2Samiyel 18 - Bible en Guidar

Məskay wəlet məzəlpaŋ na Absalom

¹ Davit aŋɗetik ɗiy en dəndəni, aɗiyək deyeɗe, aket gabalɗe gəm aket səkatɗe.

² Davit apsitik tive sit ɗiy dəmbataŋgəni, agohoŋ ŋgaɓa hoku, taka ava Yo'ab, taka maɓɓan ava Abisay wətət Seruya, məlmən Yo'ab, gəm taka meɓɓet ava Ittay mə Gat. Yaŋ məlĩ anah sit məzəlpaŋ na, naw pak wanəmbat də mənokum.

³ Məzəlpaŋ aɓɗaŋ na: «Owwo! Kəl na də mənam ɓa! Vi an mənzamək na, məzuzelɗe nam maɗɗulet asan na akam ɓa. An abayaŋgək wəɗak nam dayday na, wawlanən va zəga azet ɓa. Is kaka' va mənaməŋ gabal kəlaw səram kənani. Nok dərəŋ na, ɗaɗah asok a walaŋgəla-metiŋ kəɓapgən əslən səm əbbaha.»

⁴ Məlĩ aɓsit na: «An dəsan lew ama horokum pak wanəzbani.» Ndəni məlĩ asan go'o də maddamba na walaŋgəla-metiŋ, məzəlpaŋ tam agilyoŋ vit vit də wəŋɗa na səkat səkatə, gəm na gabalə gabalə.

⁵ Məlĩ aɗi wən nan sit may Yo'ab, də Abisay gəm Ittay dawnəh na: «Daɗah məgəɗ maɗɗula dawrəŋgən Absalom, wətuwa!» Məzəlpaŋ pak aprəmənək an məlĩ anah sit deyeɗe net məzəlpaŋ aka wən na Absalom.

⁶ Məzəlpaŋ agilyoŋguk awra kalma də Israyel. Yaŋ wəgay agəɗ addəvit wəleŋɗe ngərəɓ na Efrayim.

⁷ Məzəlpaŋ na Davit askannək wəlet məzəlpaŋ na Israyel adaka, məskay wəlet dəpas dərwadərwa, zel gabal kaklaw sula məbaya.

⁸ Wəgay atə̃hə̃k dələv pakə, ɗiy en muyã azəm daykiyit en dəmtaŋ ama masalam dəpaska.

Yo'ab abayək Absalom

⁹ Absalom aggbat na tay abet məzəlpaŋ na Davit, Absalom tay aka koropəlsa, koropələs nan toŋ dəmmba wəlaŋga metiŋgin məs kiyvan slakat slakatə, yaŋ muhur kiyən arəm aza kiyva wəlaŋga metiŋgin naka. Alawək tondroŋ aka walaŋ disiŋ də dəlvafuŋ. Koropələs nan tay ədaw əmbata.

¹⁰ Yaŋ ɗəf awla, ambat ənah sən Yo'ab na: «Nulak Absalom tondroŋgo aka wəlaŋga metiŋgini.»

¹¹ Yo'ab anah sən ɗəf dədawboton sən nak na: «Yas kulak na, vimi kəbay adak ngohsa ɓa di? Wanəpsuk koɓeɗ na təbəz babar kəlaw, də maslapa kəta!»

¹² Ɗəf nak azlan sən Yo'ab na: «Ya kəta nərəm koɓeɗ na təbəz babar gabal ammba vaw daydayə, nəslan na vaw aka wətən məlĩ ɓa. Məprəmək də sləmam va məlĩ aɗi suk wən nani, sən Abisay gəm sən Ittay, dawnəh na: “Məsla zukum, ɗəf adawrəŋgən gawla naw Absalom ɓa.”

¹³ Kəta va nəbayəka, in na, nəsən wən nan ɓa, wən tay nawɗam aza məlĩ ɓa, ya is sən kiyuk kpak wakəɗoh zuk səzawa.»

¹⁴ Yo'ab amna: «Maw tay aka əzan pay azok ɓa!» Ande zleŋɗe məpyok met hoku avani, ambat akpe' a makra Absalom, tay tondroŋgo madaran tagay addəv wəlaŋga metiŋ naka.

¹⁵ Gewleɗ kəlaw məndaŋ gulomɗe na Yo'ab, akaraŋ ki Absalom, abaynən zamə.

¹⁶ Sə dərɓagan Yo'ab affon gozloro, məzəlpaŋ appanən ərɓehet məzəlpaŋ na Israyel, vi Yo'ab aziwgitik məzəlpaŋgə.

¹⁷ Agəmənək kigəbay Absalom, azganən addəv vov metiŋgin addəvit wəleŋɗe ngərəɓ a muyã. Akkalanənək korgu kpew aka magamas nani. Mə Israyelɗe pak anzoŋguk naway pak a gizlirke ananda.

¹⁸ Absalom sən kiyən ampək serek gala asan madaran aka walaŋ na Məlyã, vi adawnəh na: «In tat də muzliya nawka sləmaw abe abe ɓa.» Vasna, alvan serek nak aka iya nani, gap dəpaŋ pak tay iyanən əmpa'e na: serek na Absalom.

Tay əkisənən wən na əmta na Absalom sən Davit

¹⁹ Ahima'as wətən Sadok, amna: «Kamə nənzaw ənah sən alabaraŋ sən məlyã, vi Yawe arban sənək moggon nan də əkõhgən səvet məzuzelɗe nani.»

²⁰ Yo'ab aɓsən na: «Vaski ɓa, dəpaŋkəŋ kəsok na ka məkə alabara nenek ɓa. Aga laha kəmbatgəni, dəpaŋkəŋ na, kədawpel wən nan ɓa, vi wətən məlĩ yi dəmtə.»

²¹ Yo'ab anah sən balam mə Etiyopi maɓɓani: «Nok dok anah sən məlĩ an məs kəwəl də horoko!» Mə Nubi nak ɓe' guduk aba Yo'ab, ndən ɓak dinze.

²² Ahima'as wətən Sadok azbanək wən nani, aɓsən Yo'ab na: «Miy naɗɗa di? Kamə wanənzaw əzban mə Etiyopi əŋka.» Yo'ab amna: «Vimi kpak vas di wətuwa? Nok wən kərah gassa ɓa!»

²³ Miy naɗɗa di? Wanənzaw əzbani! Yaŋ aɓsən na: «Asna anzoko», Ahima'as agəmək tive na təki məfiktiw nama Yurden, ndən toŋ ki mə Etiyopi naka.

²⁴ Davit tay ɗewwe a waleŋgit maddambeɗe sula aza zlava na dəlva. Məzuga tek aka təgbalka na memeŋgle, haran le'gəni. Awla ɗəf əzzan dənze.

²⁵ Məzuga nak aslan wəlan kaprəman sən məlyã. Məlĩ amna: «An takərgəni na, wən nenek adawkiya.» Maslən nak tay əzzani, agapək go'o.

²⁶ Yaŋ məzuga nak awəl ɗəf maɓɓan əmpa, ənzan əzzani. Aya məgə ma tive, amna: «Ɗəf yandak ənzan əzzan takərgəni», məlĩ amna: «nan pak wən nenek adawkiya.»

²⁷ Məzuga nak amna: «Ənza na ɗəf maddaabəŋ ndak va na Ahima'as wətən Sadoki yi.» Məlĩ amna: «Ɗəf moggoni yi, wən nenek adawkiya.»

²⁸ Ahima'as vaŋvəl, aɓsən məlĩ na: «Zay yi.» Appu' aba məlyã, amna: «Soko sən Yawe Maŋgəlva noko, vi apsukik ɗiy en dətemeŋ aka daya naw məlyã.»

²⁹ Məlĩ amna: «Gawla Absalom zay yi sa?» Ahima'as azlan səni, amna: «Gala Yo'ab aslən balam nok də in na məlyã, nulek ɗiy ziɓirziɓir diyɗa ya nəsən an dəgəɗ ɓa.»

³⁰ Məlĩ amna: «Azar aziw aŋka. Ndən deder ziwi.»

³¹ Ənziya siɗikke ləŋ, mə Nubi nak agapə; mə Etiyopi nak amna: «Daya naw məlĩ dəprəm alabara neneke! Dəpaŋ Yawe aɗɗa sukuk moggon nan də əkõhguk səmmba vet məs dətemeŋ akoko!»

³² Məlĩ aɓsən mə Etiyopi na: «Gawla naw Absalom zay yi sa?» Mə Nubi amna: «Məzuzelɗe na daya naw məlĩ dit en dətemeŋ akan naɗɗa mbərayən pakə dərahaŋ ammba vet va na gawlaŋka!»