2Samiyel 10 - Bible en Guidar

Ɗiy gugriɗ na Davit mərbə sit wili

¹ Dərɓaga aska, məlĩ net mə Ammonɗe zamə, Hanun wətən dəgəm məlĩ a gəlani.

² Davit amna: «Wanəgəɗ moggon sən Hanun wətən Nahas, va afən agəɗ su moggoni.» Davit aslən ɗiy gugriɗ na wəza nan kaddasɗan namta na afəni. Ɗiy gugriɗ na Davit addoŋ aka dələv net mə Ammonɗe.

³ Deyeɗe net mə Ammonɗe anahaŋ sənən daya net Hanun na: «Azok na, Davit əgagdakan afuk aslin suk ɗiyiŋ nawsokon mokrok sa? Vi kawsən gabba walaŋgəla-metiŋgi, kakkessen va asani gəm kawmõhni Davit aslin gewleɗ nan azoko.»

⁴ Hanun armek ɗiy gugriɗ na wəza na Davit neki, afeɗ eŋgemet hõlyõkko hõlyõkko, ataw lukutɗe net gappa gappa aza way gebbeti, ndən mbəgit addoŋgu.

⁵ Məprəman sən Davit, yaŋ aslən ələmsiti, vi wil adeninik diyɗa. Yaŋ məlĩ anah sit kan na: «Məssoŋ a Yeriko hã an eŋgemekum agulyoŋko asna kəzzoŋgəni.»

Wəgay dit mə Ammonɗe gəm mə Siriɗe

⁶ Mə Ammonɗe təm ulanən na, arayaŋgək ama hara Davit, mə Ammonɗe slən a Aram na Bet-Rehob gəm a Soba ənda məzəlpaŋ də tilit gabal kaklaw sula nawfaɗsiti, məzəlpaŋ na məlĩ Ma'aka zel gabalə, zel na Tob gabal kəlaw kiyən sula.

⁷ Davit apərəm wən nani, yaŋ aslən Yo'ab, dit məzəlpaŋ məs mekret pakə.

⁸ Mə Ammonɗe agilyoŋ ama wəgay gaŋgaŋgə, go'o də maddamba na walaŋgəla-metiŋ. Mə Aramɗe na Soba dit en na Bet-Rehob gəm məzəlpaŋ na Tob dit en na Ma'aka, net tahəŋ awra a təki maɓɓani.

⁹ Adan Yo'ab awla na addak əlpay, ɗiy də bani gəm dərɓagani. Yaŋ awel məzəlpaŋ na Israyel en vet awbəta afuŋ ɓa, assahãŋ heret sek aket mə Aramɗe.

¹⁰ Madembirgit məzəlpaŋgə, appet sən Abisay məlməni, net assahãŋ heret sek aket mə Ammonɗe.

¹¹ Yaŋ amna: «An mə Aramɗe tahəŋ ədayaŋ kiywa, asna kədegən əbbah suwa. An mə Ammonɗeŋ dədayaŋ kiyko, asna intə naddaw əbbah suko.

¹² Ampa təlko, mərbəgən gboŋgboŋ ammbet ɗiy namə, viyit walaŋgəleɗe gugriɗ na Maŋgəlva namə. Yawe dəɗɗa an dəsan lew ama harani.»

¹³ Yo'ab mbat dit ɗiy nan abe aket mə Aramɗe kawgaya; yaŋ anzoŋ sənəni.

¹⁴ Adan mə Ammonɗe awlenin mə Aramɗe adanzoŋgu, ndəɗaŋ ɓak səba Abisay tamə, ndəɗaŋ toŋ a walaŋgəla-metiŋ. Vasna Yo'ab buryok səmmbet mə Ammonɗe, ndən pay a Yerusalem.

¹⁵ Adan mə Aramɗe awlanən na, mə Israyelɗe askanənək wəleti, ndəɗaŋ kakal pakə.

¹⁶ Hadadezer aslən azet mə Aramɗe na dəgar ki Efrat dəzzoŋgəni. Ndəɗaŋ pay a Helam. Sobak daya net məzəlpaŋ na Hadadezeri abeti.

¹⁷ Mənah səni Davit, yaŋ akkelet mə Israyel pakə, aggaraŋ ki Yurden, ndəɗaŋ pay a Helam. Mə Aramɗe assahãŋgək aba Davit. Agayaŋgək dəndəni.

¹⁸ Mə Aramɗe ɓak səbet mə Israyelɗe. Davit aŋgroɓik mawteɗ net pilseŋge nawgay səkat buhul dit ɗiy eddivti, gəm məpeŋgeŋ pilseŋge gabal kaklaw poɗo; məɗi səni vaŋvi sən Sobak, daya net məzəlpaŋ net mə Aramɗe, ndən zam adaka.

¹⁹ Milyeŋge nammba va Hadadezer awlanən na mə Israyelɗe askanənək wəleti, akayaŋgək əsler dit mə Israyelɗe gəm aɗɗaŋ sitinik wəza. Geslne armek mə Aramɗe dazzo əkõhgit mə Ammonɗe.