes nafɗaŋga əmpa ɓa. Ndəɗaŋ zək net dədaddoŋ əksoməni. 8 Məɗi sit əŋɗa net menekeɗe va lahəŋka, adarreh səzan ɓa. Mətampəlɗeŋgə, vini adawnahaŋ na: Mədam ətaw wəla zəga nawzaɓ-Maŋgəlva sən Maŋgəlva naməŋka! 9 Wəza dərme ɗiyi, dəlpaŋ dəndəni, məza əzga sləma aka əpel nawa wən ɓa!» 10 Məzutaɗnən wəza dit məzuvereŋ nan agulyoŋgu, anahaŋ sitin ɗiy dawnəh na: «An Farawən anah yaŋka: Nəksom sukum na, tərɗa ɓa! 11 Munokumtə naddoŋ əksom tərɗa a təki kədawrahaŋgə! Zəga tay naddəɗ səza wəza nokum ɓa.» 12 Ɗiy nek atərayaŋgək aka dələv na Eziptə pak, kaksom marbaza ka tərɗa. 13 Mətaɗaŋ wəza tay əgəɗ sitini kakara də wənahaŋ na: «Məgrak wəza nokumu! Aza əsɓəta, Məstaka va pay tərɗa asani!» 14 Mətaɗaŋ wəza na Farawən tahəŋ wərgetin məzuvereŋ net mə Israyelɗe, en aɗiyaŋ aket ɗiy neki, də wənahaŋ na: Vimi kəgrakənən ənɗa net mənekeɗe an məɗi wən nan dəpaŋ gəm nafɗaŋga va nabes nafɗaŋga ɓa di? 15 Məzuvereŋ net mə Israyelɗe addoŋguk əhəmaŋ sənən Farawən də wənah na: «Vimi kədawgəɗ sit belemɗe nok vaŋ di? 16 Tərɗa tay adapsitin belemɗe nok ɓa, ndəɗaŋ ənah səmən na: Məbey menekeɗe! Ya awle va adargenin belemɗe noko. Ɗiy nok araygənənka!» 17 Aɓsit na: «Məddakkum kənanaŋgə, məddakkum! Vini kədawnahaŋ na: Mam aka ədda əzaɓ-Maŋgəlva sən Yawe. 18 Ya kakaŋ na, məddoŋ məksom tərɗa kapsukumi ɓa. Menekeɗe, wakəbeynin gba əŋɗa neti.» 19 Məzuvereŋ net mə Israyelɗe awlanənək na, addəv tatwãhəŋgə vi mənah sit na: wəŋɗa net menekeɗe adarreheŋ səza an lahəŋ ama wəsɓəta ɓa. 20 Yas agepin may Moyis də Aron tahəŋ ziwziw kawləm sit gala adawgilyoŋ səza Farawən. 21 Aɓsitin na: «Yawe dula dətawgən wən nani, aka wən akokum, Farawən dit məɗɗaŋ wəza nan met tay aka uləm ɓa; an kəɗɗaŋgəŋ na, as əpsit masalam avet nawbaymi.» 22 Moyis alək aza Yawe, amna: «Yawe, vimi kəzəmgit sahã net ɗiyiŋ di? Ya vimi kəslənu di? 23 Səza nəgap aza Farawən kawpel də iya noko, agəɗək mbərayən sit ɗiyiŋki, ya wəkõh kəkõhgit ɗiy nok ɓa.» |
All right reserved
Bible Society of Cameroon