Va'Atəŋ 16 - Bible en Guidar

Uwa na Ismayel

¹ Saray, guluk na Abram, tuwə sən ɓa. Balamək nat tat mə Eziptək, iya nat na, Hagar,

² yaŋ Saray tənah sən Abram na: «Yawe yaŋ atakwək də uwa. Dəɗah atoŋ azat balamək naw kəŋkə, kuzuŋ wanərah wiyin sə kəlazata.» Abram atafək an Saray tənah səni.

³ Dərɓaga wəzva kəlaw səza Abram asan aka dələv na Kana'an, Saray guluk nan təgəmət Hagar, balamək nat mə Eziptəkə, kapsənət ka guluk sən Abram zəlta.

⁴ Alək azat Hagar, təla abaytəka. Adan Hagar tula na, təgəmək daway, tawlət ɗak daya nat va zəga azat ɓa.

⁵ Saray təɓsən Abram na: «Istə kiwən na wera adawrawən əŋka. Intə nəpsukut balamək naw aɓɓoko. Adan təɗi daway na, tawlu va zəga arat ɓa. Yawe dədawtawan wənəŋ aka walaŋgəm də isi!»

⁶ Abram azlan sət Saray na: «Balamək nok yakəŋ ammba voko, agəɗ dəndət va kəŋgələ.» Saray təzəmgətək sahã, ndət ɓakə.

⁷ Maslay na Yawe arəhət go'o də vov net iŋkile a kapta-muyã, məs naka tive nawmbat a Sur,

⁸ apsət na: «Hagar, balamək nat Saray, səŋga kəde gəm əddok aŋga di?» Təzlan na: «Ənzaw nədanzaw sət ɗak daya naw Saray.»

⁹ Maslay na Yawe apsət na: «Amil azat ɗak daya noko, avoŋ sən an tədawnah suko.»

¹⁰ Maslay na Yawe anah səta: «Wanuwan suk kiyuk diyɗa, kawɓapiy əŋɗan ɓa.»

¹¹ Maslay na Yawe apsət na: «Yaŋ də daway kənani, wakəwə wiyna, kəlvangən na Ismayel, vi Yawe aprəmək əzəmsahã noko.

¹² Wətuk van wasan va koro nawra. Wagay dit ɗiy pakə, ɗiy wagayaŋ dəndəni, wasan takərgən səzet milmiŋgiɗin pakə.»

¹³ Hagar təyak na Yawe məs dəpel suwa: «Istə Maŋgəlva məzuluwa.» Vi tənahək ɗah na: «Aŋ nula gesiŋ, dərɓaga awluwəŋ sa?»

¹⁴ Vi vaski məya «Vov net iŋkile van na Lahay məzuluwa»; aka walaŋ Kades də Beredti.

¹⁵ Hagar tuwə sənək wiyin sən Abram; alvan na, Ismayel wiyin an Hagar təwəsəni.

¹⁶ Abram tay də wəzva kaklaw dodopoɗo kiyən sləre, gala Hagar tuwa Ismayel.