1Alabaraɗe Də Mabərkiziti 17 - Bible en Guidar

Iynama na Maŋgəlva sən Davit dit kirtini

¹ Aka Davit ade asan ananda, aɓsən məskəleŋ Natan na: «Yaŋ kan nəsawək addəv gəla net muguguleɗ, akoti na wənmiyna na Yawe dərəŋ a gizlirke na gabaga.»

² Natan aɓsən Davit na: «An kəɗɗum a mokrok naɗɗa pak aɗɗa, vi Maŋgəlva tay də isi.»

³ Yaŋ dəfəɗ nan dəpaska, əpel na Maŋgəlva ade sən Natan, dawnəh na:

⁴ «Doko, kənah səngən Davit gawla nawa: Yaŋ an Yawe anahə: Istə narkə su gəla nawsaw ɓa.

⁵ Vi nəsaw ɗah addəv gəla, səza nəgilgin Israyel sə Eziptə hã gap pay dəpaŋ ɓa, gizlirkeɗeŋ təki nassa naw gor ahã gor ãhã.

⁶ Də təki nədaw a weleŋgit mə Israyelɗe pak na, wən tay nəpel sən taka səret mətawaŋwən na Israyel məs nəɗi sən wən nan dəteɗgin ɗiy naw dawnəh na: “Vimi kərkaŋ suwən gəla net muguguleɗ ɓa di sa?”

⁷ Ya kakaŋ na, vaŋ kədanah sən gawla naw Davit: An Yawe Məzuɓappak na disiŋ anah yaŋka, səma wətaɗ nəgəmuko, səmet gilewi, ka kəsokgən aket ɗiy naw na Israyel.

⁸ Nəsawək də is a təki kəmbat pakə, nəzetik məzuzelɗe nok səbok pakə, wanəgilgin sləmok va net ɗiy gugriɗ naka dəlvafuŋ.

⁹ Wanəwel təki sit ɗiy naw mə Israyelɗe, wanəɗiye, wassoŋ a gəleti, ageslne'eŋ na əmpa ɓa. Ɗiy mbəreyit azbanən na əsər met va lahəŋ ɓa,

¹⁰ səza pay nəɗi mətawaŋwən aket ɗiy naw mə Israyelɗe na, nəvoŋgənək kiyit məzuzelɗe nok pakə, nənah sukuk na, Yawe warkə suk gəla.

¹¹ An pay nok agapək nazbet efiŋgiɗko, wanəwel taka səret kirtuk dərɓogoko, wanəsɓan məlĩ nani.

¹² Ndəni narkə su Gəla, wanəsɓan mazaŋga na məlĩ nan ka faɗə.

¹³ Wanəsaw ka afəni, wasan ka wətuwa; nəppan na əɗɗa moggon naw akan va nəppan səka ɗəf an dəsan daabəŋ kiyuk ɓa.

¹⁴ Wanəɗi addəv Gəla nawa gəm addəv məlĩ naw hã faɗə, mazaŋga na məlĩ nan wasan ɓəlɓəl hã faɗə.»

¹⁵ Vaski Natan apel sən wənəs gəm ulas pak sən Davit.

Əkkam na Davit

¹⁶ Məlĩ Davit pay ɗew əsan aba Yawe, yaŋ amna: «Intə nawa di Yawe Maŋgəlva? Gəla naw miy agap hara kəgapgugən gba aŋ di?

¹⁷ As pak siɗikkey ama horoko Maŋgəlva, kəpelik aka gəla na gawla nok far lahəŋka. Kuləwək va ɗəf tektek aret ɗiyi Yawe Maŋgəlva.

¹⁸ Miy Davit arah nawnah suk əmpa dəwəlsən gagdak na gawla nok di? Nok kəsənək gawla noko.

¹⁹ Yawe aka wən na gawla noko, va mokrok aŋgəli kəɗɗa zəgeɗ metiŋgitiŋki, vi karban gagdak noki yi.

²⁰ Yawe ɗəf tay va is ɓa. Maŋgəlva tay abbəruk va məprəm də sləmam pakəŋ ɓa.

²¹ May nawaŋ va ɗiy nok mə Israyel aka dəlvafuŋ məs Maŋgəlva al kawbitit, vi kawgilgin iya nan də əɗɗa zəgeɗ naggət aket gəm nawgeslne siti, karɓehet ɗiy səbet ɗiy nan məs abit sə Eziptəŋ di?

²² Kəkkpaŋgetik ɗiy na Israyel ka ɗiy nok hã faɗə, Yawe istə Maŋgəlva neti.

²³ Kakaŋ na Yawe, əpel an kəpel aka gawla nok də gəla nan dəsan gesiŋ faɗə. Aɗɗa vas va kənahə!

²⁴ Wən nan dəsangən gesiŋgi, iya nok dəgilgən hã faɗ dawnəh na: Yawe Məzuɓappaki Maŋgəlva na Israyel, Maŋgəlva net mə Israyelɗe yi; gəla na gawla nok Davit dəwwər gabban ɓəlɓəl aboko!

²⁵ Vi is Maŋgəlva nawtə kənah sən gawla nok a sləman na, wakərkə sən gəla. Ndəni gawla nok asan əkkam abokəŋka.

²⁶ Ya kakaŋ na, Yawe, istə Maŋgəlva, kəpelək wən moggonəŋ aka gawla noko.

²⁷ Yaŋ kakaŋ na, kətaf əɗɗa əzaɓ aka gəla na gawla nok dəsangən hã faɗ aboko, vi is Yawe kəɗɗa əzaɓ akani, əzaɓ wasan akan hã faɗə.»