2Milyeŋge 7 - Bible en Guidar

¹ Elisa amna: «Məprəm əpel na Yawe: An Yawe anah yaŋka: Mazayin va kakaŋka, kalbəhi gəpa kilo kəlaw kiyən sula, awaniɓa haykəmari pepreŋ kilo kaklaw sula kəyən poɗo aka koɓo taka taka a Samari.»

² Mərəm baray na məlĩ məs adawges aka van azlan sən ɗəf na Maŋgəlva, amna: «Ya kəta Yawe dəppur təki a disiŋ foŋgo foŋgo na, zəgas wagəɗ sa?» Yaŋ amna: «Is yakəŋkə, wakula də horoko, ya kəzəm na ɓa.»

Məppani dibirgidik net mə Aramɗe

³ Ɗiy tahəŋ poɗo məskokoleɗi, go'o a mahara gəla. Apeleŋ a walaŋ zit na: «Vimi məsam aŋ əga əmta nam di?

⁴ An mənahək na: “mətoŋsəm a walaŋgəla-metiŋ,” may tay a walaŋgəla-metiŋ waməmtə adaka. Ya an məsamək aŋka, waməmtə'e. Ya kakaŋ na, daɗah mədam mətoŋsəm a dibirgidik net mə Aramɗe əŋka; an appamənək madaramə, waməsam madaramə; an wabayməni, asna dəbayməngəni.»

⁵ Asilyoŋguk də pay mbil mbili, kawmbat a dibirgidik net mə Aramɗe naka, ndəɗaŋ gapaŋ a dibirgidiki ya ɗəf təttaka tay adak ɓa.

⁶ Yawe aprəmanək ɓaɓəlmet mawteɗ nalpa, ɓaɓəlmet pilseŋge gəm ɓaɓəlmet məzəlpaŋ diyɗa a dibirgidik net mə Aramɗe. Yaŋ mə Aramɗe anahaŋ sənən zit na: «Wasan məlĩ na Israyel afaɗ sitik may məlĩ na Hitti də an na Eziptə kazzoŋ akamə.»

⁷ Pay gimbil gimbil nak asilyoŋ anzoŋ appetin gizlirkeɗe, pilseŋge, korɗe, mbagənən dibirgidik va asani: anzoŋ vi kawkõhgən zeŋgileti.

⁸ Məskokoleɗ nek abbalanənək dibirgidik pakə, atoŋgoŋ addəv gizlirke maɓɓani; ndəɗaŋ namnamə, asaŋgə, andetin təbəz babar də an na meleŋge sədak gəm lukutɗe, addoŋ əɗametini. Amndoŋ əmpa, atoŋgoŋ addəv gizlirke maɓɓani, andetin zəgeɗ sədak addoŋ aɗametini.

Əgrak na əsərŋgəsl təkiya gəm na mayã

⁹ Apeleŋ a walaŋ zit na: «Dəndən mədaɗɗan ɓa. Wəsɓəta dəpaŋ, wəsɓəta nanneki yi. An məsamək məpel ɓa hã gap təki dadaŋgə, heslepe wasan akamə. Kakaŋ na, mədamə məprəman səngən gəla na məlyã.»

¹⁰ Azzoŋ eyenin məgaŋ maddamba na walaŋgəla-metiŋ, aprəman sitini, aɓɗaŋ na: «Mətoŋguk a dibirgidik net mə Aramɗe, ɗəf tay adak təttaka ɓa, ɓaɓəlma ɗəf tay ŋgbulu' adak ɓa; abbər ki pilseŋge dit korɗe miyneti, gəm gizlirkeɗe məppeti.»

¹¹ Məgaŋ maddamba ayaŋ eŋgil ana məlĩ da, aprəman sitin eŋgili.

¹² Məlĩ le' də dəfɗa, yaŋ anah sit məɗɗaŋ wəza nani: «Kamə nənoh sukum an mə Aramɗe aɗɗaŋ vimə: asənənək na may tay əbaymə, yaŋ agilyoŋ sə dibirgidik addoŋ əɗamaŋ awra, dawnəh net na: “Pay adawgilyoŋ sə walaŋgəla-metiŋ mərmegin medereti, mətoŋgən a walaŋgəla.”»

¹³ Taka səret məɗɗaŋ wəza azlani, amna: «Kamə dəgəmaŋ pilseŋge sle' səret en dəppaŋ a walaŋgəla-metiŋ ɗa, tahəŋ va ŋgboŋ net mə Israyelɗe en dəppaŋ a walaŋgəla-metiŋ, va ŋgboŋ net mə Israyelɗe dədaddoŋ addəv əddaka. Məslin səmə, mulagəni!»

¹⁴ Ndəɗaŋ hãs mawteɗ nawgay sula dit pilseŋge neti, məlĩ aslin aka betemit məzəlpaŋ net mə Aramɗe, dawnah na: «Məddoŋ mula!»

¹⁵ Azbanənək betemti, ndəɗaŋ gap hã ama Yurden, awlenən lukutɗe aka tive kpororo dit zəgeɗ mə Aramɗe azgaŋ dənza net də kakara. Maslənɗe nek amndoŋ aprəman sənən məlyã.

¹⁶ Yaŋ ɗiy agilyoŋ, appohonən dibirgidik net mə Aramɗe neki: məlbəhi gəpa kilo kəlaw kiyən sula, gəm haykəmari pepreŋ kilo kaklaw sula kiyən poɗo aka koɓo taka taka, va Yawe apel naka.

¹⁷ Məlĩ aɗiyək mərəm baray məs adawges aka van ka daya; ɗiy andərəslənək aza maddamba hã zam va ɗəf na Maŋgəlva apel aka məlĩ ambat azan naka.

¹⁸ Agəɗək va ɗəf na Maŋgəlva anah sən məlĩ dawnəh na: «Mazayən va kakaŋ na, kalbəhi, gəpa kilo kəlaw kiyən sula awaniɓa haykəmari pepreŋ kilo kaklaw sula kiyən poɗo, a maddamba na Samari aka koɓo taka taka.»

¹⁹ Mərəm baray na məlĩ anah sənək ɗəf na Maŋgəlva na: «Kəta Yawe dəppur təki a disiŋ foŋgo foŋgo na, wagəɗ vas sa?» Yaŋ amna: «Is yakəŋkə, wakula də horoko, ya kəzəm na ɓa.»

²⁰ Aski dəgəɗ akani: Ɗiy andərəslənək aza maddamba ndən zamə.