Əgilye 17 - Bible en Guidar

Iŋkile na Masa də Meriba

¹ Wəsap net mə Israyelɗe pak ambatək sə kapta-muyã na Sin də əzban əteh net va Yawe aɗi wən nani. Aziyənək dibirgidik net a Refidim, iŋkile nawsa net ɗiy tahəŋ ɓa.

² Ɗiy armaŋgək mama aza Moyis: «Aɓɗaŋ na apsəm iŋkile nawsa». Moyis aɓsit na: «Vimi kədarmaŋ mama azaw di? Vimi kədawslanən Yawe di?»

³ Adaka, meme adenik ɗiy; ɗiy ahəmaŋgək də Moyis: «Aɓɗaŋ na, vimi kəgilgəm sə Eziptə ka kappaw əmta sit meme mənamə, kirtəm gəm zəgeɗ memeyẽɗ nam di?»

⁴ Yaŋ Moyis ahəm sən Yawe dawnəh na: «Miy nədaɗɗa viyit ɗiyiŋ di? Abe siɗikke na waskuwəni.»

⁵ Yawe anah sən Moyis na: «Atoŋ abet ɗiy, agəm ɗiy məsɓet səret mə Israyelɗe gəm zleŋge məs kərga Nil dəndən naka, agəm ammba voko, doko.

⁶ Wanəziw abok adaka, aka milɓe a Horeb. Kərgagən milɓe, iŋkile wagulyoŋ sədaka, ɗiy dəsaŋgəni.» Vas Moyis aɗɗa ama haret ɗiy məsɓet na Israyel.

⁷ Yas alvan təki van na Masa gəm Meriba va wənəh na Wəsla gəm ərma mama vi ərma mama net mə Israyelɗe gəm vi aslanən naza Yawe dawnəh na: «Yawe tay a walaŋgəm sa, tay ɓa?»

Mə Amalekiɗe awaksitinik mə Israyelɗe

⁸ Yaŋ mə Amalek azzoŋ əlpa dit mə Israyelɗe a Refidim.

⁹ Moyis anah sən Yosuwa na: «Awel səm ɗiy mezeŋgleketi, agil əddalpa dit mə Amalek; mazayən wanəziw aka dadwar ki mossorgo də zleŋge na Maŋgəlva avawa.»

¹⁰ Yosuwa aɗɗak va Moyis anah sən vi kawgay dit mə Amalek, may Moyis də Aron gəm Hur, apegeŋ aka dadwar ki mossorgo.

¹¹ Ya an Moyis aslan van a disiŋ, asna mə Israyelɗe əkaŋ sitin mə Amalekiɗe; an avoŋgənək van, asna mə Amalek əkaŋ sitini.

¹² Adan va Moyis ayə, agəmaŋgək gərma, aɗiyinən ammbani, ndən ɗew akani, Aron də Hur assoŋ dahãdahã vi kawziwgin vani, vas van asan ziw ɓəlɓəl huruɓ gap pay bətə.

¹³ Yosuwa askak wəla Amalek dit ɗiy nan də masalam.

¹⁴ Yawe anah sən Moyis na: «Aver addəv ɗerewel naɗɗumoni, agapgən sən Yosuwa asləman na. Vi əvvuy nədavvuyon sləma Amalek, səka dəlva!»

¹⁵ Moyis arkək təki nawzaɓ-Maŋgəlva yas alvan na: «Yawe yi gabaga nalpa nawa»,

¹⁶ yaŋ amna: «Adan va ɗəf dəsil aka mazaŋga na Yawe, wəgayi a walaŋ Yawe də Amalek hã faɗə!»