2Milyeŋge 16 - Bible en Guidar

Akaz, məlĩ na Yuda

¹ Aka wəzva makəlaw kiyən buhul na Peka wətən Remalya aka məlĩ yi, Akaz wətən Yotam akkpaŋ məlĩ na Yuda;

² Akaz tay də wəzva kaklaw sula, pay akkpaŋ məlyã, azəm məlĩ wəzva kəlaw kiyin sləre a Yerusalem. Nan dəgəɗ zəga təstəs a mahara Yawe, Maŋgəlva nan va na Davit afən ɓa.

³ Nan agəmək tilit milyeŋge na Israyel, agəɗək zəga daryawə, ndən wətən dayday ɗukɗuk əzlan akoffo kurmbuɗuku, va net ɗiy ɗaɗarɗe məs Yawe amõh dələv səvet sit ɗiy na Israyeləŋka.

⁴ Azaɓək-Maŋgəlva, azlək tursan addəvit gəleɗe-nettuyeŋge, aket mossorgoɗe gəm ammba wəlaŋga mundufun pakə.

⁵ Yaŋ Resin, məlĩ na Aram, gəm Peka, wətən Remalya, məlĩ na Israyel, ambataŋ a Yerusalem kalpa. Asərŋgəslnənək Akaz, ya dəɓapəŋ əgay dəndən ɓa.

⁶ Pay nan na, Resin, məlĩ na Aram amõhuk Eylat sən Aram; arɓehetik mə Yudeɗ sə Eylat, mə Edomɗe dəzzoŋ əssoŋ a Eylat adak hã pay dəpaŋka.

⁷ Akaz aslən ɗiy aza Tiglat-Pileser məlĩ na Asiri, kawnah sən na: «Gawla nok nani, wutuk nani'e; ade ətəru səva məlĩ na Aram, də an na Israyel, dədawsilyoŋ akawa!»

⁸ Akaz, andek təbəz babar də meleŋge naddəv Gəla na Yawe, gəm en naddəv gəla na məlĩ pak aslin sən məlĩ na Asiri na makaryam.

⁹ Məlĩ na Asiri aprəməka, ndən sən kiyən dəmbat a Damas amohõ, ande ɗiy nadak ake a Kir, ndən bay əbay Resin.

¹⁰ Məlĩ Akaz, mbat kawləm sən Tiglat-Pileser, məlĩ na Asiri a Damas. Yaŋ awla gəlamatuya na Damas, məlĩ Akaz aslən zev əzaɓ nan sən məsdələv Uriya də əver nan va asani.

¹¹ Məsdələv Uriya, arkak gəlamatuya; va məlĩ Akaz aslən sən sə Damas dekdeki, məsdələv Uriya arkak tak əzza na məlĩ sə Damas.

¹² Əzza na məlĩ sə Damas ləŋgə, məlĩ awlak gəlamatuya naka. Məlĩ azarək azan go'o, ndən akan peŋgi,

¹³ adək əvəl nawzla kurmbuɗuk də əvəl də gəpa nan gəm mbazla na megezlembirke, aman akani, aksu' sən mbel net zəgeɗ memeyẽɗ nazaɓ-Maŋgəlva nawrəh zazay an nan aka matuya.

¹⁴ Azargənək gəlamatuya na təbəz pepreŋ naba Yawe sə təki asan a walaŋ gəlamatuya meleketen də Gəla na Yawe, ndən ta' əɗiyən a maŋgava gəlamatuya də tapaslay pay na gazga.

¹⁵ Məlĩ Akaz, aɗi sən wən nan sən məsdələv Uriya, də wənah na: «Aka gəlamatuya metiŋginəŋka: Kədəgən əvəl nawzla kurmbuɗuk nampummo, gəm əvəl na moskoyo, əda əvəl nawzla kurmbuɗuk na məlyã də əvəl də gəpa nani, əda əvəl nawzla kurmbuɗuk ammbet ɗiy naka dələv pakə, də əvəl na gəpa neti, dit mbazlaɗe neti; mbel net zəgeɗ memeyẽɗ məda əvəl nawzla kurmbuɗuk pak gəm mbel net zəgeɗ məzaɓ-Maŋgəlva temtem pakə, kəzluvgin akani. Matuya na təbəz pepreŋ na, nulagən wən nan dəvawa.»

¹⁶ Məsdələv Uriya, aɗɗak va məlĩ Akaz aɗi sən wən nan pakə.

¹⁷ Məlĩ Akaz, arslanək gabban səfuŋ, azargən ŋgefleŋ səkani, aprikgən kasli naslslay na təbəz pepreŋ məs ɗaŋgarra naket wasliɗe nak ammbeti, aɗi aka dalas net gərmeŋge.

¹⁸ Vi kanneken sən zə məlĩ na Asiri na, addəɗanək gəla naffet arkaŋ addəv Gəla na Yawe gəm təki nawtoŋ na məlĩ nappaka.

¹⁹ Madembirgit wəzeɗe na Akaz, də an agəɗ pak məvertiŋ addəv ɗerewel na Wəza net milyeŋge na Yuda ɓa sa?

²⁰ Akaz zamə, məndəkni azet efiŋgiɗin a walaŋgəla-metiŋ na Davit. Hizkiya, wətəni dəkkpaŋ məlĩ a gəlani.