1Samiyel 1 - Bible en Guidar

Samiyel ka mətawwən na Israyel ( 1:1—7:17 ) Anna addəv gəla na Maŋgəlva a Silo

¹ Ɗəf tay a Ramatayim na Sofim, naggərəm na Efrayim. Iya nan na Elkana, wətən Yeroham, wətən Elihu, wətən Tohu, wətən Suf, mə Efratə.

² Tay dit gil sula: Iya nat taka na, Anna, masulat tam Peninna; Peninna tat dit kirni, nat Anna tat dit kirin ɓa.

³ Ɗəf nan tay əddan ama əzva pak sə walaŋgəla-metiŋ nan a Silo kadda əppu'o gəm əzaɓ-Maŋgəlva sən Yawe Məzuɓappak na disiŋ. Kirtin Eliya tahəŋ adak sula, Hofni də Pinhas məsdəlveŋge na Yawe.

⁴ An pay nawzaɓ-Maŋgəlva na Elkana agapka, ndən əpsət haran nat Peninna guluk nani gəm sit kirtət mezeŋgleket dit muguluŋgiti.

⁵ Ya sət Anna na, ndən əpsət haran nat diyɗa, vi anat aŋgələ, də Yawe akkpaŋgat ndarzlayək daydayə.

⁶ Yas mbəɗat tawbew də ərmama azat kawdan sət gədəvət ɓa, vi Yawe akkpaŋgat ndarzlaykə.

⁷ Vas adaɗɗa aza əzva pakə, pay Anna tədaddat addəv gəla na Yawe pakə, Peninna ərma mama azata, ndət əhəma, may tawzəm ɓa.

⁸ Elkana zələt aɓsət na: «Anna, vimi kədawhəm di? Vimi kawzəm ɓa di? Vimi mokrok adassok di? Nəday kiyit kirin mezeŋgleket kəlaw azok ɓa sa?»

⁹ Dərɓaga azəmaŋ gəm asaŋ a Silo, Anna le'i. Məsdələv Eliya tay ɗewwe aka mazaŋga ama gəla na Yawe.

¹⁰ Makrat tay əssata, təhəmək dəhəm əkkaman Yawe.

¹¹ Tiynək wəna, təmna: «Yawe Məzuɓappak na disiŋ, awla əzəmsahã nat balamək noko, aɗɗum akawa, kədazgət kiyət balamək nok ɓa! Apsət uwa mizilin, vasna, wanəpsən Yawe pay nanziya nan egge pakə, slambər al na aka kiyən ɓa.»

¹² Adan tənziy əkkam aba Yawe, Eliya tay haran aza mat sekke.

¹³ Anna də makrat tədawpel kaka' metteɓ mat dədaɓla, wəlat aprəm dawpel ɓa. Eliya aɗiytək ka guluk məs mbazla abayə.

¹⁴ Eliya aɓsət na: «Pay gbəŋgbar mbazla adagrak səkok di? Dok əpar mbazla nok akki mbərən!»

¹⁵ Anna nak təzlan səni, təmna: «Guluk kiɓəɓəl nan ɓa daya, nəsə mbazla may zəga naɓlan kiyu ɓa, kappan megenegenew aba Yawe yi.

¹⁶ Kədawɗiyət balamək nok va guluk ɗar ɓa. Vi makraw aknahək də əɗɗumo gəm wəzəmsahã naw nəpel hã kakaŋkəŋka.»

¹⁷ Yaŋ Eliya azlani amna: «Dok zayə. Ya kəta Maŋgəlva na Israyel dəɗɗa suk an kəŋgəl avan pakə.»

¹⁸ Yaŋ təmna: «Kəta balamək nok tərah mbəlembəle ama horoko.» Guluk nak təgəmək tive nat təmbatka, ndət namnamə. Tat sãh va lahəŋ əmpa ɓa.

¹⁹ Asilyoŋguk pumu, appu'oŋ aba Yawe, sə dərɓagani amndoŋ anetda a Rama. Elkana asapək dət Anna ɗak nani, yaŋ Yawe aɗɗum akata.

Uwa gəm sawã na Samiyel

²⁰ Dərɓaga əvoŋɗe, Anna təɗiyək daway, təwək wiyna. Yaŋ təlvan na; Samiyel: «Vi təmna, səva Yawe nəŋgluwa.»

²¹ Elkana asilik də gəla nan pakə, kadawzaɓ-Maŋgəlva sən Yawe, əzaɓ-Maŋgəlva nama əzva gəm əvəl an man aynə.

²² Anna təmbat ɓa hara. Vi tənah sən zələt na: «aga səm wiyən dəppet bide, vasna kawkan ərban sən Yawe, dəsangən adak faɗə.»

²³ Elkana zələt azlan sət na: «Aɗɗa an kəwəl lew oroko. Asok gap pay kədawɗohən səmet bide. Kəta Yawe dəknahan əpel nani.» Guluk nak təsatka, gap pay təɗoh ma wiyən səmet bide.

²⁴ Yaŋ təmbat də wiyən nak adan təɗoh səmet bide dit medgeɗgeɗe hoku, gəpa kəgəla gəm mbazla na megezlembirke kwenekwene. Yaŋ təki wiyən slawraŋga nak addəv gəla na Yawe a Silo.

²⁵ Atawənək wəla medgeɗge naka, gəm akanən wiyən nak aba Eliya.

²⁶ Yas təmna: «Kamə daya nawa, va kəsok madoroko, daya nawa, intə guluk təsat a maŋgovok aŋ kakkaman Yawe naka.

²⁷ Vi nərəhgən wiynəŋki nəkkamə. Yas Yawe apsu an nəssõh amani.

²⁸ Naw tam wanəpsən sən Yawe pay nasso nan egge pakə, wasan sən Yawe.» Yas appu' aba Yawe.