2Tesaloniki 2 - Bible en Guidar

Əpel aka əzza na Krist ( 2:1-17 ) Əɓoŋ an bayma faɗə

¹ Mənam tat ənah sukum milmiŋgiɗwa, dəwəl sən əmilye na Daya nam Yesu Kristu gəm əkkal nam azan na,

² maɗɗulokum adazlzlaɓ go'u gəm əgeslne' aka ərba na kəleŋ mãy əpele, awaniɓa letər mərban sukum va dəde səzam ənah na, pay na Daya agapka ɓa.

³ Ɗəf adawmbəɗokum də tive awandi zlaŋ ɓa, an əppan əzban Maŋgəlva dəde tagay gəm ɗəf mambray wətən əza dərban zən ɓa ɓa,

⁴ ana məzuzele gəm məzuɓaygən ki zən aka zəga məs adawyaŋ maŋgəlva pakə, məs adawgagdakanəni, hã ndən tek ɗew addəv Gəla na Maŋgəlva, əɗi zən na Maŋgəlva yi.

⁵ Kaɗɗumonən na nənah sukumək wən nan aka nədawsaw də munokumɓa sa?

⁶ Ya kakaŋ na, kəsənənək məs dədawtakən darban zəni, vi dərbəgən aka pay nani.

⁷ Vi əɓap məɗama na Məsdaraw tay əɗɗaŋ wəza səkayə, abbər na, an məzutakən kakaŋ dəzarə.

⁸ As kan na, ɗəf mbərayən nak warban zəni, Daya Yesu wabay də əmpəs na mani, wazan də gagdak na əzza nani.

⁹ Ɗəf mbərayən nak wade də gagdak na Satan, wagəɗ wəzaɗe gagdakɗe, sekeneɗi gəm teteleɗe na uwa wəna.

¹⁰ Wambəɗet ɗiy en nawzaŋ də əmbəɗ mbərayən zev awan di pakə, vi dətafnən gəm dəŋgluwən gegesiŋ məs nawkõhgit ɓa.

¹¹ Vini Maŋgəlva aslən sit əɓap nawza, vi dətafəngən tepelke.

¹² Vi wən dəsangən mətawən aket ɗiy məs dətafən gesiŋ ɓa pakə, məs dədannekeŋ də an məs təstəsi ɓa.

Məwelkumi vi kawkõho

¹³ Milmiŋgiɗwa, mənam tat əɗɗa soko sən Maŋgəlva aka wən nokum ɗayɗayə, munokum məs Daya aŋgələ, vi Maŋgəlva awelkumuk dafsən kəkõhoŋgən də Əmpəs məs dədabburkum gəm də ətaf gegesiŋ.

¹⁴ Sən aski ayukum də Alabara Nenek namə, kərahaŋgən gagdak na Daya nam Yesu Kristu.

¹⁵ Vas kan na milmiŋgiɗwa, məmpa təlkum mərma əsərək məs məyagan sukum ɓəlɓələ, an də əpel na mami, an də letər nami.

¹⁶ Daya nam Yesu Kristu zək nani gəm Maŋgəlva Afəmə, məs dəŋgluwmə, dəpsəm əsɓan makram gəm əga moggon də mbəlembəle nani,

¹⁷ dəsɓanən makrokum, dəɓɓəlokumən addəv an kədaɗɗaŋ pakə gəm əpel an moggoni.