Yeremiya 52 - Bible en Guidar

Əskot na Yerusalem ( 52:1-34 ) Nabukodonozor tay ərma Sedekiya

¹ Sedekiya tay də wəzva kaklaw sula kiyən taka gala akkpaŋ məlyã; yaŋ azəm məlĩ wəzva kəlaw kiyən taka a Yerusalem. Iya nat man na Hamutal, wətən Yeremiya na Libna.

² Yaŋ agəɗ zəga mbərayən diyɗa ama hara Yawe, va an Yoyakim agəɗ pakə.

³ Aka wən nawdagədəv na Yawe yi, zəgeɗis aɗɗaŋ aka Yerusalem də Yuda, hã ndən ndol əndolit faraɗa sə maharanəŋka. Sedekiya aɓoŋguk aka məlĩ na Babilon.

⁴ Aka wəzva məvaytakan na məlĩ nani, aka wəvoŋ kəlaw na təla makəlawani. Nabukodonozor məlĩ na Babilon payə, ndən dit məzəlpaŋ nan aka Yerusalem. Assahaŋgək abani; akkpotoŋ dələv kiyən tərwəslə.

⁵ Walaŋgəla-metiŋ asanək məsərŋgəslən hã gap wəzva makəlaw kiyən takan na Sedekiya aka məlyã.

⁶ Də wəvoŋ vaytak na təla mapoɗoni, may na ngarnya adek a walaŋgəla-metiŋ; zəga nawzəm net ɗiy naka dələv tay ɓa.

⁷ Məɓliwni zlava na walaŋgəla-metiŋ. Məzəlpaŋ pak anzoŋko, agilyoŋ sə walaŋgəla-metiŋ də dəfɗa dəka tive na walaŋgit zlavaɗe sula məs go'o də guli net wəleŋɗe na məlyã. Də mə Kaldiyeɗ asərngəslən walaŋgəla-metiŋ na Yerusalem zlaŋ, agulyoŋguk dəka tive na Araba.

⁸ Yaŋ məzəlpaŋ net mə Kaldiyeɗ arɓahanən məlyã, arufnən Sedekiya a təki məwarwar na Yeriko; məzəlpaŋ nan pak atərayaŋgək səmmbani.

⁹ Armannək məlyã, akanən aba məlĩ na Babilon a Ribla aka dələv na Hamat. Atawwən akani.

¹⁰ Məlĩ na Babilon atawək wəlet kirtin Sedekiya ama harani, gəm əmpa ataw wəlet ɗiy gugriɗ na Yuda pak a Ribla.

¹¹ Dərɓaga aska, Nabukodonozor aɓəhək hara Sedekiya, aynan dit ngiyamɗe na təbəz pepreŋ sula. Məlĩ na Babilon akak a Babilon, azganək a fərsəna hã gap pay na əmta nani.

Nebuzaradan agrakanək əɓzla na Yerusalem

¹² Aka wəzva na Nabukodonozor, makəlaw kiyən vaytak aka məlyã, də wəvoŋ kəlaw na təla məsle'eni, Nebuzaradan, daya net məzugaŋ məziwweŋ aba məlĩ na Babilon, poh a Yerusalem.

¹³ Aɗi sənək offo sən Gəla na Yawe, gəla na məlyã, gəm gəleɗe naddəv walaŋgəla-metiŋ na Yerusalem daysa net ɗiy en tutukprukɗe.

¹⁴ Məzəlpaŋ net mə Kaldiyeɗ məs dəzbanən daya net məzugaŋ naka, aɓzluwənək zlava dətərwəsl Yerusalem pakə.

¹⁵ Sə dərɓagan na, Nebuzaradan, asimgitik məzurayɗe meɓɓeti, madambirgit ɗiy məs dəmbraŋ a walaŋgəla-metiŋ gəm ɗiy en dəzzoŋ dəsapaŋ sən məlĩ na Babilon gəm məsənaŋ əzaɓ zəga en dəppaŋgə.

¹⁶ Yaŋ Nebuzaradan daya net məzugaŋ appet məzurayɗe meɓɓet naka dəlva, ka məmpaŋ megezlembirkeɗ gəm ka məzinseŋgi.

¹⁷ Mə Kaldiyeɗ akrepinik dədəkeɗ na təbəz pepreŋ na Gəla na Yawe, gokkoɗe gəm mosgoyo na təbəz pepreŋ naddəv gəla na Yawe. Akanənək təbəz pepreŋgəs net zəgeɗis pak a Babilon.

¹⁸ Ngefleŋɗe, ziginɗe, slohoŋɗe, hiŋgiɗ naksu' zəga dit hiŋgiɗ na waya dit zəgeɗ na təbəz pepreŋ naɗɗa wəza dənɗaŋ addəv gəla na Daya pak andetinke.

¹⁹ Daya net məzugaŋ nak andek məzaŋzaŋɗe, masərgeɗ dit hiŋgiɗ naksu' zəga dənɗaŋ, ngefleŋ, zəgeɗ nawɗi lalam aketi, maɗiyeɗi, margeɗi zəgeɗ dəssoŋ na meleŋge may na təbəz babara pak daya net məzugaŋ nak andeke.

²⁰ Dədəkeɗ sula, ŋgefleŋ metiŋgin gidili' gidili'i, naket wasliɗe na təbəz pepereŋ kəlaw kiyən sula məs məlĩ Salomoŋ agəɗ dəssoŋgən gabba gəla na Yawe zəgeɗ na təbəz pepreŋgis pak tuwãhĩ ɗəf dəslagən gagdak neti.

²¹ An dəwəl sit dədəkeɗ na, əɓay na dədəka an maddaabəŋ na tay metir vaytakə; sulək nan tay metir sləre; gədəvən tay kitikke, gbigbim nan tay kirtin va ɗəf poɗo.

²² Daŋgbarga na təbəz pepreŋ tay akani, əɓay na daŋgbarga taka pak tay metir sula də mani, gazway dit weweɗe aman pak na təbəz pepreŋ tahəŋ ki daŋgbarga van tərwəslə. Vaska'a na dədəka an masulan dit weweɗe nani.

²³ Weweɗe kaklaw vaytak kiyən sləre aka təkzləmən, weweɗe ki gazway tərwəsl pak tahəŋ səkatə.

²⁴ Daya net məzugaŋ nak armak məsdələv metiŋ Seraya, məsdələv Sefanya masula daya net məsdəlveŋge gəm məgaŋ maddamba hoku.

²⁵ Səddəv walaŋgəla-metiŋ na, armak daya məɗiyən aket məzəlpaŋgə, ɗiy buhul səret ɗiy en məlĩ assərək dənɗaŋgə mərəh addəv walaŋgəla-metiŋ, məzuver na daya net məzəlpaŋgə məzunde ɗiy naka dələv aka wəza, gəm ɗiy kaklaw sləre səret ɗiy naka dəlva, en məs dəssoŋ a walaŋgəla-metiŋgini.

²⁶ Nebuzaradan, daya net məzugaŋ andeke, akek a Ribla, aza məlĩ na Babilon.

²⁷ Yaŋ məlĩ na Babilon arbəsiti, abey a Ribla, aka dələv na Hamatə. Vaski kan məsimgin Yuda faraɗa səka dələv nani.

²⁸ Aŋki ənɗa net ɗiy məs Nabukodonozor asimgit aka əzva mabuhulon net mə Yudeɗi: Gabal hoku də kaklaw sula kiyən hoku 3 023.

²⁹ Addəv əzva makəlaw kiyən dodopoɗon na məlĩ Nabukodonozor na: Ɗiy sekat dudopoɗo də kaklaw hoku kiyit sula sə Yerusalem (832).

³⁰ Addəv əzva makaklaw sula kiyən hoku na Nabukodonozor, Nebuzaradan daya net məzugaŋ asimgitik mə Yudeɗ səkat buhul də kaklaw poɗo kiyən sle'i 745. Sap pak ɗiy gabal poɗo də səkat sləre 4 600.

Məlĩ na Babilon appanək Yoyakin

³¹ Addəv əzva makaklaw hoku kiyən buhul, səza məsimgin Yoyakin, məlĩ na Yuda, də əvoŋ kaklaw sula kiyən sle' na təla makəlaw kiyən sulani Evil-Merodak məlĩ a Babilon addəv əzva maddaabəŋ na əzəm məlĩ nani, appanək Yoyakin məlĩ na Yuda, yas agilgin sə fərsəna.

³² Apel sənək də wən neneke, aɗi mazaŋga na məlĩ nan dayki mezeŋgeɗ net milyeŋge mərmet meɓɓet nazan a Babilon adaka.

³³ Addəɗet sinik lukutɗe na fərsəna, azəmək way ɗayɗay dəndən addəv ənziya nan pakə.

³⁴ Əzəm nan an ɗayɗayə, məlĩ na Babilon dədapsən səvan pay pak va aza wəray nan ama əsɓəta hã gap pay əmta nani, pay nanziya egge nan pakə.