1Alabaraɗe Də Mabərkiziti 18 - Bible en Guidar

Əska wəla na Davit aket dəlveŋge meggeŋgiɗni

¹ Dərɓaga asna, Davit arbə sitik mə Filistiɗe, avoŋgənək kiyti. Amohũk Gat dit walaŋgəleɗe nan səvet mə Filistiɗe.

² Arbə sitik mə Mo'abɗe yaŋ mə Mo'abɗe akkpaŋgaŋ belemɗe na Davit nawki sənən nzalaka.

³ Davit arbə sənək Hadadezer məlĩ na Soba kəla Hamat, gala adawmbat ərban məlĩ nan aka məlpa na Efrat.

⁴ Davit amohũk mawteɗ nalpa səvan gabal, məpeŋgeŋ pilseŋge gabal buhulu, gəm məzəlpaŋ mədawaŋ də tilit gabal kaklaw sula. Davit atawək zlozloŋgboŋgit pilseŋge məgdahaŋ mawteɗ pakə, mbək səzet səkat kaka'ə.

⁵ Mə Aramɗe azzoŋguk sə Damas kabbah sənən Hadadezer məlĩ na Soba, Davit abayək ɗiy səret mə Aramɗe zel gabal kaklaw sula kiyən sula.

⁶ Davit aɗiyək prefeɗe aket mə Aram na Damas. Mə Aramɗe akkpaŋgaŋgək belemɗe na Davit, əkiyaŋ sənən nzalaka. Yawe apsənək əska wəla sən Davit a təki al pakə.

⁷ Davit amõhĩk barayɗe na meleŋge net məzəlpaŋ na Hadadezer, akiyik a Yerusalem.

⁸ Davit andek təbzeŋge pepreŋɗe, sə Tibhat gəm sə Kun, walaŋgəleɗe gugriɗ na Hadadezer əŋɗa net diyɗa, dəndit Salomoŋ avot ŋgefleŋ na təbəz pepreŋge, dədəkeɗ gəm zəgeɗ naddəv gəla nawda meɓɓeti.

⁹ Tow, məlĩ na Hamat, aprəm na Davit arbə sitik məzəlpaŋ na Hadadezer məlĩ na Soba.

¹⁰ Ndən slən Hadoram, wətən aza məlĩ Davit kasɗani, gəm vi kawfet akani, adan agay də Hadadezer arbə səni, vi Hadadezer məzuseɓ na Tow iyi, aki sənək zəgeɗ na meleŋge, na təbəz babar gəm na təbəz pepreŋge.

¹¹ Məlĩ Davit apsinik zəgeɗ vet sən Yawe, gəm təbəz babar də meleŋge amõh səvet ɗiy-ɗar pakə, sə Edom, sə Mo'ab, gəm səvet mə Ammonɗe, səvet mə Filistiɗe dit mə Amalekɗe.

¹² Yaŋ Abisay wətət Seruya abey mə Edomɗe gabal kəlaw kiyit dodopoɗo, aka walaŋ na bətuwa.

¹³ Yaŋ aɗi deyeɗe na bərzləŋna-kivadələv aka Edom, mə Edomɗe baymet akkpaŋgaŋgək belemɗe na Davit. A təki Davit ambat pak Yawe tay əpsən əska wəla.

Wəŋɗa net məɗɗaŋ wəza na Davit

¹⁴ Davit azəmək məlĩ aka Israyel baymani, tay əɗɗa zəga də tiveni gəm təstəs sit ɗiy nan pakə.

¹⁵ Yo'ab wətət Seruya yi daya net məzəlpaŋgə; Yosafat, wətən Ahilud, ndəni mətəl ma na məlyã;

¹⁶ Sadok wətən Ahitub, Abimelek wətən Abiyatar, məsdəlveŋgeŋ; Sawsa yi məzuvere;

¹⁷ Ya aket mə Keretɗe dit mə Peletɗe na Benaya wətən Yoyada yi, kirtin Davit vetiŋ aza məlĩ hãslə.