1Alabaraɗe Də Mabərkiziti 14 - Bible en Guidar

Davit a Yerusalem

¹ Huram, məlĩ na Tir aslənək maslənɗe aza Davit dit muguguleɗ na Liban, məslmaŋ gərmeŋge gəm məntaraŋ wəleŋɗe, karkə sən gəla.

² Davit asənək na, Yawe tay əsɓan məlĩ nan aka Israyel, vi məlĩ nan aɓayək aka batam Israyel ɗiy nani.

³ Davit akayək gil meɓɓet a Yerusalem, awək kirin mezeŋgleket dit muguluŋgit əmpa.

⁴ Iya net en muwet a Yerusalem yaŋka: Sammuwa, Sobab, Natan gəm Salomoŋ,

⁵ Yibhar, Elisuwa, Elpalet,

⁶ Noga, Nefeg, Yafiya,

⁷ Elisama, Be'elyada gəm Elifelet.

Əska wəla na Davit aket mə Filistiɗe

⁸ Mə Filistiɗe aprəmən na, məɗini Davit ka məlĩ aka Israyel dəwənnani. Mə Filistiɗe pak ambataŋgək əkayan Davit. Davit aprəməka, yaŋ agil abet mə Filistiɗe.

⁹ Mə Filistiɗe azzoŋ, agulnən walaŋ net mə Rafayɗe.

¹⁰ Davit sosõhgən Maŋgəlva dawnəh na: «Nəmbat aket mə Filistiɗeŋ sa? Wakipsiw ammba vaw sa?» Yawe aɓsən na: «Doko wanipsuk avoko.»

¹¹ Addoŋ a Ba'al-Perasim, adaki Davit arbisiti. Davit amna: «Maŋgəlva aɓliwik təki anet məzuzelɗe naw da, va təki məs iŋkile arɗaŋgə.» Vini miya təki nan na, Ba'al-Perasim va wənah na (Yawe na təki məɓliwni.)

¹² Appetinik meŋgilveɗ net adaka, yaŋ Davit amna: «Wəzlet akoffo!»

¹³ Mə Filistiɗe agulnənək walaŋ əmpa.

¹⁴ Davit sosõhgən Maŋgəlva əmpa, Maŋgəlva, aɓsən na: «Kəmbat aket kəla dərɓeget ɓa, asulək kiyti, kədegən azet abet zaɗiyeɗi.

¹⁵ Pay kəprəm ɓaɓəlma təl ɗəf aket zaɗiyeɗi, vasna kəgilgən nawgay kana, wasan Maŋgəlva agilik abok vi kawbay dibirgidik net mə Filistiɗe.»

¹⁶ Davit agəɗək va Maŋgəlva aɗi sən wən nani, arbə sənənək dibirgidik net mə Filistiɗe sə Gabawən hã gap a Gezer.

¹⁷ Sləma Davit abbalək aket dəlveŋge pakə, Yawe aggbo'uk geslne nan aket ɗiy-ɗar pakə.