2Milyeŋge 15 - Bible en Guidar

Azariya, məlĩ na Yuda

¹ Aka wəzva makaklaw sula kiyən buhul na Yerobo'am aka məlĩ na Israyel, Azariya wətən Amatsiya akkpaŋ məlĩ a Yuda.

² Tay də wəzva kəlaw kiyən sləre gala akkpaŋ məlyã, azəm məlĩ əzva kaklaw sle' kiyən sula a Yerusalem. Iya nat man na, Yekolya na Yerusalem.

³ Agəɗək zəga təstəs a mahara Yawe, səɗek va na Amatsiya afəni.

⁴ Ya gəleɗe-nettuyeŋge dəzaŋ gərak ɓa hara; ɗiy tahəŋ əzaɓaŋ-Maŋgəlva, də əzla tursan addivit gəleɗe-nettuyeŋge.

⁵ Yawe atawək kokolo aka məlĩ hã gap pay namta nani. Asanək addəv gəla tuɓollo, Yotam wətən məlĩ dərma gəla nani, dədawtaw wən net ɗiy naka va nani.

⁶ Madembirgit wəzeɗe na Azariya, zəga an agəɗə, məvertiŋ addəv ɗerewel na Wəza net milyeŋge na Yuda ɓa sa?

⁷ Azariya zamə, andəkənənək a weleŋgit efiŋgiɗni, a walaŋgəla na Davit. Yotam, wətən dəkkpaŋ məlĩ a gəlani.

Zakarya, məlĩ na Israyel

⁸ Aka wəzva na Azariya, məlĩ na Yuda, makaklaw hoku kiyən dodopoɗo, Zakarya wətən Yerobo'am, akkpaŋ məlĩ aka Israyel a Samari təla sləre.

⁹ Agəɗək mbərayən a mahara Yawe, va efiŋgiɗin aɗɗaŋgə. Dədder səza mambrayɗe na Yerobo'am wətən Nebat atoŋgit ɗiy na Israyel addəvnəŋ ɓa.

¹⁰ Sallum wətən Yabes, atuvuruk wən akani, abay bay zam abet ɗiy pakə. Akkpaŋ məlĩ a gəlani.

¹¹ Madembirgit wəzeɗe na Zakarya, yeŋ məverit addəv ɗerewel na Wəza net milyeŋge na Israyel.

¹² Aŋki əpel na Yawe, anah sən Yehu, dawnəh na: «Kirtuk wassoŋ aka məlĩ na Israyel gap sayit poɗo.» Agəɗək vaska.

Sallum, məlĩ na Israyel

¹³ Aka əzva makaklaw hoku kiyən vaytak na Oziyas aka məlĩ na Yuda, Sallum wətən Yabes, akkpaŋ məlyã. Təla taka azəm məlĩ a Samari.

¹⁴ Yaŋ Menahem wətən Gadi, ade sə Tirsa, ndən kulo' a Samari. Yaŋ awak sən Sallum wətən Yabes a Samari. Abay bay zamə, ndən kpaŋ məlĩ a gəlani.

¹⁵ Madembirgit wəzeɗe na Sallum, wən an atuvuru, tahəŋ məverit addəv ɗerewel na Wəza net milyeŋge na Israyel.

¹⁶ Vasna, Menahem, awak sən Tifsa, abey ɗiy naddəvən pakə, azəm kiyva nan pakə, təŋ sə Tirsa; vi dəkolnən memeŋgle na walaŋgəla-metiŋ səban ɓa, abekik gil dədawayɗe nadak pakə.

Menahem, məlĩ na Israyel

¹⁷ Aka əzva na Azariya makaklaw hoku kiyən vaytak aka məlĩ a Yuda, Menahem wətən Gadi, akkpaŋ məlĩ aka Israyel a Samari azəm məlĩ wəzva kəlawə.

¹⁸ Agəɗək mbərayən a mahara Yawe; ənziya egge nan pak, dədder səzet mambrayɗe na Yerobo'am wətən Nebat, atoŋgit mə Israyelɗe addəvnəŋ ɓa.

¹⁹ Pul məlĩ na Asiri, aguluk dələv kulo'u, yaŋ Menahem apsən təbəz net koɓeɗ kilo gabal kaklaw hoku, vi dəbbah səngən dəsɓan məlĩ nani.

²⁰ Menahem agilgin təbəz net koɓeɗis na, nzalaka ataw aka Israyel, aket zel məsaryeɗ pakə, vi kapsən məlĩ na Asiri, ɗəf pak suleyɗe kaklaw sle' sle'i. Məlĩ na Asiri buryoku; dəziw aka dələv adak ɓa.

²¹ Madembirgit wəzeɗe na Menahem, zəga an agəɗ pak məvertiŋ addəv ɗerewel na Wəza net milyeŋge na Israyel ɓa sa?

²² Menahem zamə. Pekahiya wətən kpaŋ məlĩ a gəlani.

Pekahiya, məlĩ na Israyel

²³ Aka wəzva makaklaw sle' na Azariya aka məlĩ a Yuda, Pekahiya, wətən Menahem, akkpaŋ məlĩ aka Israyel a Samari, azəm məlĩ wəzva sula.

²⁴ Agəɗək mbərayən a mahara Yawe, dədder səza mambray na Yerobo'am wətən Nebat, atoŋgit mə Israyelɗe addəvnəŋ ɓa.

²⁵ Peka wətən Remalya, mərəm baray nan atuvur wən akani, yaŋ abay dit may Argob gəm Ariye a Samari addəv gəla maɓɓan ana məlĩ da adaka. Tay dit məzəlpaŋ sə Galad, kaklaw sle'i. Adan abaya, ndən ɗew məlĩ a gəlani.

²⁶ Madembirgit wəzeɗe na Pekahiya, də an agəɗ pak məvertiŋ addəv ɗerewel na Wəza net milyeŋge na Israyel.

Peka, məlĩ na Israyel

²⁷ Aka wəzva makaklaw sle' kiyən sula na Azariya aka məlĩ a Yuda yi, Peka, wətən Remalya, akkpaŋ məlĩ aka Israyel a Samari, azəm məlĩ wəzva kaklaw sula.

²⁸ Agəɗək mbərayən a mahara Yawe; dədder səza mambray na Yerobo'am wətən Nebat, atoŋgit mə Israyelɗe addəvnəŋ ɓa.

²⁹ Aka pay na Peka, məlĩ na Israyel na, Tiglat-Pileser, məlĩ na Asiri, adek əmõh Iyon, Abel-Bet-Ma'aka, Yano'a, Kedes, Hasor, Galad, Galile, gəm dələv na Neftali baymani; asimgit ake a Asiri.

³⁰ Hose'a, wətən Ela, atuvur wən aka Peka wətən Remalya, abayəka, asanək aka məlĩ a gəlan aka əzva makaklaw sulan na Yotam, wətən Oziyas, aka məlyã.

³¹ Madembirgit wəzeɗe na Peka, də an agəɗ pak, yəŋ məverit addəv ɗerewel na Wəza net milyeŋge na Israyel.

Yotam, məlĩ na Yuda

³² Aka wəzva masula'a na Peka, wətən Remalya, aka məlĩ na Israyel yi Yotam wətən Oziyas, akkpaŋ məlĩ na Yuda.

³³ Tay də əzva kaklaw sula kiyən sle' gala akkpaŋ məlyã, azəm məlĩ əzva kəlaw kiyən sləre a Yerusalem, iya nat man na, Yerusa wətən Sadok.

³⁴ Agəɗək zəga təstəs a mahara Yawe. Səɗek va Oziyas afən, adaɗɗa.

³⁵ Də as pak gəleɗe-nettuyeŋge dəzaŋ ɓa; ɗiy azbanənək əzaɓ-Maŋgəlva də əzlaŋ tursan addivit əmpa. Ndəni dərka maddamba məɓayən na Gəla na Yawe.

³⁶ Madembirgit wəzeɗe na Yotam, də an agəɗə, məvertiŋ addəv ɗerewel na Wəza net milyeŋge na Yuda ɓa sa?

³⁷ Aka pay na Yotam yi, Yawe, atəŋ əslən Resin, məlĩ na Aram, gəm Peka wətən Remalya əgay də Yuda.

³⁸ Yotam zamə, məndəkni azet efiŋgiɗin a walaŋgəla-metiŋ na Davit, afəni. Akaz wətən dəkkpaŋ məlĩ a gəlani.