1Korintus 5 - Bible en Guidar

Əzlzlaɓ də wən na buhɗəfa gəm ənziya na daŋgla ( 5:1—7:40 ) Əkuh a gisbe aret məzutafaŋgə

¹ Aŋga pak ɗəf tay əprəmən na wən na əkuh a gizbe tay a walaŋkum, əkuh a gizbe məs a walaŋgit ɗar dayday tay vas ɓa. Hã gap ɗəf sərokum əsan dət ga afəni.

² Yaŋ kədawkaɓaŋgə! Əhəm kədawhəhəmaŋ dərəŋ ka ɗəf məgəɗ zəga vas dəgilgən sərokum ɓa sa?

³ Naw na, də nəsaw faraɗa zlaŋ na, in tat də mənokum addəv əmpəsa. Nətawək wən nan aka məgəɗ zəga vas va kəmna awalaŋkum nani.

⁴ Də iya na Daya naw Yesu, an kəkkalaŋgək na, mənokum, əmpəs nawa gəm əɓap na Daya nam Yesu,

⁵ məppan zev ɗəf vas sən Satan vi gəɓa zən dəzəgəni, zeŋgilen dəkõhgən pay na Daya.

⁶ Əkaɓ nokuməs lewi ɓa, kəsənən na wuɗo siɗikke dədawhəs gəpa məllaɓəŋ pak ɓa sa?

⁷ Məgilgən wuɗo məzvan səwalaŋkum kəssoŋgən gəpa məllaɓən meleketen məza wuɗo ɓa. Vas kənanən məza wuɗo ɓa, Pak nam agəɗka, vi mətawni wəla Kristu səkay.

⁸ Vasna məɗɗa səm əzləra na Pak nam məza də wuɗo məzvan ɓa, məza də wuɗo na mambraya gəm na əkuh a gizbe ɓa, ya də memteke na təstəsə gəm na gegesiŋ məza wuɗo aran ɓa.

⁹ Nəver sukumək addəv ɗerewel naw na, kədawslereŋ dit məkuwaŋ a gizbe ɓa.

¹⁰ Naw nəɗɗum aket məkuwaŋ a gizbe naka dəlvəŋ ɓa, awaniɓa məŋglaŋ deleɗ diyɗa gəm məvoŋgoŋ tive ɓa, awaniɓa məzbaŋ zəgakamaŋgəlva ɓa, adahək kəgilyoŋgən səddəv ənziya eggeska.

¹¹ Ya an məs nəver sukum kakaŋkəŋ na, vi kədawsapaŋ də ɗəf məs adawyaŋ na məlma, ya ndən əppan ki zən sən əkuh a gizbe, sən əŋgla net deleɗ diyɗa, sən əzban zəgakamaŋgəlva, sən əra ɗəfa, sən əbay na mbazla, sən əvoŋ tive, kədawzəman də zev ɗəf vas kpak ɓa.

¹² Mi dəsapaw də ətawwən aket ɗiy nappaka di? Namna ɗiy en narokum kədawtawən wən aket ɓa sa?

¹³ En nappaka na Maŋgəlva yi nawtawwən aketi. Məgilgin məsdaraw səwalaŋkum.