Nahum 3 - Bible en Guidar

Məppan walaŋgəla-metiŋ məbaygəbay addəv əza

¹ Haya əraya! Aka walaŋgəla-metiŋ məzi mbeli, məknəhən dəwənnan pak də uwawəna əhãl arsla ɓa!

² Ɓaɓəlma ɗoŋroŋ! Gogoyo na tilit mawteɗi! Pilseŋge məsakaryakaŋgə! Mawteɗ nawgay məzuzlahaŋgə!

³ Məŋkoroŋ pilseŋge asilyoŋko! Masalamɗe kwiti'kwiti'i! Iwiɗ net tulhõŋge! Ɗiy mimtit aŋɗaŋ ɓa! Ki gəbay kpewkpewi! Gəbayɗe mimtit agrakaŋ ɓa! Ətaŋgbãyaŋ aza kigəbay neti.

Wil ara Niniwe

⁴ Aka wən na wəday net polkoyeɗ nat məpolkoyokə məstetele gaŋgaŋ məs pepet diyɗa awan zəni, ndət məzuvil ɗiy-ɗar dit polkoyeɗ nata, gəm mahəlfaɗe dit teteleɗe nata,

⁵ In yakəŋ əzzaw akoko Yawe Məzuɓappak aɗiymani! Wanəkros gabba zana nok hã aka horoko, vi karban zuk mekeleŋ abet ɗiyi, ərba wil nok abet milyeŋge.

⁶ Wanəndol gadərgiya akoko, wanəkkpoŋgok ngalyã, wanəkkpoŋgok ka nawmas akoko.

⁷ Ɗəf duluk pak wanzan səzok faraɗa, wanah na: «Niniwe azəka, naway nawla sasãhən di?» Səŋga nədaddaw ərah ɗiy naffeten sənən makran di?

Niniwe tay əbəta addəv an dərəh Tebes

⁸ Is ɗaɗah ki Tebes sa? Walaŋgəla-metiŋ dəsan a mətəwəra na kiva məlpa na Nil dit iŋkile kiyən tərwəslə, pehe yi təki an məborun nawke iŋkile nani, zlava nan day ki pehe taka.

⁹ Etiyopi də Eziptə adawbay van aketi, ndəɗaŋgə wərəh nan məza agrak ɓa! Put də mə Libiɗe dəbbahaŋ sukun lahəŋka.

¹⁰ Nan pak məsimgini na gəgayə, ambatək ka məfərsəna, mətekeɗti kirtin na gəba aket zlazlaŋgbray tiveɗ pakə, muwɗeketi ɗiy tektek nan də əɗɗa sletmayku aketi, gəm miyneti ɗiy gugriɗ nan dit ngiyamɗe.

¹¹ Nok pak mbazla dəɓlan kiyuk tamə, aɗamə! Is kəpəl nawkay təki nawɗam səba məzuzele.

Niniwe tay əɓap əmpa tələn ɓa

¹² Korguɗe nok pak tahəŋ va sokoyeɗ də uwa aketi, an məɓleti, wayyo'oŋ a bara ɗəf nawzimti.

¹³ Ɗiy nok yeŋki, gil dəppaŋ kaka'ə. Mativeɗ na dələv nok sən kiyit adawkoloŋ abet məzuzelɗe noko: offo azimik məkəɗəslaɗe noko.

¹⁴ Ambaɗ iŋkile nok eŋgili, akkpuɓet korguɗe noko, dok addəv ndərɓa, andəp dələva, arma zəga nawbay meneke!

¹⁵ Adaki offo adawzəmko, masalam adawzoko wazəmkun va adawndəraŋ hololom. Awan kiyuk va hololom, awan kiyuk va zaray.

Ɗiy dəwənnet wazaŋgə

¹⁶ Kuwetik məmanən vet nok kuɗiskuɗis daykiyit ngərzleɗ na disiŋ, va hololomɗe məs dəɗesleŋ, dədawveŋgeŋgi!

¹⁷ Məzugaŋ nok tahəŋ va zaray, məzəlpaŋ nok tahəŋ va ərka na amama! Əzza wəsan gala səmyã adawda addəvit mambareɗi; an pay arəmka, əveŋgeŋ pakə. Təki addoŋ na, aŋgay di seɗiŋ?

Wən na dərwa məza azaɓna ɓa

¹⁸ Sin tay ədenin məzuteɗeŋɗe noko məlĩ na Asiri! Ɗiy tektek nabok assoŋguk ndərəslə! Ɗiy nok atərayaŋgək aket mossorgoɗe gugriɗe, ɗəf nakkelet tay ɓa!

¹⁹ Zəga naffeten əŋzla nok tay ɓa, huwwa nok wassə! En dəprəmnən wən nok pak warganən vet akoko. Vi aka naway məza daraw nok dərbə ɗayɗay ɓa di?