1Milyeŋge 9 - Bible en Guidar

Əzvaɗe maddirɓe ( 9:1—11:43 ) Yawe arbanək zən masulan aza Salomoŋ

¹ Pay Salomoŋ agrak ərka Gəla na Yawe gəm na məlyã də əɗɗa an makran aŋgəl naɗɗa pakə,

² Yawe arbanək zən aza Salomoŋ masulan va arban zən azan a Gabawən.

³ Yawe aɓsən na: «Nəprəmək əkkam nok də wəppu' an kəppu' suwa: gəla kərkəŋ nətafək vi iya naw dəsangən adak faɗə; haraw də makraw pak tay akan ɗayɗayə.

⁴ An is tat ədaw abaw va afuk Davit adaw abaw də makran taka təstəsə, is tat əɗɗa an nənoh suk pakə, an is tat ərma mahenziŋɗe naw dit tiveɗnanziya naw pakə,

⁵ wanəziwgən məlĩ nok aka Israyel faɗ va nəpel sən Davit afuk dawnəh na: Uwa noki nawsan aka mazaŋga na məlĩ na Israyel faɗ dərɓogoko.

⁶ An mənokum dit kirtukum kəktuhunək gəɓokum səzawa, kərmenin wəsəɓɗe naw dit mahenziŋɗe naw en nəɗi abokumiŋ ɓa, yaŋ kəddoŋ əɗɗa wəza sit meŋgilveɗ meɓɓet gəm kuppu'oŋ abeti,

⁷ asna, wanərɓahan Israyel səka dələv nəpsənəŋka; wanəppan Gəla məs nəɗi aka iya nawəŋka, wanəzgan sə maharaw faraɗa, Israyel wakkpaŋ va zəga na mamba, va zəga nawmas net ɗiy pakə.

⁸ Kaɓzluni Gəla məɓaynəŋka, ɗiy dədawtoŋgoŋ kəlazan pak waggətaŋgə, waɗɗaŋ fofyoko: “Wanahaŋ na, vimi Yawe aɗɗa dəlvəŋ də Gəlaŋ vaŋ di?”

⁹ Kawzlani na: Vi appanən Yawe Maŋgəlva net məs dəgilgit efiŋgiɗit səka dələv na Eziptə yi, vi asapaŋ dit maŋgəlveɗ meɓɓeti, agdukoŋ sitini, agəɗ sitin wəzay yi: sən aski Yawe aki wərayəs pak aketi.»

Wəzeɗe na Salomoŋ temtemi

¹⁰ Addəv əzva kaklaw sula, gəleɗe sula Salomoŋ arkə, Gəla na Yawe də an na məlyã,

¹¹ Huram, məlĩ na Tir, dəpsən muguguleɗ dit wəleŋɗe lelewɗe, gəm meleŋge va aŋgələ, ndəni məlĩ Salomoŋ apsən walaŋgəleɗe gugriɗ kaklaw sula aka va na Galile tamə.

¹² Huram vit sə Tir, kawle walaŋgəleɗe Salomoŋ apsiniŋki, ya tahəŋ law aran ɓa.

¹³ Aɓsən na: «Mə walaŋgəleɗe məŋ kəvayən di məlmuwa?» Yaŋ aye na dələv na Kabul, iya net asanək vas hã pay dəpaŋka.

¹⁴ Huram aslənək meleŋge kilo gabal hoku də səkat sula sən məlyã.

¹⁵ Wəza na vavyak məlĩ Salomoŋ aɗi yaŋka, ərka Gəla na Yawe də an na məlyã, təgbalka adawyaŋ na Millo, zlava na dələv na Yerusalem, Hasor, Megiddo gəm Gezer.

¹⁶ Farawən məlĩ na Eziptə, ambatək əmõh Gezer, aɗi sən offo, mə Kana'anɗe dəssoŋ a walaŋgəla-metiŋ nadak pak aŋgroɓike, agəmək Gezer apsət guluk na Salomoŋ wətən dawkət ammba zile,

¹⁷ ndəni Salomoŋ asilgən Gezer gəm Bet-Horon-nafuŋ,

¹⁸ Ba'alat də Tamar na kapta-muyã naka dələv vani,

¹⁹ vaski addəvit walaŋgəleɗe gugriɗ en Salomoŋ adawzaɓet zəgeɗ nawzəm nani, walaŋgəleɗe net mawteɗ nalpa, dit en net pilseŋge. Salomoŋ arkək zəgeɗ en makran aŋgəl pak a Yerusalem, a Liban gəm aka dələv an nammba van pakə.

²⁰ Ɗiy meɓɓet tahəŋ, aka dələv vani, məs mə Israyelɗeŋ ɓa, ndəɗaŋgə: mə Amorɗe, mə Hitɗe, mə Perziɗe, mə Hittiɗe, gəm mə Yebusɗe.

²¹ Kirtit məs dəppaŋ dərɓeget aka dələv vani, məs mə Israyelɗe dəɓap əzetin ɓa, Salomoŋ agimik ka dəɗɗaŋgən wəza tatwãh na vavyak hã gap pay dəpaŋka.

²² Salomoŋ dəkkpeŋget mə Israyelɗe ka belemɗe ɓa, vi ndəɗaŋgə məzəlpaɗe, məɗɗaŋ wəza nani, deyeɗe nani, məslaŋ barayɗe nani, deyeɗe net mawteɗ nawgay nani gəm məpeŋgeŋ pilseŋge nani.

²³ Eŋkiŋ deyeɗe net deyeɗe na bərzləŋna-kivadələv mədawgənən wəza na Salomoŋ, ɗiy səkat sle' də kaklaw sle' məs dədawlanən wəza net ɗiy məɗɗaŋ wəza.

²⁴ Dərɓaga wətən Farawən təsim sə walaŋgəla na Davit addəv Gəla an salomoŋ arkə sətəŋki kan arka Millo.

²⁵ Addəv əzva pak Salomoŋ tay əda əvəl nawzla kurmbuɗuk gəm əzaɓ-Maŋgəlva nawrah zazay təl hoku aka matuya məs arkə sən Yawe gəm əzla tursan aka an naba Yawe. Agrakək Gəla vani.

²⁶ Məlĩ Salomoŋ azaɓək bəlayɗe a Esiyon-Geber, go'o də Eylat, ama pehe net vəlarɗe, aka dələv na Edom.

²⁷ Huram aslənik məɗɗaŋ wəza nan aket bəlayɗe məsənaŋ əŋkor məlpa moggonəŋ; tahəŋ dit məɗɗaŋ wəza na Salomoŋ sapə.

²⁸ Agapaŋ a Ofir, sədaki akiyaŋ meleŋge kilo gap gabal kəlaw kiyən poɗo sən məlĩ Salomoŋ.