2Korintus 2 - Bible en Guidar

¹ Vi aŋki nəziwgin in sən kiywa, nəmil na əmpa anokumda an wassahan sukum zukum ɓa.

² Vi an nəssahan sukumək zukum, ya naway nanneken su zu an məs nəssahan sən zəni ɓa di?

³ Ndəni nəver sukum wən nani, vi an nədeke, nədassahan zu viyit en nannekenən zu ɓa. Nəsənək gesiŋ an nənnekke, asna nokum pak wakənnekeŋgi.

⁴ Vi addəv tatwãh gəm əzəm sahã a makraw diyɗa nəver sukum dit sin araw zletzleti, ka kəssahanəngən zukumi ɓa ya vi kəsənneŋgən əŋgla məs dəknahu vikumi.

Əvviyon sən məs dəraygəni

⁵ An ɗəf tay ka kaɗɗu nəssahangən zuwa, a naw adaɗɗa nassahangən zu ɓa, anokum paki, vi nədawdaygən ɓa na, anet ɗiy sə walaŋkumi.

⁶ Vadaysa net ɗiy ahãyãnənək ɗəf vani, məkki.

⁷ Vini, aslək kəvvuyon sənəngəni, kəbbahaŋ sənəngəni vi adassahãn zən diyɗa ɓa.

⁸ Vini nədakkomokum: Mərban sən əŋgla.

⁹ Nəver sukum na, vi kawla an nazokumi, ka nəsəngən na munokum tat əɓe' sən an nərban sukum pakə.

¹⁰ An kəvvuyon sənənək ɗəfa, asna wanəvvuyon səni. An nəvvuyon sənək ɗəf aka an agəɗ pak na, vi wən nokumi, aba Kristu,

¹¹ ka Satan adawday kiyəm ɓa, vi slamma mənan aka an duwəl sən əɗɗum nan ɓa.

Geslne' na Pol a Torowas

¹² Adan nəgap a Torowas vi karban alabara nenek na Kristu, Daya akol suwək tive.

¹³ Ya kiyu dəziw a gəlan ɓa vi nərah məlmu Titus adak ɓa. Yaŋ nənah sit kan na, məssoŋ zayə, nəmbat a Makedoniya.

Əskawəla addəv Kristu

¹⁴ Soko sən Maŋgəlva, ndən dədawdawgəm pay pak addəv əskawəla də Kristu. Məŋgən əsən nan tay ərba də mənam təki pakə.

¹⁵ Vi mənamtə tursan moggon na Kristu sən Maŋgəlva a walaŋgit ɗiy en dədawkõhoŋgu gəm a walaŋgit en dədawzaŋgə.

¹⁶ Azet ɗiy meɓɓeti, məŋgən əmta yi vi dəmtaŋgəni, azet ɗiy meɓɓeti, məŋgən zeŋgile yi vi dəssoŋgən medereti. Naway nawɓap əɗɗa zəgas di?

¹⁷ Vi mənam tat va ɗiy diyɗa məmanən əpel na Maŋgəlva va zəga naɗɗa terere ɓa. Vi gegesiŋgi, səza Maŋgəlva, aba Maŋgəlva gəm addəv Kristu mədawpele.