2Milyeŋge 8 - Bible en Guidar

Wəgrak na alabara nat mə Sunemkə

¹ Elisa apel sət ɗak məs ambəlgən wətət nakə, amna: «Asili, dok dit ɗiy nok pakə, asim a təki kəŋgəl kədasme pakə, vi Yawe waki maya, wagəɗ wəzva buhul aka dəlva.»

² Guluk nak təsilke, təɗɗak va ɗəf na Maŋgəlva anah sət naka: Təsimik dit ɗiy nata, asmeŋgik aka dələv net mə Filistiɗe ammba wəzva buhulu.

³ Aza əgrak na wəzva buhul nak na, ɗak nak təmil səka dələv net mə Filistiɗe naka. Təmbat əhəm sən məlĩ aka wən na gəla nat də guli nata.

⁴ Məlĩ tay əpel də Gehazi məgəɗ wəza na məskəleŋ na Maŋgəlva dawnəh na: «Əŋga abotet su zəgeɗ gugriɗ məs Elisa agəɗ pakə!»

⁵ Aka adawboton va Elisa ambəlgən ɗəf dəmtə sən məlĩ, guluk məs ambəlgən wətət nak yakəŋ əhəm sən məlĩ aka wən na gəla nat də guli nata. Gehazi amna: «Daya naw məlyã, guluk vat yakəŋkə, wətət məs Elisa ambəlgən van yaŋka!»

⁶ Məlĩ assõhõnək mat guluk nakə: Təboton sənəka. Məlĩ apsət məzəlpa taka, də wənah sən na: «Dəmndeget sətən zəgeɗ nat pakə, zəgeɗ minset a guli van səza təppan dəlvəŋ hã gap kakaŋka.»

Elisa də Hazayel

⁷ Elisa mbat a Damas, mbara Ben-Hadad, məlĩ na Aram gbəgba'i yi. Mənah sən məlĩ na: «Məskəleŋ na Maŋgəlva adek hã aŋka.»

⁸ Məlĩ anah sən Hazayel na: «Agəm əvəl avoko, dok ərəh ɗəf na Maŋgəlva əŋka: kəkkamangəni, dəttokongən Yawe dawnəh na: “Wanəmbəl səka gbəgba'əŋ sa?”»

⁹ Hazayel al ərəhni, agəmək əvəl avani, zəga an moggon moggon na Damas pak aket zlogomeɗ kaklaw poɗo. Al əziw aba Elisa, amna: «Wətuk Ben-Hadad, məlĩ na Aram dəslənu azok dawnəh na: “Wanəmbəl səka gbəgba' nawəŋ sa?”»

¹⁰ Yaŋ Elisa aɓsən na: «Dok ənah səni: “Gesiŋ wakəmbələ,” ya naw Yawe arban su na, əmta adamta.»

¹¹ Ndən haran sekke ɓatɓat ŋgbərõõ; ɗəf na Maŋgəlva nak ahəmə.

¹² Hazayel amna: «Vimi daya naw adawhəm di?» Elisa azlan sən na: «Vi nəsənək mbərayən an kədawgəɗ sit mə Israyelɗe: wakəzle walaŋgəleɗe na korgu neti, wakəbey kirin gewleɗ net də masalam, wakəŋkin kirtit kirtiti, wakəbek gil net en də daway.»

¹³ Hazayel amna: «Mbarmbar balam nok kəra ɗar adaɗɗa zəga gədak vas di?» Elisa azlan səni: «Yawe dərban su na, wakəsok məlĩ aka Aram.»

¹⁴ Ndən zar səza Elisa, ndən pay aza daya nani, daya nan assohõn na: «mbar Elisa van anah suk di?» Azlan sən na: «Anah su na: wakəmbələ.»

¹⁵ Vit pummo nani, Hazayel gəm zəga nawsərəta, ayop aret iŋkile, ndən aka hara məlĩ nak pak əpakən yaŋ amtə. Hazayel azəm məlĩ a gəlani.

Milyeŋge na Yuda dit en na Israyel ( 8:16—17:4 ) Yoram, məlĩ na Yuda

¹⁶ Aka wəzva masle'e na Yoram wətən Akab aka məlĩ na Israyel na, Yosafat tay məlĩ a Yuda; yas Yoram wətən Yosafat məlĩ na Yuda agəm məlyã.

¹⁷ Pay agəm məlĩ na, tay də wəzva kaklaw hoku kiyən sula, azəm məlĩ wəzva dodopoɗo a Yerusalem.

¹⁸ Azbanək təlit milyeŋge na Israyel, va gəla na Akab agəɗə, vi wətən Akab tə guluk nani. Agəɗək zəga mbərayən a mahara Yawe.

¹⁹ Yawe dəŋgəl əzan Yuda kəta ɓa, aka wən na gawla nan Davit, vi anah sənək lahəŋ na, wapsit lalam sit kirtin ka faɗə.

²⁰ Aka pay nani yi Edom aɓoŋ səmmba va məlĩ na Yuda, aɗiyaŋ məlĩ neti.

²¹ Yoram alək a Sayir dit mawteɗ nalpa nan pakə. Asil də dəfəɗ dit deyeɗe net mawteɗ nawgaya, abey mə Edomɗe dəkaraŋ kiynəŋki; məzəlpaŋ na Yuda anzoŋ anet da.

²² Də as pak Edom aɓoŋguk aka Yuda gap pay dəpaŋka. Aka pay nani Libna pak aɓoŋgu.

²³ Madembirgit alabaraɗe na Yoram, də an agəɗ pak na, ndəɗaŋgə məverit addəv ɗerewel na Wəza net milyeŋge na Yuda ɓa sa?

²⁴ Yoram amtəka, məndəkni azet efiŋgiɗin a walaŋgəla-metiŋ na Davit. Akaziya, wətəni yi, dəzəm məlĩ a gəlani.

Akaziya, məlĩ na Yuda

²⁵ Wəzva makəlaw kiyən sula na Yoram wətən Akab aka məlĩ na Israyel, Akaziya wətən Yoram, asan məlĩ na Yuda.

²⁶ Akaziya tay də wəzva kaklaw sula kiyən sula, pay agəm məlyã, azəm məlĩ wəzva taka a Yerusalem. Iya nat man na Atali; wətən Omri, məlĩ na Israyel tə.

²⁷ Azbanək ənziya na gəla na Akab, agəɗək mbərayən a mahara Yawe va na gəla na Akab agəɗə, vi aɗiytək wətən Akab vani.

²⁸ Ambatək də Yoram, wətən Akab, kawgay də Hazayel, məlĩ na Aram a Ramot na Galad. Mə Aramɗe aɗiyaŋgək vaŋvi aza Yoram.

²⁹ Məlĩ Yoram amilik iynan huuwa nan a Yizrel, məs mə Aramɗe abəlanən a Rama pay adawgay də Hazayel, məlĩ na Araməŋka. Yaŋ Akaziya wətən Yoram, məlĩ na Yuda ambat a Yizrel kawla Yoram wətən Akab, vi tay əzəmsahã.